Padma Purana · Chapter 2.71

yayātiruvāca-
yattvayā sarvamākhyātaṃ dharmādharmamanuttamam /
śṛṇvato'tha mama śraddhā punareva pravartate

devānāṃ lokasaṃsthānāṃ vada saṃkhyāḥ prakīrtitāḥ /
yasya puṇyaprasaṃgena yena prāptaṃ ca mātale

mātaliruvāca-
yogayuktaṃ pravakṣyāmi tapasā yadupārjitam /
devānāṃ lokasaṃsthānaṃ sukhabhogapradāyakam

dharmabhāvaṃ pravakṣyāmi āyāsairarjitaṃ pṛthak /
upariṣṭācca lokānāṃ svarūpaṃ cāpyanukramāt

tatrāṣṭaguṇamaiśvaryaṃ pārthivaṃ piśitāśinām /
tasmātsadyo gatānāṃ ca narāṇāṃ tatsamaṃ smṛtam

rakṣasāṃ ṣoḍaśaguṇaṃ pārthivānāṃ ca tadvidham /
evaṃ niravaśeṣaṃ ca yaccheṣaṃ kulatejasām

gaṃdharvāṇāṃ ca vāyavyaṃ yākṣaṃ ca sakalaṃ smṛtam /
pāṃcabhautikamiṃdrasya catvāriṃśadguṇaṃ mahat

somasya mānasaṃ divyaṃ viśveśaṃ pāṃcabhautikam /
saumyaṃ prajāpatīśānāmahaṃkāraguṇādhikam

catuṣṣaṣṭiguṇaṃ brāhmaṃ baudhamaiśvaryamuttamam /
viṣṇoḥ prādhānikaṃ taṃtramaiśvaryaṃ brahmaṇaḥ padam

śrīmacchivapure divye aiśvaryaṃ sarvakāmikam /
anaṃtaguṇamaiśvaryaṃ śivasyātmaguṇaṃ mahat

ādimadhyāṃtarahitaṃ viśuddhaṃ tattvalakṣaṇam /
sarvāvabhāsakaṃ sūkṣmamanaupamyaṃ parātparam

susaṃpūrṇaṃ jagadveṣaṃ paśupāśāvimokṣaṇam /
yo yatsthānamanuprāptastasya bhogastadātmakaḥ

vimānaṃ tatsamānaṃ ca bhavedīśaprasādataḥ /
nānārūpāṇi tārāṇāṃ dṛśyaṃte koṭayastvimā

aṣṭaviṃśatirevaṃ te saṃdīptāḥ sukṛtātmanām /
ye kurvaṃti namaskāramīśvarāya kvacitkvacit

saṃparkātkautukāllobhāttadvimānaṃ labhaṃti te /
nāmasaṃkīrtanādvāpi prasaṃgena śivasya yaḥ

kuryādvāpi namaskāraṃ na tasya vilayo bhavet /
ityetā gatayastatra mahatyaḥ śivakarmaṇi

karmaṇābhyaṃtareṇāpi puṃsāmīśānabhāvataḥ /
prasaṃgenāpi ye kuryuḥ śaṃkarasmaraṇaṃ narāḥ

tairlabhyaṃ tvatulaṃ saukhyaṃ kiṃ punastatparāyaṇaiḥ /
viṣṇuciṃtāṃ prakurvaṃti dhyānena gatamānasāḥ

te yāṃti paramaṃ sthānaṃ tadviṣṇoḥ paramaṃ padam /
śaivaṃ ca vaiṣṇavaṃ rūpamekarūpaṃ narottama

dvayośca aṃtaraṃ nāsti ekarūpamahātmanoḥ /
śivāya viṣṇurūpāya śivarūpāya viṣṇave

śivasya hṛdayaṃ viṣṇurviṣṇośca hṛdayaṃ śivaḥ /
ekamūrtistrayo devā brahmaviṣṇumaheśvarāḥ

trayāṇāmaṃtaraṃ nāsti guṇabhedāḥ prakīrtitāḥ /
śivabhaktosi rājeṃdra tathā bhāgavatosi vai

tena devāḥ prasannāste brahmaviṣṇumaheśvarāḥ /
suprītā varadā rājankarmaṇastava suvrata

iṃdrādeśātsamāyātaḥ sannidhau tava mānada /
aiṃdramenaṃ padaṃ yāhi paścādbrāhmaṃ maheśvaram

vaiṣṇavaṃ ca prayāhi tvaṃ dāhapralayavarjitam /
anenāpi vimānena divyena sarvagāminā

divyamūrtirato bhuṃkṣva divyabhogānmanoramān /
samāruhya vimānaṃ tvaṃ puṣpakaṃ sukhagāminam

sukarmovāca-
evamuktvā dvijaśreṣṭha maunavānmātalistadā /
rājānaṃ dharmatattvajñaṃ yayātiṃ nahuṣātmajam

iti śrīpadmapurāṇe bhūmikhaṃḍe venopākhyāne mātāpitṛtīrthavarṇane yayāticaritre ekasaptatitamo'dhyāyaḥ