પદ્મ પુરાણ · અધ્યાય 2.106

કુંજલ ઉવાચ-
આયુભાર્યા મહાભાગા સ્વર્ભાનોસ્તનયા સુતમ્ ।
અપશ્યંતી સુબાલં તં દેવોપમમનૌપમમ્

હાહાકારં મહત્કૃત્વા રુરોદ વરવર્ણિની ।
કેન મે લક્ષણોપેતો હૃતો બાલઃ સુલક્ષણઃ

તપસા દાનયજ્ઞૈશ્ચ નિયમૈર્દુષ્કરૈઃ સુતઃ ।
સંપ્રાપ્તો હિ મયા વત્સ કષ્ટૈશ્ચ દારુણૈઃ પુનઃ

દત્તાત્રેયેણ પુણ્યેન સંતુષ્ટેન મહાત્મના ।
દત્તઃ પુત્રો હૃતઃ કેન રુરોદ કરુણાન્વિતા

હા પુત્ર વત્સ મે તાત હા બાલગુણમંદિર ।
ક્વાસિ કેનાપનીતોસિ મમ શબ્દઃ પ્રદીયતામ્

સોમવંશસ્ય સર્વસ્ય ભૂષણોસિ ન સંશયઃ ।
કેન ત્વમપનીતોસિ મમ પ્રાણૈઃ સમન્વિતઃ

રાજસુલક્ષણૈર્દિવ્યૈઃ સંપૂર્ણઃ કમલેક્ષણઃ ।
કેનાદ્યાપહૃતો વત્સઃ કિં કરોમિ ક્વ યામ્યહમ્

સ્ફુટં જાનામ્યહં કર્મ હ્યન્યજન્મનિ યત્કૃતમ્ ।
ન્યાસનાશઃ કૃતઃ કસ્ય તસ્માત્પુત્રો હૃતો મમ

કિં વા છલં કૃતં કસ્ય પૂર્વજન્મનિ પાપયા ।
કર્મણસ્તસ્ય વૈ દુઃખમનુભુંજામિ નાન્યથા

રત્નાપહારિણી જાતા પુત્રરત્નં હૃતં મમ ।
તસ્માદ્દૈવેન મે દિવ્ય અનૌપમ્ય ગુણાકરઃ

કિં વા વિતર્કિતો વિપ્રઃ કર્મણસ્તસ્ય વૈ ફલમ્ ।
પ્રાપ્તં મયા ન સંદેહઃ પુત્રશોકાન્વિતં ભૃશમ્

કિં વા શિશુવિરોધશ્ચ કૃતો જન્માંતરે મયા ।
તસ્ય પાપસ્ય ભુંજામિ કર્મણઃ ફલમીદૃશમ્

યાચમાનસ્ય ચૈવાગ્રે વૈશ્વદેવસ્ય કર્મણઃ ।
કિં વાપિ નાર્પિતં ચાન્નં વ્યાહૃતીભિર્હુતં દ્વિજૈઃ

એવં સુદેવમાનાચ્ચ સ્વર્ભાનોસ્તનયા તદા ।
ઇંદુમતી મહાભાગ શોકેન કરુણાકુલા

પતિતા મૂર્ચ્છિતા શોકાદ્વિહ્વલત્વં ગતા સતી ।
નિઃશ્વાસાન્મુંચમાના સા વત્સહીના યથા હિ ગૌઃ

આયૂ રાજા સ શોકેન દુઃખેન મહતાન્વિતઃ ।
બાલં શ્રુત્વા હૃતં તં તુ ધૈર્યં તત્યાજ પાર્થિવઃ

તપસશ્ચ ફલં નાસ્તિ નાસ્તિ દાનસ્ય વૈ ફલમ્ ।
યસ્માદેવં હૃતઃ પુત્રસ્તસ્માન્નાસ્તિ ન સંશયઃ

દત્તાત્રેયઃ પ્રસાદેન વરં મે દત્તવાન્પુરા ।
અજેયં ચ જયોપેતં પુત્રં સર્વગુણાન્વિતમ્

તસ્ય વરપ્રદાનસ્ય કથં વિઘ્નો હ્યજાયત ।
ઇતિ ચિંતાપરો રાજા દુઃખિતઃ પ્રારુદદ્ભૃશમ્

ઇતિ શ્રીપદ્મપુરાણે ભૂમિખંડે વેનોપાખ્યાને ગુરુતીર્થમાહાત્મ્યે ચ્યવનચરિત્રે નાહુષાખ્યાને ષડધિકશતતમોઽધ્યાયઃ