પદ્મ પુરાણ · અધ્યાય 3.17

નારદ ઉવાચ-
ઉત્તરે નર્મદાકૂલે તીર્થં યોજનવિસ્તૃતમ્ ।
પત્રેશ્વરેતિ વિખ્યાતં સર્વપાપહરં પરમ્

તત્ર સ્નાત્વા નરો રાજન્દૈવતૈઃ સહ મોદતે ।
પંચવર્ષસહસ્રાણિ ક્રીડતે કામરૂપધૃક્

ગર્જનં તુ તતો ગચ્છેદ્યત્ર મેઘ ઉપસ્થિતઃ ।
ઇંદ્રજિન્નામ સંપ્રાપ્તં તસ્ય તીર્થપ્રભાવતઃ

મેઘરાવં તતો ગચ્છેદ્યત્ર મેઘાભિગર્જિતમ્ ।
મેઘનાદો ગણસ્તત્ર વરસંપન્નતાં ગતઃ

તતો ગચ્છેત રાજેંદ્ર બ્રહ્માવર્તમિતિ સ્મૃતમ્ ।
તત્ર સંનિહિતો બ્રહ્મા નિત્યમેવ યુધિષ્ઠિર

તત્ર સ્નાત્વા તુ રાજેંદ્ર બ્રહ્મલોકે મહીયતે ।
તતોંઽગારેશ્વરે તીર્થે નિયતો નિયમાશનઃ

સર્વપાપવિશુદ્ધાત્મા રુદ્રલોકં સ ગચ્છતિ ।
તતો ગચ્છેત રાજેંદ્ર કપિલાતીર્થમુત્તમમ્

તત્ર સ્નાત્વા નરો રાજન્ગોપ્રદાનફલં લભેત્ ।
કાંચીતીર્થં તતો ગચ્છેદ્દેવર્ષિગણસેવિતમ્

તત્ર સ્નાત્વા નરો રાજન્ગોલોકં સમવાપ્નુયાત્ ।
તતો ગચ્છેત્તુ રાજેંદ્ર કુંડલેશ્વરમુત્તમમ્

તત્ર સંનિહિતો રુદ્રસ્તિષ્ઠતે ઉમયા સહ ।
તત્ર સ્નાત્વા તુ રાજેંદ્ર અવધ્યસ્ત્રિદશૈરપિ

પિપ્પલેશ્વરં તતો ગચ્છેત્સર્વપાપપ્રણાશનમ્ ।
તત્ર ગત્વા તુ રાજેંદ્ર રુદ્રલોકે મહીયતે

તતો ગચ્છેત્તુ રાજેંદ્ર વિમલં વિમલેશ્વરમ્ ।
તત્ર દેવશિખા રમ્યા ઈશ્વરેણ નિપાતિતા

તત્ર પ્રાણાન્પરિત્યજ્ય રુદ્રલોકમવાપ્નુયામ્ ।
તતઃ પુષ્કરિણીં ગચ્છેત્તત્ર સ્નાનં સમાચરેત્

સ્નાનમાત્રે નરસ્તત્ર ઇંદ્રસ્યાર્દ્ધાસનં લભેત્ ।
નર્મદા સરિતાં શ્રેષ્ઠા રુદ્રદેહાદ્વિનિઃસૃતા

તારયેત્સર્વભૂતાનિ સ્થાવરાણિ ચરાણિ ચ ।
સર્વદેવાતિદેવેન ઈશ્વરેણ મહાત્મના

કથિતા ઋષિસંઘેભ્યો હ્યસ્માકં ચ વિશેષતઃ ।
મુનિભિઃ સંસ્તુતા હ્યેષા નર્મદા પ્રવરા નદી

રુદ્રદેહાદ્વિનિષ્ક્રાંતા લોકાનાં હિતકામ્યયા ।
સર્વપાપહરા નિત્યં સર્વપ્રાણિનમસ્કૃતા

સંસ્તુતા દેવગંધર્વૈરપ્સરોભિસ્તથૈવ ચ ।
નમઃ પુણ્યજલે આદ્યે નમઃ સાગરગામિનિ

નમોસ્તુ તે ઋષિગણૈઃ શંકરદેહનિઃસૃતે ।
નમોસ્તુ તે ધર્મવૃતે વરાનને નમોસ્તુ તે દેવગણૈકવંદિતે

નમોસ્તુ તે સર્વપવિત્રપાવને નમોસ્તુ તે સર્વજગત્સુપૂજિતે ।
યશ્ચેદં પઠતે સ્તોત્રં નિત્યં શુદ્ધેન માનવઃ

બ્રાહ્મણો વેદમાપ્નોતિ ક્ષત્ત્રિયો વિજયી ભવેત્ ।
વૈશ્યસ્તુ લભતે લાભં શૂદ્રશ્ચૈવ શુભાં ગતિમ્

અન્નાર્થી લભતે હ્યન્નં સ્મરણાદેવ નિત્યશઃ ।
નર્મદાં સેવ્યતે નિત્યં સ્વયં દેવો મહેશ્વરઃ ।
તેન પુણ્યા નદી જ્ઞેયા બ્રહ્મહત્યાપહારિણી

ઇતિ શ્રીપાદ્મે મહાપુરાણે સ્વર્ગખંડે સપ્તદશોઽધ્યાયઃ