પદ્મ પુરાણ · અધ્યાય 3.18

નારદ ઉવાચ-।
તદાપ્રભૃતિ બ્રહ્માદ્યા ઋષયશ્ચ તપોધનાઃ ।
સેવંતે નર્મદાં રાજન્કામક્રોધવિવર્જિતાઃ

તસ્મિન્નિપતિ તં દૃષ્ટ્વા શૂલં દેવસ્ય ભૂતલે ।
તસ્ય પુણ્યં સમાખ્યાતં શંકરેણ મહાત્મના

શૂલભેદેતિ વિખ્યાતં તીર્થં પુણ્યતમં મહત્ ।
તત્ર સ્નાત્વાર્ચ્ચયેદ્દેવં ગોસહસ્રફલં લભેત્

ત્રિરાત્રં કારયેદ્યસ્તુ તસ્મિન્તીર્થે નરાધિપ ।
અર્ચયિત્વા મહાદેવં પુનર્જન્મ ન વિદ્યતે

ભીમેશ્વરં તતો ગચ્છેન્નર્મદેશ્વરમુત્તમમ્ ।
આદિત્યેશ્વરં મહાપુણ્યં તથાઽજ્યમધુના સહ

મલ્લિકેશ્વરમભ્યર્ચ્ય પર્યાપ્તં જન્મનઃ ફલમ્ ।
વરુણેશ્વરં તતઃ પશ્યેન્નીરાજેશ્વરમુત્તમમ્

સર્વતીર્થફલં તસ્ય પંચાયતનદર્શનાત્ ।
તતોગચ્છેત રાજેંદ્ર યુદ્ધં વૈ યત્ર સાધિતમ્

કોટિતીર્થં તુ વિખ્યાતમસુરા યત્ર યોધિતાઃ ।
યત્ર તે નિહતા રાજન્દાનવા બલદર્પિતાઃ

તેષાં શિરાંસિ ગૃહ્યંતે નિહતાસ્તે સમાગતાઃ ।
તૈસ્તુ સંસ્થાપિતો દેવઃ શૂલપાણિર્મહેશ્વરઃ

કોટિર્વિનિહતા તત્ર તેન કોટીશ્વરઃ સ્મૃતઃ ।
દર્શનાત્તસ્ય તીર્થસ્ય સદેહઃ સ્વર્ગમાવહેત્

તદા ઇંદ્રેણ ક્ષુદ્રત્વાદ્વજ્રકીલેન યંત્રિતઃ ।
તદાપ્રભૃતિ લોકાનાં સ્વર્ગમત્વં નિવારિતમ્

સઘૃતં શ્રીફલં દત્વા દત્વા ચાંતે પ્રદક્ષિણમ્ ।
સર્વતઃ સહ દેવેન શિરસાદાય ધારયેત્ ।
સર્વકામેન સંપૂર્ણો રાજા ભવતિ પાંડવ

મૃતો રુદ્રત્વમાપ્નોતિ ન ચેહ જાયતે પુનઃ ।
સ્વર્ગં ગત્વા તતો રાજ્યં કૃત્વાગત્ય તતો દિવમ્

મહાદેવં તથોપાસ્ય ત્રયોદશ્યાં હિ માનવઃ ।
સ્નાતમાત્રો નરસ્તત્ર સર્વયજ્ઞફલં લભેત્

તતો ગચ્છેત રાજેંદ્ર તીર્થં પરમશોભનમ્ ।
નરાણાં પાપનાશાય અગસ્ત્યેશ્વરમુત્તમમ્

તત્ર સ્નાત્વા નરો રાજન્મુચ્યતે બ્રહ્મહત્યયા ।
કાર્તિકસ્ય તુ માસસ્ય કૃષ્ણપક્ષચતુર્દશી

ઘૃતેન સ્નાપયેદ્દેવં સમાધિસ્થો જિતેંદ્રિયઃ ।
એકવિંશકુલોપેતો ન મુચ્યેદૈશ્વરાત્પદાત્

