પદ્મ પુરાણ · અધ્યાય 3.16

ઋષિરુવાચ-
પૃચ્છંતિ તે મહાત્માનો નારદં હિ મહાજનાઃ
યુધિષ્ઠિરપરાઃ સર્વે ઋષયશ્ચ તપોધનાઃ

આખ્યાહિ ભગવંસ્તથ્યં કાવેરીસંગમે મહત્
લોકાનાં ચ હિતાર્થાય અસ્માકં ચ વિવૃદ્ધયે

સદા પાપરતા યે તુ નરા દુષ્કૃતિકારિણઃ
મુચ્યંતે સર્વપાપેભ્યો ગચ્છંતિ પરમં પદમ્
એતદિચ્છામિ વિજ્ઞાતું ભગવન્વક્તુમર્હસિ

નારદ ઉવાચ-
શૃણુધ્વં સહિતાઃ સર્વે યુધિષ્ઠિરપુરોગમાઃ
અત્ર કૃત્વા મહાયજ્ઞં કુબેરઃ સત્યવિક્રમઃ
ઇદં તીર્થમનુપ્રાપ્ય સામ્રાજ્યાદધિકોઽભવત્

સિદ્ધિં પ્રાપ્તો મહારાજ તન્મે નિગદતઃ શૃણુ
કાવેરી નર્મદાં યત્ર સંગતા લોકવિશ્રુતામ્

તત્ર સ્નાત્વા શુચિર્ભૂત્વા કુબેરઃ સત્યવિક્રમઃ
તપસ્તપ્યતિ યક્ષેંદ્રો દિવ્યં વર્ષશતં મહત્

તસ્ય તુષ્ટો મહાદેવઃ પ્રદદ્યાદ્વરમુત્તમમ્
ભો ભો યક્ષ મહાસત્વ વરં બ્રૂહિ યથેપ્સિતમ્
બ્રૂહિ કાર્યં યથેષ્ટં તુ યદ્વા મનસિ વર્ત્તતે

કુબેર ઉવાચ-
યદિ તુષ્ટોસિ દેવેશ યદિ દેયો વરો મમ
આદિકૃચ્ચૈવ સર્વેષાં યક્ષાણામધિપો ભવેત્

કુબેરસ્ય વચઃ શ્રુત્વા તુષ્ટો દેવો મહેશ્વરઃ
એવમસ્તુ તતશ્ચોક્ત્વા તત્રૈવાંતરધીયત

સોઽપિ લબ્ધવરો યક્ષઃ શીઘ્રં યક્ષકુલં ગતઃ
પૂજિતઃ સર્વયક્ષેંદ્રૈરભિષિક્તસ્તુ પાર્થિવઃ

કાવેરીસંગમં તત્ર સર્વપાપપ્રણાશનમ્
યે નરા નાભિજાનંતિ વંચિતાસ્તે ન સંશયઃ

તસ્માત્સર્વપ્રયત્નેન તત્ર સ્નાયીત માનવઃ
કાવેરી ચ મહાપુણ્યા નર્મદા ચ મહાનદી

તત્ર સ્નાત્વા તુ રાજેંદ્ર અર્ચયેદ્વૃષભધ્વજમ્
અશ્વમેધફલં પ્રાપ્ય રુદ્રલોકે મહીયતે

અગ્નિપ્રવેશં યઃ કુર્યાદ્યશ્ચ કુર્ય્યાદનાશનમ્
અનિવર્તિકા ગતિસ્તસ્ય યથા મે શંકરોઽબ્રવીત્

સેવ્યમાનો વરસ્ત્રીભિર્મોદતે દિવિ રુદ્રવત્
ષષ્ટિવર્ષસહસ્રાણિ ષષ્ટિકોટ્યસ્તથાપરે

મોદતે રુદ્રલોકસ્થો યત્ર યત્રૈવ ગચ્છતિ
પુણ્યક્ષયાત્પરિભ્રષ્ટો રાજા ભવતિ ધાર્મિકઃ

ભોગવાન્ધર્મશીલશ્ચ મહાંશ્ચૈવ કુલોદ્ભવઃ
તત્ર પીત્વા જલં સમ્યક્ચાંદ્રાયણફલં લભેત્

સ્વર્ગં ગચ્છંતિ તે મર્ત્યા યે પિબંતિ જલં શુભમ્
ગંગાયમુનયોર્મધ્યે યત્ફલં યાંતિ માનવાઃ

કાવેરીસંગમે સ્નાત્વા તત્ફલં તસ્ય જાયતે
એવં તુ તસ્ય રાજેંદ્ર કાવેરીસંગમં મહત્
પત્રેશ્વરેતિ વિખ્યાતં સર્વપાપહરં પરમ્

ઇતિ શ્રીપાદ્મે મહાપુરાણે સ્વર્ગખંડે ષોડશોઽધ્યાયઃ