નવસાહસાઙ્કચરિત · અધ્યાય 7

તતઃ સ દૂરાદ્ અહિરાજકન્યકાં જવૈકમિત્રેણા યુતાં પતત્રિણા
વિશામ્પતિદીર્ઘગુણાનુષઙ્ગિણીમ્ અનઙ્ગકોદણ્ડલતામ્ ઇવૈક્ષત ॥

ઉપોઢલાવણ્યતરઙ્ગભઙ્ગયા સરાગબિમ્બૌષ્ઠગલત્પ્રવાલયા
અહારિ લોલં નૃપતેસ્ તયા બલાત્ અનઙ્ગરત્નાકરવેલયા મનઃ ॥

સવિસ્મયો લોચનમાર્ગમ્ આપ્તયા તયા સઃ પાતાલતલેન્દુલેખયા
અથેત્થમ્ અમ્લાનમનોરથોદ્ગમો રમાઙ્ગદેનાભિદધે નરાધિપઃ ॥

અવૈમિ સૈવેયમ્ અમોઘમ્ આયુધં મનોભુવઃ પન્નગરાજકન્યકા
ઉદંશુલેખેન મુખેન કુર્વતી જગદ્ વિલીનેન્દુવિલોકનસ્પૃહમ્ ॥

નરેન્દ્ર સત્યં સઃ કુતૂહલી ભવેદ્ અલૌકિકં રૂપમ્ અવેક્ષિતું રતેઃ
ઇયં ન યસ્યાતિથિતાં ગતા દૃશોર્ અગાધલાવણ્યસરિત્ સુમધ્યમા ॥

ઇયં સુધા મુગ્ધવિલાસજન્મભૂર્ ઇયં ભુજઙ્ગાલયરત્નદીપિકા
ઇયં જગન્નેત્રચકોરચન્દ્રિકા પુરઃ પતાકેયમ્ અયુગ્મપત્રિણઃ ॥

ઇયત્તયા મુક્તમ્ અવૈમિ નૈપુણં પ્રજાપતેર્ અદ્ભુતશિલ્પકર્મણિ
નૃપોપમાનામ્ ઉપમાનતાં ગતં વિનિર્મિતં યેન હિ રત્નમ્ ઈદૃશમ્ ॥

ઇયં તવાનેન વિરાજતેતરાં કરસ્થિતેનાવનિપાલપત્રિણા
ઉપેયુષા કાઞ્ચનપદ્મમ્ અંશુના હિમેતરાંશોર્ ઇવ જહ્નુકન્યકા ॥

અરાલકેશીયમ્ અનેન ભાતિ તે શરેણ કાર્તસ્વરપુઙ્ખશોભિના
નિસર્ગગૌરેણ નરેન્દ્રરશ્મિના સકજ્જલા દીપશિખેવ શાર્વરી ॥

ઇયં વિલાસોર્મિનિમગ્નશૈશવં સ્વિભાવ્યમાનસ્તનકુડ્મલોદ્ગમમ્
મદૈકવિસ્રમ્ભગૃહં વિગાહતે વયો વિભક્તાઙ્ગમ્ અનઙ્ગદોહદમ્ ॥

ઇયં નતાઙ્ગી જગદેકસુન્દરે નિદેશિતે પાટલયા નૃપ ત્વયિ
દૃશૌ નવેન્દીવરપત્રપેશલે વિમુઞ્ચતિ શ્રીર્ ઇવ શાર્ઙ્ગધન્વનિ ॥

અનઙ્ગસામ્રાજ્યવિલાસચામરે વનાનિલવ્યાકુલિતે ઽંસુચુમ્બિનિ
પરિશ્લથે સંયમનાર્થમ્ એતયા સલીલમ્ અસ્તઃ કબરીભરે કરઃ ॥

વિલોકયન્તી કુસુમં કચાગ્રતશ્ ચ્યુતં કુચસ્પર્શધિયેવ વક્ષસિ
ઇયં કૃશાઙ્ગી કુસુમાસ્ત્રશઙ્કયા કૃતપ્રણામેવ તવાવલોક્યતે ॥

વિલોકયાસ્યાઃ ક્ષિતિપાલ બિભ્રતીં પ્રદીપશોભાં કબરીં નિશામુખે
અમી મુહુઃ કુઙ્કુમકેસરારુણા લસન્તિ સીમન્તમણેર્ મરીચયઃ ॥

