પદ્મ પુરાણ · અધ્યાય 2.71

યયાતિરુવાચ-
યત્ત્વયા સર્વમાખ્યાતં ધર્માધર્મમનુત્તમમ્ ।
શૃણ્વતોઽથ મમ શ્રદ્ધા પુનરેવ પ્રવર્તતે

દેવાનાં લોકસંસ્થાનાં વદ સંખ્યાઃ પ્રકીર્તિતાઃ ।
યસ્ય પુણ્યપ્રસંગેન યેન પ્રાપ્તં ચ માતલે

માતલિરુવાચ-
યોગયુક્તં પ્રવક્ષ્યામિ તપસા યદુપાર્જિતમ્ ।
દેવાનાં લોકસંસ્થાનં સુખભોગપ્રદાયકમ્

ધર્મભાવં પ્રવક્ષ્યામિ આયાસૈરર્જિતં પૃથક્ ।
ઉપરિષ્ટાચ્ચ લોકાનાં સ્વરૂપં ચાપ્યનુક્રમાત્

તત્રાષ્ટગુણમૈશ્વર્યં પાર્થિવં પિશિતાશિનામ્ ।
તસ્માત્સદ્યો ગતાનાં ચ નરાણાં તત્સમં સ્મૃતમ્

રક્ષસાં ષોડશગુણં પાર્થિવાનાં ચ તદ્વિધમ્ ।
એવં નિરવશેષં ચ યચ્છેષં કુલતેજસામ્

ગંધર્વાણાં ચ વાયવ્યં યાક્ષં ચ સકલં સ્મૃતમ્ ।
પાંચભૌતિકમિંદ્રસ્ય ચત્વારિંશદ્ગુણં મહત્

સોમસ્ય માનસં દિવ્યં વિશ્વેશં પાંચભૌતિકમ્ ।
સૌમ્યં પ્રજાપતીશાનામહંકારગુણાધિકમ્

ચતુષ્ષષ્ટિગુણં બ્રાહ્મં બૌધમૈશ્વર્યમુત્તમમ્ ।
વિષ્ણોઃ પ્રાધાનિકં તંત્રમૈશ્વર્યં બ્રહ્મણઃ પદમ્

શ્રીમચ્છિવપુરે દિવ્યે ઐશ્વર્યં સર્વકામિકમ્ ।
અનંતગુણમૈશ્વર્યં શિવસ્યાત્મગુણં મહત્

આદિમધ્યાંતરહિતં વિશુદ્ધં તત્ત્વલક્ષણમ્ ।
સર્વાવભાસકં સૂક્ષ્મમનૌપમ્યં પરાત્પરમ્

સુસંપૂર્ણં જગદ્વેષં પશુપાશાવિમોક્ષણમ્ ।
યો યત્સ્થાનમનુપ્રાપ્તસ્તસ્ય ભોગસ્તદાત્મકઃ

વિમાનં તત્સમાનં ચ ભવેદીશપ્રસાદતઃ ।
નાનારૂપાણિ તારાણાં દૃશ્યંતે કોટયસ્ત્વિમા

અષ્ટવિંશતિરેવં તે સંદીપ્તાઃ સુકૃતાત્મનામ્ ।
યે કુર્વંતિ નમસ્કારમીશ્વરાય ક્વચિત્ક્વચિત્

સંપર્કાત્કૌતુકાલ્લોભાત્તદ્વિમાનં લભંતિ તે ।
નામસંકીર્તનાદ્વાપિ પ્રસંગેન શિવસ્ય યઃ

કુર્યાદ્વાપિ નમસ્કારં ન તસ્ય વિલયો ભવેત્ ।
ઇત્યેતા ગતયસ્તત્ર મહત્યઃ શિવકર્મણિ

કર્મણાભ્યંતરેણાપિ પુંસામીશાનભાવતઃ ।
પ્રસંગેનાપિ યે કુર્યુઃ શંકરસ્મરણં નરાઃ

તૈર્લભ્યં ત્વતુલં સૌખ્યં કિં પુનસ્તત્પરાયણૈઃ ।
વિષ્ણુચિંતાં પ્રકુર્વંતિ ધ્યાનેન ગતમાનસાઃ

તે યાંતિ પરમં સ્થાનં તદ્વિષ્ણોઃ પરમં પદમ્ ।
શૈવં ચ વૈષ્ણવં રૂપમેકરૂપં નરોત્તમ

દ્વયોશ્ચ અંતરં નાસ્તિ એકરૂપમહાત્મનોઃ ।
શિવાય વિષ્ણુરૂપાય શિવરૂપાય વિષ્ણવે

શિવસ્ય હૃદયં વિષ્ણુર્વિષ્ણોશ્ચ હૃદયં શિવઃ ।
એકમૂર્તિસ્ત્રયો દેવા બ્રહ્મવિષ્ણુમહેશ્વરાઃ

ત્રયાણામંતરં નાસ્તિ ગુણભેદાઃ પ્રકીર્તિતાઃ ।
શિવભક્તોસિ રાજેંદ્ર તથા ભાગવતોસિ વૈ

તેન દેવાઃ પ્રસન્નાસ્તે બ્રહ્મવિષ્ણુમહેશ્વરાઃ ।
સુપ્રીતા વરદા રાજન્કર્મણસ્તવ સુવ્રત

ઇંદ્રાદેશાત્સમાયાતઃ સન્નિધૌ તવ માનદ ।
ઐંદ્રમેનં પદં યાહિ પશ્ચાદ્બ્રાહ્મં મહેશ્વરમ્

વૈષ્ણવં ચ પ્રયાહિ ત્વં દાહપ્રલયવર્જિતમ્ ।
અનેનાપિ વિમાનેન દિવ્યેન સર્વગામિના

દિવ્યમૂર્તિરતો ભુંક્ષ્વ દિવ્યભોગાન્મનોરમાન્ ।
સમારુહ્ય વિમાનં ત્વં પુષ્પકં સુખગામિનમ્

સુકર્મોવાચ-
એવમુક્ત્વા દ્વિજશ્રેષ્ઠ મૌનવાન્માતલિસ્તદા ।
રાજાનં ધર્મતત્ત્વજ્ઞં યયાતિં નહુષાત્મજમ્

ઇતિ શ્રીપદ્મપુરાણે ભૂમિખંડે વેનોપાખ્યાને માતાપિતૃતીર્થવર્ણને યયાતિચરિત્રે એકસપ્તતિતમોઽધ્યાયઃ