પદ્મ પુરાણ · અધ્યાય 3.23

નારદ ઉવાચ-
એવં બહુતિથે કાલે લોમશો મુનિસત્તમઃ ।
આગતશ્ચ મહાભાગસ્તત્ર યાદૃચ્છિકો મુનિ

તં દૃષ્ટ્વા બ્રાહ્મણં સર્વે પિશાચાઃ ક્ષુત્સમાકુલાઃ ।
ધાવંતો હ્યત્તુકામાસ્તે મિલિત્વા યૂથવર્તિનઃ

દહ્યમાનાસ્તુ તીવ્રેણ તેજસા લોમશસ્ય તુ ।
અસમર્થાઃ પુરઃ સ્થાતું તે સર્વે દૂરતઃ સ્થિતાઃ

તત્ર પૂર્વકર્મબલાત્પિશાચઃ સહ વૈ દ્વિજઃ ।
સમીક્ષ્ય લોમશં રાજન્સાષ્ટાંગં પ્રણિપત્ય ચ

ઉવાચ સૂનૃતાં વાચં બદ્ધ્વા શિરસિ ચાંજલિમ્ ।
મહાભાગ્યોદયે વિપ્ર સાધૂનાં સંગતિર્ભવેત્

ગંગાદિપુણ્યતીર્થેષુ યો નરઃ સ્નાતિ સર્વથા ।
યઃ કરોતિ સતાં સંગં તયોઃ સત્સંગમો વરઃ

ગુરૂણાં સંગમો વિપ્ર દૃષ્ટાદૃષ્ટફલો ભુવિ ।
સ્વર્ગદો રોગહારી ચ કિં તમોપહરો મતઃ

ઇત્યુક્ત્વા કથયામાસ પૂર્વવૃત્તાંતમદ્ભુતમ્ ।
ઇમા ગંધર્વકન્યાસ્તા મુને સોઽહં દ્વિજાત્મજઃ

સર્વે પિશાચરૂપેણ મિથઃ શાપવિમોહિતાઃ ।
દીનાનનાસ્સુતિષ્ઠામસ્તવાગ્રે મુનિસત્તમ

ત્વદ્દર્શનેન બાલાનાં નિસ્તારો નો ભવિષ્યતિ ।
સૂર્યોદયે તમસ્તોમઃ કિં નુ લીયેત પુષ્કરે

શ્રુત્વૈતલ્લોમશો વાક્યં કૃપાર્દ્રીકૃતમાનસઃ ।
પ્રત્યુવાચ મહાતેજા દુઃખિતં તં મુનેઃ સુતમ્

મત્પ્રસાદાચ્ચ સર્વેષાં સ્મૃતિઃ સપદિ જાયતામ્ ।
ધર્મે ચ વર્તતાં યેન મિથઃ શાપો લયં વ્રજેત્

પિશાચ ઉવાચ-
મહર્ષે કથ્યતાં ધર્મો મુચ્યેમ યેન કિલ્બિષાત્ ।
નાયં કાલો વિલંબસ્ય શાપાગ્નિર્દારુણો યતઃ

લોમશ ઉવાચ-
મયા સાર્દ્ધં પ્રકુર્વંતુ રેવાસ્નાનં વિધાનતઃ ।
શાપાન્મોક્ષ્યતિ વો રેવા નાન્યથા નિષ્કૃતિર્ભવેત્

શૃણુષ્વાવહિતો વિપ્ર પાપનાશો ધ્રુવં નૃણામ્ ।
રેવાસ્નાનેન જાયેત ઇતિ મે નિશ્ચિતા મતિઃ

સપ્તજન્મકૃતં પાપં વર્તમાનં ચ પાતકમ્ ।
રેવાસ્નાનં દહેત્સર્વં તૂલરાશિમિવાનલઃ

પ્રાયાશ્ચિત્તં ન પશ્યંતિ યસ્મિન્પાપે પિશાચક ।
તત્સર્વં નર્મદાતોયે સ્નાનમાત્રેણ નશ્યતિ