ધેનવોપાનહંચ્છત્રં તથા દદ્યાચ્ચ કંબલમ્ ।
ભોજનં ચૈવ વિપ્રાણાં સર્વં કોટિગુણં ભવેત્

તતો ગચ્છેત રાજેંદ્ર રવિસ્તવમનુત્તમમ્ ।
તત્ર સ્નાત્વા નરો રાજન્સિંહાસનગતિર્ભવેત્

નર્મદા દક્ષિણે કૂલે તીર્થં શક્રસ્ય વિશ્રુતમ્ ।
ઉપોષ્ય રજનીમેકાં સ્નાનં તત્ર સમાચરેત્

સ્નાનં કૃત્વા યથાન્યાયમર્ચ્ચયેત્તુ જનાર્દનમ્ ।
ગોસહસ્રફલં તસ્ય વિષ્ણુલોકં સ ગચ્છતિ

ઋષિતીર્થં તતો ગચ્છેત્સર્વપાપહરં નૃણામ્ ।
સ્નાતમાત્રો નરસ્તત્ર શિવલોકે મહીયતે

નારદસ્ય ચ તત્રૈવ તીર્થં પરમશોભનમ્ ।
સ્નાતમાત્રો નરસ્તત્ર ગોસહસ્રફલં લભેત્

દેવતીર્થં તતો ગચ્છેદ્બ્રહ્મણા નિર્મિતં પુરા ।
તત્ર સ્નાત્વા નરો રાજન્બ્રહ્મલોકે મહીયતે

અમરકંટકં તતો ગચ્છેદમરસ્થાપિતં પુરા ।
સ્નાતમાત્રો નરસ્તત્ર ગોસહસ્રફલં લભેત્

તતો ગચ્છેત રાજેંદ્ર વામનેશ્વરમુત્તમમ્ ।
તત્ર વામનકં દૃષ્ટ્વા મુચ્યતે બ્રહ્મહત્યયા

ઋષિતીર્થં તતો ગચ્છેદીશાનેશં પુમાન્ધ્રુવમ્ ।
વટેશ્વરં તતો દૃષ્ટ્વા પર્ય્યાપ્તં જન્મનઃ ફલમ્

ભીમેશ્વરં તતો ગચ્છેત્સર્વવ્યાધિવિનાશનમ્ ।
સ્નાતમાત્રો નરો રાજન્સર્વદુઃખાત્પ્રમુચ્યતે

તતો ગચ્છેત રાજેંદ્ર વારણેશ્વરમુત્તમમ્ ।
તત્ર સ્નાત્વા નરો રાજન્સર્વદુઃખાત્પ્રમુચ્યતે

સોમતીર્થં તતો ગચ્છેત્પશ્યેચ્ચંદ્રમનુત્તમમ્ ।
તત્ર સ્નાત્વા નરો રાજન્ભક્ત્યા પરમયા યુતઃ

તત્ક્ષણાદ્દિવ્યદેહસ્થઃ શિવવન્મોદતે ચિરમ્ ।
ષષ્ટિવર્ષસહસ્રાણિ શિવલોકે મહીયતે

તતો ગચ્છેત રાજેંદ્ર પિંગલેશ્વરમુત્તમમ્ ।
અહોરાત્રોપવાસેન ત્રિરાત્રફલમાપ્નુયાત્

તસ્મિંસ્તીર્થે તુ રાજેંદ્ર કપિલાં યઃ પ્રયચ્છતિ ।
યાવંતિ તસ્યા રોમાણિ તત્પ્રસૂતકુલસ્ય ચ

