Padma Purana · Chapter 3.17

nārada uvāca-
uttare narmadākūle tīrthaṃ yojanavistṛtam /
patreśvareti vikhyātaṃ sarvapāpaharaṃ param

tatra snātvā naro rājandaivataiḥ saha modate /
paṃcavarṣasahasrāṇi krīḍate kāmarūpadhṛk

garjanaṃ tu tato gacchedyatra megha upasthitaḥ /
iṃdrajinnāma saṃprāptaṃ tasya tīrthaprabhāvataḥ

megharāvaṃ tato gacchedyatra meghābhigarjitam /
meghanādo gaṇastatra varasaṃpannatāṃ gataḥ

tato gaccheta rājeṃdra brahmāvartamiti smṛtam /
tatra saṃnihito brahmā nityameva yudhiṣṭhira

tatra snātvā tu rājeṃdra brahmaloke mahīyate /
tatoṃ'gāreśvare tīrthe niyato niyamāśanaḥ

sarvapāpaviśuddhātmā rudralokaṃ sa gacchati /
tato gaccheta rājeṃdra kapilātīrthamuttamam

tatra snātvā naro rājangopradānaphalaṃ labhet /
kāṃcītīrthaṃ tato gaccheddevarṣigaṇasevitam

tatra snātvā naro rājangolokaṃ samavāpnuyāt /
tato gacchettu rājeṃdra kuṃḍaleśvaramuttamam

tatra saṃnihito rudrastiṣṭhate umayā saha /
tatra snātvā tu rājeṃdra avadhyastridaśairapi

pippaleśvaraṃ tato gacchetsarvapāpapraṇāśanam /
tatra gatvā tu rājeṃdra rudraloke mahīyate

tato gacchettu rājeṃdra vimalaṃ vimaleśvaram /
tatra devaśikhā ramyā īśvareṇa nipātitā

tatra prāṇānparityajya rudralokamavāpnuyām /
tataḥ puṣkariṇīṃ gacchettatra snānaṃ samācaret

snānamātre narastatra iṃdrasyārddhāsanaṃ labhet /
narmadā saritāṃ śreṣṭhā rudradehādviniḥsṛtā

tārayetsarvabhūtāni sthāvarāṇi carāṇi ca /
sarvadevātidevena īśvareṇa mahātmanā

kathitā ṛṣisaṃghebhyo hyasmākaṃ ca viśeṣataḥ /
munibhiḥ saṃstutā hyeṣā narmadā pravarā nadī

rudradehādviniṣkrāṃtā lokānāṃ hitakāmyayā /
sarvapāpaharā nityaṃ sarvaprāṇinamaskṛtā

saṃstutā devagaṃdharvairapsarobhistathaiva ca /
namaḥ puṇyajale ādye namaḥ sāgaragāmini

namostu te ṛṣigaṇaiḥ śaṃkaradehaniḥsṛte /
namostu te dharmavṛte varānane namostu te devagaṇaikavaṃdite

namostu te sarvapavitrapāvane namostu te sarvajagatsupūjite /
yaścedaṃ paṭhate stotraṃ nityaṃ śuddhena mānavaḥ

brāhmaṇo vedamāpnoti kṣattriyo vijayī bhavet /
vaiśyastu labhate lābhaṃ śūdraścaiva śubhāṃ gatim

annārthī labhate hyannaṃ smaraṇādeva nityaśaḥ /
narmadāṃ sevyate nityaṃ svayaṃ devo maheśvaraḥ /
tena puṇyā nadī jñeyā brahmahatyāpahāriṇī

iti śrīpādme mahāpurāṇe svargakhaṃḍe saptadaśo'dhyāyaḥ