પદ્મ પુરાણ · અધ્યાય 2.70

માતલિરુવાચ-
યમપીડાં પ્રવક્ષ્યામિ મહાતીવ્રાં સુદારુણામ્ ।
ભુંજંતિ પાપિનઃ સર્વે ક્રૂરાસ્તે બ્રહ્મઘાતકાઃ

ક્વચિત્પાપાઃ પ્રપચ્યંતે તીવ્રેણ કરિષાગ્નિના ।
ક્વચિત્સિંહૈર્વૃકૈર્વ્યાઘ્રૈર્દંશૈઃ કીટૈશ્ચ દારુણૈઃ

ક્વચિન્મહાજલૌકોભિઃ ક્વચિદાજગરૈઃ પુનઃ ।
મક્ષિકાભિશ્ચ રૌદ્રાભિઃ ક્વચિત્સર્પૈર્વિષોલ્બણૈઃ

મત્તમાતંગયૂથૈશ્ચ બલોત્કૃષ્ટૈઃ પ્રમાથિભિઃ ।
પંથાનમુલ્લિખદ્ભિશ્ચ તીક્ષ્ણશૃંગમહાવૃષૈઃ

મહાશૃંગૈશ્ચ મહિષૈર્દુષ્ટગાત્રપ્રબાધકૈઃ ।
ડાકિનીભિશ્ચ રૌદ્રાભિર્વિકરાલૈશ્ચ રાક્ષસૈઃ

વ્યાધિભિશ્ચ મહાઘોરૈઃ પીડ્યમાના વ્રજંતિ તે ।
મહાતુલાં સમારૂઢા દહ્યમાના દવાનલે

મહાવેગપ્રધૂતાસ્તે મહાચંડેન વાયુના ।
મહાપાષાણવર્ષેણ ભિદ્યમાનાશ્ચ સર્વતઃ

પતદ્ભિર્વજ્રનિર્ઘોષૈરુલ્કાપાતૈશ્ચ દારુણૈઃ ।
પ્રદીપ્તાંગારવર્ષેણ હન્યમાના વ્રજંતિ તે

મહતા પાંસુવર્ષેણ પૂર્યમાણા યમં ગતાઃ ।
યે નરાઃ પાપકર્માણઃ પાપં ભુંજંતિ દારુણમ્

એવં પાપવિશેષેણ પાપિષ્ઠાઃ પાપકારકાઃ ।
નરકં પ્રતિભુંજંતિ બહુપીડાસમાકુલમ્

એતત્તે સર્વમાખ્યાતં વિવેકં પુણ્યપાપયોઃ ।
અન્યત્કિં તે પ્રવક્ષ્યામિ ધર્મશાસ્ત્રમનુત્તમમ્

ઇતિ શ્રીપદ્મપુરાણે ભૂમિખંડે વેનોપાખ્યાને પિતૃતીર્થવર્ણને યયાતિચરિતે સપ્તતિતમોઽધ્યાયઃ