તાવદ્વર્ષસહસ્રાણિ રુદ્રલોકે મહીયતે ।
યસ્તુપ્રાણપરિત્યાગં તત્ર કુર્ય્યાન્નરાધિપ

અક્ષયં મોદતે કાલં યાવચ્ચંદ્રદિવાકરૌ ।
નર્મદાતટમાશ્રિત્ય તિષ્ઠંતિ યે તુ માનવાઃ

તે મૃતાઃ સ્વર્ગમાયાંતિ તથા સુકૃતિનો યથા ।
સુરભિકેશ્વરં ગચ્છેન્નારકં કોટિકેશ્વરમ્

ગંગાવતરણે તત્ર દિને પુણ્યો ન સંશયઃ ।
નંદિતીર્થં તતો ગચ્છેત્સ્નાનં તત્ર સમાચરેત્

તુષ્યતે તં તુ નંદીશઃ સોમલોકે મહીયતે ।
તતો દ્વીપેશ્વરં ગચ્છેદ્વ્યાસતીર્થં તપોવનમ્

નિવર્તિતા પુરા તત્ર વ્યાસભીતા મહાનદી ।
હુંકારિતા તુ વ્યાસેન દક્ષિણેન તતો ગતા

પ્રદક્ષિણં તુ યઃ કુર્યાત્તસ્મિંસ્તીર્થે નરાધિપ ।
વ્યાસસ્તસ્ય ભવેત્પ્રીતો વાંછિતં લભતે ફલમ્

સૂત્રેણ વેષ્ટયેદ્યસ્તુ દીપ્તં દેવં સવેદિકમ્ ।
ક્રીડતે હ્યક્ષયં કાલં યથા રુદ્રસ્તથૈવ સઃ

તતો ગચ્છેત રાજેંદ્ર એરંડીતીર્થમુત્તમમ્ ।
સંગમે તુ નરઃ સ્નાત્વા મુચ્યતે સર્વપાતકૈઃ

એરંડી ત્રિષુ લોકેષુ વિખ્યાતા પાપનાશિની ।
અથવાશ્વયુજે માસે શુક્લપક્ષસ્ય ચાષ્ટમી

શુચિર્ભૂત્વા નરઃ સ્નાત્વા સોપવાસપરાયણઃ

બ્રાહ્મણં ભોજયેદેકં કોટિર્ભવતિ ભોજિતા ।
એરંડીસંગમે સ્નાત્વા ભક્તિભાવાનુરંજિતઃ

શુક્તિકાં શિરસિ સ્થાપ્ય અવગાહ્ય ચ વૈ જલમ્ ।
નર્મદોદકસંમિશ્રં મુચ્યતે સર્વકિલ્બષૈઃ

પ્રદક્ષિણં તુ યઃ કુર્યાત્તસ્મિંસ્તીર્થે નરાધિપ ।
પ્રદક્ષિણીકૃતા તેન સપ્તદ્વીપા વસુંધરા

તતઃ સુવર્ણતિલકે સ્નાત્વા દત્વા ચ કાંચનમ્ ।
કાંચનેન વિમાનેન રુદ્રલોકે મહીયતે

તતઃ સ્વર્ગચ્યુતઃ કાલાદ્રાજા ભવતિ વીર્યવાન્ ।
તતો ગચ્છેત રાજેંદ્ર ઇક્ષુનદ્યાસ્તુ સંગમમ્

ત્રૈલોક્યે વિશ્રુતં દિવ્યં તત્ર સંનિહિતઃ શિવઃ ।
તત્ર સ્નાત્વા નરો રાજન્ગાણપત્યમવાઽપ્નુયાત્

સ્કંદતીર્થં તતો ગચ્છેત્સર્વપાપપ્રણાશનમ્ ।
આજન્મનઃ કૃતં પાપં સ્નાનમાત્રાદ્વ્યપોહતિ

આંગિરસં તતો ગચ્છેત્સ્નાનં તત્ર સમાચરેત્ ।
ગોસહસ્રફલં તસ્ય રુદ્રલોકે મહીયતે

લાંગલતીર્થં તતો ગચ્છેત્સર્વપાપપ્રણાશનમ્ ।
તત્ર ગત્વા તુ રાજેંદ્ર સ્નાનં તત્ર સમાચરેત્