જ્ઞાનકૃન્નર્મ્મદાસ્નાનમતો મોક્ષફલા હિ સા ।
હિમવત્પુણ્યતીર્થાનિ સર્વપાપહરાણિ વૈ

ઇંદ્રલોકપ્રદં હીદં નિર્મિતં બ્રહ્મવાદિભિઃ ।
સર્વકામફલા રેવા મોક્ષદા પરિકીર્તિતા

પાપઘ્ની પાપહારિણી સર્વકામફલપ્રદા ।
વિષ્ણુલોકદઆપ્લાવો નાર્મદઃ પાપનાશનઃ

યામુનઃ સૂર્યલોકાય ભવેદાપ્લાવ ઉત્તમઃ ।
સારસ્વતોઘવિધ્વંસી બ્રહ્મલોકફલપ્રદઃ

વિશાલફલદા પ્રોક્તા વિશાલા હિ પિશાચક ।
પાપેંધનદવાગ્નિસ્તુ ગર્ભહેતુક્રિયાપહઃ

વિષ્ણુલોકાય મોક્ષાય નાર્મદઃ પરિકીર્તિતઃ ।
સરયૂગંડકીસિંધુશ્ચંદ્રભાગા ચ કૌશિકી

તાપી ગોદાવરી ભીમા પયોષ્ણી કૃષ્ણવેણિકા ।
કાવેરી તુંગભદ્રા ચ અન્યાશ્ચાપિ સમુદ્રગાઃ

તાસુ રેવા પરા પ્રોક્તા વિષ્ણુલોકપ્રદાયિની ।
રેવા તુ પ્રાપ્યતે પુણ્યૈઃ પૂર્વજન્મકૃતૈર્દ્વિજ ।
અપુનર્ભવદં તત્ર મજ્જનં મુનિપુત્રક

ગાયંતિ દેવાઃ સતતં દિવિષ્ઠા રેવા કદા દૃષ્ટિગતા હિ નો ભવેત્ ।
સ્નાતા નરા યત્ર ન ગર્ભવેદનાં પશ્યંતિ તિષ્ઠંતિ ચ વિષ્ણુસન્નિધૌ

મજ્જંતિ યે પ્રત્યહમત્ર માનવા રેવાસુતો યે બહુપાપકંચુકાઃ ।
મજ્જંતિ તે નો નિરયેષુ ધર્મ્મતઃ સ્વર્ગે તુ તે ચારુચરંતિ દેવવત્

તીવ્રૈર્વ્રતૈર્દાનતપોભિરધ્વરૈઃ સાર્ધં વિધાત્રા તુલયા ધૃતા પુરા ।
રેવાપિશાચાશુ તયોર્દ્વયોરભૂદ્રેવા વરા તત્ર ચ મોક્ષસાધિકા

નારદ ઉવાચ-
એતચ્છ્રુત્વા વચસ્તસ્ય લોમશસ્ય પિશાચકાઃ ।
તેન સાર્દ્ધં યયુઃ શીઘ્રં રેવામજ્જનહેતવે

તતો દૈવાત્સમુત્પન્નો રેવારોધસિ મારુતઃ ।
તેષાં પ્રવાહસ્પૃષ્ટાનાં ગાત્રે જલકણપ્રદઃ

રેવાજલકણસ્પર્શાત્પૈશાચ્યાત્તે વિમોચિતાઃ ।
તત્ક્ષણાદ્દિવ્યવપુષઃ પ્રશશંસુશ્ચ નર્મદામ્

તતો લોમશવાક્યેન તાશ્ચ ગંધર્વકન્યકાઃ ।
પરિણીતાઃ સુખં તેન વિપ્રેણ નર્મદાતટે

ઉવાસ સુચિરં કાલં સ્નાનપાનાવગાહનૈઃ ।
અર્ચિત્વા નર્મદામત્ર વિષ્ણુલોકં ગતાશ્ચ તે

એવં તે કથિતો રાજન્નર્મદાગુણસંશ્રયઃ ।
ઇતિહાસો મહાપુણ્યઃ શ્રવણાત્પાપનાશનઃ

ઇતિ શ્રીપાદ્મે મહાપુરાણે સ્વર્ગખંડે ત્રયોવિંશોઽધ્યાયઃ