વિરાજતે ઽસ્યાસ્ તિલકો ઽયમ્ અઞ્ચિતો વિકુઞ્ચિતભ્રૂલતિકાન્તરે નૃપ
વિજિત્ય લોકદ્વિતયં દિવં પ્રતિ સ્મરેણ બાણો ધનુષીવ સંહિતઃ ॥

અપાઙ્ગસંવર્ધિતશોણકાન્તિના સુકૃષ્ણતારેણ તુષારપાણ્ડુના
ઇયં પ્રવાલાસિતરત્નમૌક્તિકૈર્ વિનિર્મિતેનેવ ચકાસ્તિ ચક્ષુષા ॥

ઇયં પુરો નિર્યતિદૂરમ્ આયતે કપોલતઃ કાઞ્ચનકુણ્ડલાર્ચિષિ
ઇષું રુષેવ પ્રતિભોક્તુમ્ ઉદ્યતા મનોભુવે મુક્તશિલીમુખે હૃદિ ॥

ઇયં ત્રિયામાપતિકાન્તિપેશલં વિબુદ્ધબન્ધૂકદલાધિકત્વિષા
બિભર્તિ બિમ્બાધરમુદ્રયા મુખં મનોભિરામં રજનીવ સન્ધ્યયા ॥

ઉપોઢતારાપતિતારહારયોર્ ઇયં યુગેન સ્તનયોર્ વિરાજતે
દ્વયેન દેવ ઉષસિ ચક્રવાકયોઃ સરિદ્ગૃહીતૈકમૃણાલયોર્ ઇવ ॥

સુરાપગાવીચિવિપાણ્ડુર્ એષ તે ચિરેણ હારશ્ ચરિતાર્થતાં ગતઃ
ધૃતઃ ક્ષિતીશ પ્રણયાર્દ્રયાનયા સલીલમ્ ઉત્કમ્પિનિ યત્ કુચદ્વયે ॥

ઇયં મહીપાલ વિલોકિતેન તે વિગાહતે કાન્તમ્ ઇદં દશાન્તરમ્
ભવત્ય્ અનારૂઢવિકાસવિભ્રમા કિમ્ ઉદ્ગમે ચન્દ્રમસઃ કુમુદ્વતી ॥

કિમ્ અન્યદ્ ઉક્તં સુધયેવ સાન્દ્રયા તદ્ અન્યથા નાથ ન પાટલવચઃ
સ્ફુટેયમ્ અસ્યાઃ કુરુતે યદ્ અઙ્ગકે બલાત્ પરિષ્વઙ્ગમ્ અનઙ્ગવિક્રિયા ॥

ઇતીઙ્ગિતજ્ઞે વદતિ પ્રિયંવદે રમાઙ્ગદેન સ્મિતમ્ ઉદ્ગતસ્મિતઃ
અવાપ પર્યાપ્તશશાઙ્કદર્શનઃ ફનીન્દ્રકન્યાસવિધં નરાધિપઃ ॥

ઉવાહ લજ્જાનતમ્ અઞ્ચિતાલકં તતો ભુજઙ્ગાધિપતેઃ સુતામુખં
અવાઞ્ચિતં કિં ચન માતરિશ્વના સષટ્પદં પદ્મમ્ ઇવારવિન્દિની ॥

પતત્ય્ અધઃ કુઙ્કુમપઙ્કપાટલે મયૂખલેખાપટલે શિખામણેઃ
હ્રિયેવ રક્તાંશુકપલ્લવસ્ તયા પિધાતુમ્ આલેખ્યનૃપે ન્યધીયત ॥

નૃપસ્ય ચિત્રે મધુરેયમ્ આકૃતિર્ ન ભિદ્યતે ચન્દ્રમસો યથામ્ભસિ
સખીજનસ્ તામ્ ઇતિ નર્મપેશલઃ શનૈસ્ ત્રપાનમ્રમુખીમ્ અભાષત ॥

યથાસ્મિ વક્તાસિ તથાસ્ય ભૂપતેર્ યદા પુનઃ કર્ણસમીપમ્ આપ્સ્યસિ
ઇતીવ નિર્વ્યાજમ્ ઉદીર્ય તત્યજે તયાયતાક્ષ્યા સ નરેન્દ્રસાયકઃ ॥