સપ્તજન્મકૃતૈઃ પાપૈર્મુચ્યતે નાત્ર સંશયઃ ।
વટેશ્વરં તતો ગચ્છેત્સર્વતીર્થમનુત્તમમ્

તત્ર સ્નાત્વા નરો રાજન્ગોસહસ્રફલં લભેત્ ।
સંગમેશ્વરં તતો ગચ્છેત્સર્વપાપહરં પરમ્

તત્ર સ્નાત્વા નરો રાજ્યં લભતે નાત્ર સંશયઃ ।
ભદ્રતીર્થં સમાસાદ્ય દાનં દદ્યાત્તુ યો નરઃ

તસ્ય તીર્થપ્રભાવેણ સર્વં કોટિગુણં ભવેત્ ।
અથ નારી ભવેત્કાપિ તત્ર સ્નાનં સમાચરેત્

ગૌરીતુલ્યા ભવેત્સા તુ ઇંદ્રં યાતિ ન સંશયઃ ।
અંગારેશ્વરં તતો ગચ્છેત્સ્નાનં તત્ર સમાચરેત્

સ્નાતમાત્રો નરસ્તત્ર રુદ્રલોકે મહીયતે ।
અંગારક્યાં ચતુર્થ્યાં તુ સ્નાનં તત્ર સમાચરેત્

અક્ષયં મોદતે કાલં મુરારિકૃતશાસનઃ ।
અયોનિસંગમે સ્નાત્વા ન પશ્યેદ્યોનિમંદિરમ્

પાંડવેશ્વરકં ગત્વા સ્નાનં તત્ર સમાચરેત્ ।
અક્ષયં મોદતે કાલમવધ્યસ્તુ સુરાસુરૈઃ

વિષ્ણુલોકં તતો ગત્વા ક્રીડાભોગસમન્વિતઃ ।
તત્ર ભુક્ત્વા મહાભોગાન્મર્ત્યે રાજાભિજાયતે

કંબોતિકેશ્વરં ગચ્છેત્સ્નાનં તત્ર સમાચરેત્ ।
ઉત્તરાયણે તુ સંપ્રાપ્તે યદિચ્છેત્તસ્ય તદ્ભવેત્

ચંદ્રભાગાં તતો ગચ્છેત્સ્નાનં તત્ર સમાચરેત્ ।
સ્નાતમાત્રો નરસ્તત્ર સોમલોકે મહીયતે

તતો ગચ્છેત રાજેંદ્ર તીર્થં શક્રસ્ય વિશ્રુતમ્ ।
પૂજિતં દેવરાજેન દેવૈરપિ નમસ્કૃતમ્

તત્ર સ્નાત્વા નરો રાજન્દાનં દત્વા ચ કાંચનમ્ ।
અથવા નીલવર્ણાભં વૃષભં યઃ સમુત્સૃજેત્

વૃષભસ્ય તુ રોમાણિ તત્પ્રસૂતિકુલેષુ ચ ।
તાવદ્વર્ષસહસ્રાણિ નરો હરપુરે વસેત્

તતઃ સ્વર્ગાત્પરિભ્રષ્ટો રાજા ભવતિ વીર્યવાન્ ।
અશ્વાનાં શ્વેતવર્ણાનાં સહસ્રેષુ નરાધિપ

સ્વામી ભવતિ મર્ત્યેષુ તસ્ય તીર્થ પ્રભાવતઃ ।
તતો ગચ્છેત રાજેંદ્ર બ્રહ્માવર્ત્તમનુત્તમમ્

તત્ર સ્નાત્વા નરો રાજંસ્તર્પયેત્પિતૃદેવતાઃ ।
ઉપોષ્ય રજનીમેકાં પિંડં દત્વા યથાવિધિ

