પદ્મ પુરાણ · અધ્યાય 3.13

યુધિષ્ઠિર ઉવાચ-
વસિષ્ઠેન દિલીપાય કથિતં તીર્થમુત્તમમ્ ।
નર્મદેતિ ચ વિખ્યાતં પાપપર્વતદારણમ્

ભૂયશ્ચ શ્રોતુમિચ્છામિ તન્મે કથય નારદ ।
નર્મદાયાશ્ચ માહાત્મ્યં વસિષ્ઠોક્તં દ્વિજોત્તમ

કથમેષા મહાપુણ્યા નદી સર્વત્ર વિશ્રુતા ।
નર્મદાનામ વિખ્યાતા તન્મમ બ્રૂહિનારદ

નારદ ઉવાચ-।
નર્મદા સરિતાં શ્રેષ્ઠા સર્વપાપપ્રણાશિની ।
તારયેત્સર્વભૂતાનિ સ્થાવરાણિ ચરાણિ ચ

નર્મદાયાસ્તુ માહાત્મ્યં વસિષ્ઠોક્તં મયા શ્રુતમ્ ।
તદેતદ્ધિ મહારાજ સર્વં હિ કથયામિ તે

પુણ્યા કનખલે ગઙ્ગા કુરુક્ષેત્રે સરસ્વતી ।
ગ્રામે વા યદિ વારણ્યે પુણ્યા સર્વત્ર નર્મ્મદા

ત્રિભિઃ સારસ્વતં તોયં સપ્તાહેન તુ યામુનમ્ ।
સદ્યઃ પુનાતિ ગાંગેયં દર્શનાદેવ નાર્મદમ્

કલિંગ દેશે પશ્ચાર્દ્ધે પર્વતેઽમરકંટકે ।
પુણ્યા ચ ત્રિષુ લોકેષુ રમણીયા મનોરમા

સદેવાસુરગંધર્વા ઋષયશ્ચ તપોધનાઃ ।
તપસ્તપ્ત્વા મહારાજ સિદ્ધિં ચ પરમાં ગતાઃ

તત્ર સ્નાત્વા મહારાજ નિયમસ્થો જિતેંદ્રિયઃ ।
ઉપોષ્ય રજનીમેકાં કુલાનાં તારયેચ્છતમ્

જનેશ્વરે નરઃ સ્નાત્વા પિંડં દત્વા યથાવિધિ ।
પિતરસ્તસ્ય તૃપ્યંતિ યાવદાભૂતસંપ્લવમ્

પર્વતસ્ય સમંતાત્તુ રુદ્રકોટિઃ પ્રતિષ્ઠિતા ।
સ્નાનં યઃ કુરુતે તત્ર ગંધમાલ્યાનુલેપનમ્

પ્રીતા તસ્ય ભવેત્સર્વા રુદ્રકોટિર્ન સંશયઃ ।
પર્વતે પશ્ચિમસ્યાંતે સ્વયં દેવો મહેશ્વરઃ

તત્ર સ્નાત્વા શુચિર્ભૂત્વા બ્રહ્મચારી જિતેંદ્રિયઃ ।
પિતૃકાર્યં તુ કુર્વીત વિધિદૃષ્ટેન કર્મણા

તિલોદકેન તત્રૈવ તર્પયેત્પિતૃદેવતાઃ ।
આસપ્તમં કુલં તસ્ય સ્વર્ગે તિષ્ઠતિ પાંડવ

ષષ્ટિવર્ષસહસ્રાણિ સ્વર્ગલોકે મહીયતે ।
અપ્સરોગણસંકીર્ણો દિવ્યસ્ત્રીપરિવારિતઃ

દિવ્યગંધાનુલિપ્તશ્ચ દિવ્યાલંકારભૂષિતઃ ।
તતઃ સ્વર્ગાત્પરિભ્રષ્ટો જાયતે વિપુલે કુલે

ધનવાન્દાનશીલશ્ચ ધાર્મિકશ્ચૈવ જાયતે ।
પુનઃ સ્મરતિ તત્તીર્થં ગમનં તત્ર કુર્વતે

તારયિત્વા કુલશતં રુદ્રલોકં સ ગચ્છતિ ।
યોજનાનાં શતં સાગ્રં શ્રૂયતે સરિદુત્તમા

વિસ્તારેણ તુ રાજેન્દ્ર યોજનદ્વયમંતરમ્ ।
ષષ્ટિતીર્થસહસ્રાણિ ષષ્ટિકોટ્યસ્તથૈવ ચ

પર્વતસ્ય સમંતાત્તુ તિષ્ઠંત્યમરકંટકે ।
બ્રહ્મચારી શુચિર્ભૂત્વા જિતક્રોધો જિતેંદ્રિયઃ

સર્વહિંસાનિવૃત્તશ્ચ સર્વભૂતહિતે રતઃ ।
એવં સર્વસમાચારઃ ક્ષેત્રપાલાન્પરિવ્રજેત્

તસ્ય પુણ્યફલં રાજન્શૃણુષ્વાવહિતો હિ મે ।
શતં વર્ષસહસ્રાણાં સ્વર્ગે મોદેત પાંડવ

અપ્સરોગણસંકીર્ણે દિવ્યસ્ત્રીપરિચારિતે ।
દિવ્યગંધાનુલિપ્તશ્ચ દિવ્યાલંકારભૂષિતઃ

ક્રીડતે દેવલોકે તુ દૈવતૈઃ સહ મોદતે ।
તતઃ સ્વર્ગાત્પરિભ્રષ્ટો રાજા ભવતિ વીર્યવાન્