અલં હ્રિયૈવં સમુપેક્ષ્ય ગૃહ્યતામ્ અયં હિ પાણિગ્રહણોચિતસ્ તવ
ઇતીરયન્ત્યાઃ કુટિલં વચઃ કરાદ્ અનઙ્ગવત્યાઃ કમલં જહાર સા ॥

અથ સ્વબિમ્બાધરપાટલચ્છદં કરેણ તત્તત્સદૃશેન બિભ્રતી
નિષેવિતુમ્ ભૂપતિમ્ અભ્યુપાગતા રમેવ રાજીવમુખી રરાજ સા ॥

દૃશસ્ તતસ્ તત્પરિવારયોષિતાં નેત્રાઞ્જનશ્યામલપક્ષ્મરાજયઃ
શશિપ્રભે ભૂમિપતૌ સકૌતુકાઃ સમાપતન્ કુન્દ ઇવાલિપઙ્ક્તયઃ ॥

નિપીયમાનસ્ય તયા શનૈઃશનૈર્ અપાઙ્ગસઞ્ચારિતદીર્ઘનેત્રયા
ઉપાત્તપુષ્પઃ ક્ષિતિભર્તુર્ અર્હણાં ચકાર તસ્યાશ્ ચતુરઃ સખીજનઃ ॥

પુરઃ શિરસ્ય્ આહિતમન્મથાજ્ઞયા તયા કટાક્ષૈઃ કુટજૈર્ ઇવાર્ચિતઃ
નૃપઃ સપર્યાં પુનરુક્તસંવિદાં સસ્ તદ્વયસ્યાનિહિતાવ્ અમન્યત ॥

સરાગવત્ય્ ઉત્કલિકાભિર્ આકુલે મૃદુન્ય્ અલં પાટલયા સમર્પિતે
અથ ન્યષીદન્નવપલ્લવાસને ફનીન્દ્રકન્યામનસીવ પાર્થિવઃ ॥

અનુ ક્ષિતીશં નલિનીદલાસને કયા ચિદ્ આસ્તે પરિવારયોષિતા
રમાઙ્ગદો ઽપ્ય્ આસનબન્ધમ્ આદદે વસુન્ધરાયાં વિનયૈકબન્ધુઃ ॥

શ્રમાનુરોધાદ્ ઉપવિશ્યતામ્ ઇતઃ ક્ષણં કૃશાઙ્ગીતિ સખીભિર્ અર્થિતા
ઉપાવિશદ્ વેપિતવામનસ્તની તતઃ સમં તાભિર્ અહીન્દ્રકન્યકા ॥

વિવર્તયન્તી વદનેન્દુમણ્ડલં વિશાલનેત્રાન્તનિષક્તતારકમ્
દ્વયેન સા કૃષ્યત સુન્દરી સમં હ્રિયા નૃપાલોકનકૌતુકેન ચ ॥

અથાવતંસીકૃતલોચનોત્પલં કપોલદોલાયિતરત્નકુણ્ડલમ્
ચિરં પપૌ સઃ સ્તિમિતેન ચક્ષુષા તદાનનં માલવમીનકેતનઃ ॥

કૃતી દૃશાસ્યાઃ સુદૃશઃ પિબત્ય્ અયં કપોલલાવણ્યસુધાં નરાધિપઃ
મિથઃ સખીનામ્ ઇતિ સસ્મિતં વચો નિશમ્ય સાભૂદ્ અધિકાધિકત્રપા ॥

મનાગ્ ઇવાંસાદ્ અપવર્તિતાનના નિરીક્ષ્ય તં ભૂપતિમ્ અર્પિતેક્ષણમ્
વિહસ્ય લજ્જામુકુલે ચકર્ષ સા બલાદ્ અપાઙ્ગપ્રસૃતે વિલોચને ॥

યશોભટે રૂપમ્ અવન્તિશસિતુઃ કૃતસ્મિતે ચિત્રગતં પ્રશંસતિ
કરસ્થિતં સા ઝટિતિ ન્યધાત્ તતઃ શિલાતલે તામરસં ત્રપાવતી ॥

નિકામમ્ ઉક્તં સુકુમારમ્ અઙ્ગના વિલાસિનસ્ તસ્ય જહાર સા મનઃ
સ્મરૈકદૂતીસહકારશાખિનો લસન્મધાવ્ અન્યભૃતેવ પલ્લવમ્ ॥