કન્યાગતે યથાઽદિત્યે અક્ષયં સંચિતં ભવેત્ ।
તતો ગચ્છેત રાજેંદ્ર કપિલાતીર્થમુત્તમમ્

તત્ર સ્નાત્વા નરો રાજન્કપિલાં યઃ પ્રયચ્છતિ ।
સંપૂર્ણાં પૃથિવીં દત્વા યત્ફલં તદવાપ્નુયાત્

નર્મદેશ્વરં પરં તીર્થં ન ભૂતં ન ભવિષ્યતિ ।
તત્ર સ્નાત્વા નરો રાજન્નશ્વમેધફલં લભેત્

તત્ર સર્વગતો રાજા પૃથિવ્યામભિજાયતે ।
સર્વલક્ષણસંપૂર્ણઃ સર્વવ્યાધિવિવર્જિતઃ

નાર્મદીયોત્તરેકૂલે તીર્થં પરમશોભનમ્ ।
આદિત્યાયતનં રમ્યમીશ્વરેણ તુ ભાવિતમ્

તત્ર સ્નાત્વા તુ રાજેંદ્ર દાનં દત્વા ચ શક્તિતઃ ।
તસ્ય તીર્થપ્રભાવેણ દત્તં ભવતિ ચાક્ષયમ્

દરિદ્રા વ્યાધિતા યે તુ યે ચ દુષ્કૃતકર્મણઃ ।
મુચ્યંતે સર્વપાપેભ્યઃ સૂર્યલોકં પ્રયાંતિ ચ

માઘમાસે તુ સંપ્રાપ્તે શુક્લપક્ષસ્ય સપ્તમીમ્ ।
વસેદાયતને યસ્તુ નિરાત્મા યો જિતેંદ્રિયઃ

ન જાયતે વ્યાધિતશ્ચ કાલેંધો બધિરસ્તથા ।
સુભગો રૂપસંપન્નઃ સ્ત્રીણાં ભવતિ વલ્લભઃ

ઇદં તીર્થં મહાપુણ્યં માર્કંડેયેન ભાષિતમ્ ।
યે પ્રયાંતિ ન રાજેંદ્ર વંચિતાસ્તે ન સંશયઃ

માસેશ્વરં તતો ગચ્છેત્સ્નાનં તત્ર સમાચરેત્ ।
સ્નાતમાત્રો નરસ્તત્ર સ્વર્ગલોકમવાપ્નુયાત્

મોદતે સર્વલોકસ્થો યાવદિંદ્રાશ્ચતુર્દશ ।
તતઃ સમીપતઃ સ્થિત્વા નાગેશ્વરં તપોવનમ્

તત્ર સ્નાત્વા તુ રાજેંદ્ર શુચિર્ભૂત્વા સમાહિતઃ ।
બહુભિર્નાગકન્યાભિઃ ક્રીડતે કાલમક્ષયમ્

કુબેરભવનં ગચ્છેત્કુબેરો યત્ર સંસ્થિતઃ ।
કાલેશ્વરં પરં તીર્થં કુબેરો યત્ર તોષિતઃ

યત્ર સ્નાત્વા તુ રાજેંદ્ર સર્વસંપદમાપ્નુયાત્ ।
તતઃ પશ્ચિમતો ગચ્છેન્મરુતાલયમુત્તમમ્

તત્ર સ્નાત્વા તુ રાજેંદ્ર શુચિર્ભૂત્વા સમાહિતઃ ।
કાંચનં તુ તતો દદ્યાદન્નશક્ત્યા તુ બુદ્ધિમાન્

પુષ્પકેણ વિમાનેન વાયુલોકં સ ગચ્છતિ ।
મમ તીર્થં તતો ગચ્છેન્માઘમાસે યુધિષ્ઠિર

કૃષ્ણપક્ષે ચતુર્દશ્યાં સ્નાનં તત્ર સમાચરેત્ ।
નક્તં ભોજ્યં તતઃ કુર્યાન્ન ગચ્છેદ્યોનિસંકટમ્

અહલ્યાતીર્થં તતો ગચ્છેત્સ્નાનં તત્ર સમાચરેત્ ।
સ્નાતમાત્રો નરસ્તત્ર અપ્સરોભિઃ પ્રમોદતે

પારમેશ્વરે તપસ્તપ્ત્વા અહલ્યા મુક્તિમાગમત્ ।
ચૈત્રમાસે તુ સંપ્રાપ્તે શુક્લપક્ષે ત્રયોદશી

કામદેવદિને તસ્મિન્નહલ્યાં તુ પ્રપૂજયેત્ ।
યત્ર તત્ર સમુત્પન્નો નરસ્તત્ર પ્રિયો ભવેત્

સ્ત્રીવલ્લભો ભવેચ્છ્રીમાન્કામદેવ ઇવાપરઃ ।
અયોધ્યાં તુ સમાસાદ્ય તીર્થં શક્રસ્ય વિશ્રુતમ્

સ્નાતમાત્રો નરસ્તત્ર ગોસહસ્ર ફલં લભેત્ ।
સોમતીર્થં તતો ગચ્છેત્સ્નાનમાત્રં સમાચરેત્

સ્નાતમાત્રો નરસ્તત્ર સર્વપાપૈઃ પ્રમુચ્યતે ।
સોમગ્રહે તુ રાજેંદ્ર પાપક્ષયકરં ભવેત્

ત્રૈલોક્યવિશ્રુતં રાજન્સોમતીર્થં મહાફલમ્ ।
યસ્તુ ચાંદ્રાયણં કુર્યાત્તસ્મિંસ્તીર્થે નરાધિપ

સર્વપાપવિશુદ્ધાત્મા સોમલોકં સ ગચ્છતિ ।
અગ્નિપ્રવેશે તુ જલેપ્યથવાપિ હ્યનાશને

સોમતીર્થે મૃતો યસ્તુ નાસૌ મર્ત્યેભિજાયતે ।
સ્તંભતીર્થં તતો ગચ્છેત્સ્નાનં તત્ર સમાચરેત્

સ્નાતમાત્રો નરસ્તત્ર સોમલોકે મહીયતે ।
તતો ગચ્છેત રાજેંદ્ર વિષ્ણુતીર્થમનુત્તમમ્

યોધનીપુરવિખ્યાતં વિષ્ણુતીર્થમનુત્તમમ્ ।
અસુરા યોધિતાસ્તત્ર વાસુદેવેન કોટિશઃ

તત્ર તીર્થં સમુત્પન્નં વિષ્ણુઃ પ્રીતો ભવેદિહ ।
અહોરાત્રોપવાસેન બ્રહ્મહત્યાં વ્યપોહતિ

તતો ગચ્છેત્તુ રાજેંદ્ર તાપસેશ્વરમુત્તમમ્ ।
અમોહકમિતિ ખ્યાતં પિતૄન્યસ્તત્ર તર્પયેત્

પૌર્ણમાસ્યામમાવાસ્યાં શ્રાદ્ધં કુર્યાદ્યથાવિધિ ।
તત્ર સ્નાત્વા નરો રાજન્પિતૃપિંડં તુ દાપયેત્

ગજરૂપાઃ શિલાસ્તત્ર તોયમધ્યે પ્રતિષ્ઠિતાઃ ।
તસ્મિંસ્તુ દાપયેત્પિંડં વૈશાખે તુ વિશેષતઃ

તૃપ્યંતિ પિતરસ્તાવદ્યાવત્તિષ્ઠતિ મેદિની ।
તતો ગચ્છેત રાજેંદ્ર સિદ્ધેશ્વરમનુત્તમમ્

તત્ર ગત્વા તુ રાજેંદ્ર ગણપત્યંતિકં વ્રજેત્ ।
તતો ગચ્છેત રાજેંદ્ર લિંગો યત્ર જનાર્દનઃ

તત્ર સ્નાત્વા તુ રાજેંદ્ર વિષ્ણુલોકે મહીયતે ।
નર્મદાદક્ષિણેકૂલે તીર્થં પરમશોભનમ્

કામદેવઃ સ્વયં તત્ર તપસ્તપ્યત્યસૌ મહાન્ ।
દિવ્યં વર્ષસહસ્રં તુ શંકરં પર્યુપાસતે

સમાધિપર્વદગ્ધસ્તુ શંકરેણ મહાત્મના ।
શ્વેતપર્વોપમશ્ચૈવ હુતાશઃ શુક્લપર્વણિ

એતે દગ્ધાસ્તુ તે સર્વે કુસુમેશ્વરસંસ્થિતાઃ ।
દિવ્યવર્ષસહસ્રેણ તુષ્ટસ્તેષાં મહેશ્વરઃ

ઉમયા સહિતો રુદ્રસ્તેષાં તુષ્ટો વરપ્રદઃ ।
વિમોક્ષયિત્વા તાન્સર્વાન્નર્મ્મદાતટમાસ્થિતાન્

તસ્ય તીર્થપ્રભાવેણ પુનર્દેવત્વમાગતઃ ।
ત્વત્પ્રસાદાન્મહાદેવ તીર્થં ચ ભવતૂત્તમમ્

અર્ધયોજનવિસ્તીર્ણં તીર્થં દિક્ષુ સમંતતઃ ।
તસ્મિંસ્તીર્થે નરઃ સ્નાત્વા ઉપવાસપરાયણઃ

કુસુમાયુધરૂપેણ રુદ્રલોકે મહીયતે ।
વૈશ્વાનરે યમેનૈવ કામદેવેન વાયવે

તપસ્તપ્ત્વા તુ રાજેંદ્ર તત્રૈવ ચ પુરાગતૈઃ ।
અંધોનસ્ય સમીપે તુ નાતિદૂરે તુ તસ્ય વૈ

સ્નાનં દાનં ચ તત્રૈવ ભોજનં પિંડપાતનમ્ ।
અગ્નિવેશે જલે વાપિ અથવાપિ અનાશને

અનિવર્તિકા ગતિસ્તસ્ય મૃતસ્યાપ્યર્દ્ધયોજને ।
ત્રૈયંબકેણ તોયેન સ્નાપયેન્નરપુંગવઃ

અંધોનમૂલે દત્વા તુ પિંડં ચૈવ યથાવિધિ ।
પિતરસ્તસ્ય તૃપ્યંતિ યાવચ્ચંદ્ર દિવાકરૌ

ઉત્તરાયણે તુ સંપ્રાપ્તે તત્ર સ્નાનં કરોતિ યઃ ।
પુરુષો વાપિ સ્ત્રી વાપિ વસેદાયતને શુચિઃ

સિદ્ધેશ્વરસ્ય દેવસ્ય પ્રભાતે પૂજનાન્નરઃ ।
સ તાં ગતિમવાપ્નોતિ ન તાં સર્વૈર્મહામખૈઃ

યદા ચ તીર્થકાલેન રૂપવાન્સુભગો ભવેત્ ।
મર્ત્યે ભવતિ રાજાસાવાસમુદ્રાંતગોચરે

ક્ષેત્રપાલં ન પશ્યેચ્ચ દંડપાલં મહાબલમ્ ।
વૃથા તસ્ય ભવેદ્યાત્રા અદૃષ્ટ્વા કર્ણકુંડલમ્

એતત્તીર્થફલં જ્ઞાત્વા સર્વેદેવાઃ સમાગતાઃ ।
મુંચંતિ પુષ્પવૃષ્ટિં તુ સ્તુવંતિ કુસુમેશ્વરમ્

ઇતિ શ્રીપાદ્મેમહાપુરાણે સ્વર્ગખંડે અષ્ટાદશોઽધ્યાયઃ

ઇતિ શ્રીપાદ્મેમહાપુરાણે સ્વર્ગખંડે અષ્ટાદશોઽધ્યાયઃ