તદીયમ્ ઉદ્દામરસોર્મિનિર્ભરં સ રાજહંસો ઽપિ વિવેશ માનસમ્
કૃતપ્રવેશશ્ ચ સલીલમ્ અચ્છિનન્ મનાઙ્ મૃણાલીમ્ ઇવ ધીરતામ્ અતઃ ॥

ક્ષણાદ્ અપાઙ્ગસ્તિમિતાયતાક્ષયોઃ સકમ્પયોઃ કણ્ટકિતાઙ્ગલેખયોઃ
અવાપદ્ અન્યોન્યનિબદ્ધભાવયોસ્ તયોઃ પ્રરોહં હૃદિ બાલમન્મથઃ ॥

અસૂયયેવાથ વિમુઞ્ચતી દૃશં સખીષુ સા સૂત્રિતનર્મસૂક્તિષુ
ઇતિ સ્મિતક્ષાલિતદન્તવાસસા નૃપેણ નાગેન્દ્રસુતાભ્યધીયત ॥

વદાનવદ્યાઙ્ગિ સખીજનાદૃતઃ કિમ્ એષ નામ વ્યતિરિચ્યતે જનઃ
વિહાય વિસ્રમ્ભવિશેષમ્ એતયા યદ્ અઙ્ગમ્ અન્તો વિશતીવ લજ્જયા ॥

સદા સદાચારપરેતિ વાર્તયા વયં હૃતાઃ પન્નગરાજપુત્રિ તે
અતઃ કિમ્ એવં પ્રતિપત્તિમૂઢતાં વિગાહસે ઽસ્માસુ વિમુચ્યતામ્ ઇયમ્ ॥

અનેન તે સુન્દરિ દર્શનેન વા કૃતોપચારો ઽસ્મિ કિયત્ કદર્થ્યસે
ન વીક્ષતે વલ્ગુ ન મઞ્જુ ભાષતે ગતા ક્વચિલ્ લોચનવર્ત્મમાલતી ॥

અધઃકૃતાઃ સત્યમ્ અધીરલોચને રસાતલેન ત્રિદિવસ્ય ભૂમયઃ
અનઙ્ગદુર્વારશરાધિદૈવતં ભવદ્વિધં રત્નમ્ અવાપ્યતે ઽત્ર યત્ ॥

કુતૂહલાધ્યાસિતમધ્યલોકયા ત્વયા મુહૂર્તં ફણિલોકકૌમુદિ
અવૈમિ પાતાલમ્ અવાપ્તસન્ધિના વિલઙ્ઘ્યતે સન્તમસેન સમ્પ્રતિ ॥

ઇદં મૃણાલદ્ અપિ કોમલં વપુસ્ તવૈષ દૂરાદ્ અરવિન્દિનીપતિઃ
પુનઃ પુનઃ સંસ્પૃશતીવ કૌતુકાત્ તમાલગુલ્માન્તરપાતિભિઃ કરૈઃ ॥

અનેન તે સશ્રમવારિબિન્દુના નવીનપીયૂષતુષારદન્તુરઃ
શિરીષમૃદ્વઙ્ગિ તુષારપાણ્ડુના કપોલબિમ્બેન વિડમ્બ્યતે શાશી ॥

ઇદં વદાશિક્ષત કૈતવં કુતસ્ તવૈષ મુગ્ધે સરલાઙ્ગુલિઃ કરઃ
ઇહૈતદ્ આલિખ્ય શિલાતલે શનૈર્ અનેન લીલાકમલં યદ્ ઉજ્ઝિતમ્ ॥

ન ચિત્રમ્ એવં ક્વ ચિદ્ અસ્તિ ભૂતલે મમાત્ર તેનાસ્તિ કુતૂહલં મહત્
અતઃ કિમ્ એતત્ પિહિતં પ્રકાશ્યતામ્ અહેતુકસ્ તન્વિ ક એષ મત્સરઃ ॥

અદૃશ્યમ્ એતદ્ યદિ મન્યસે તતઃ કિમ્ અર્થ્યસે કિં ત્વ્ ઇયદ્ એવ શંસો નઃ
કૃતી ત્વયાયં ભુજગામ્બરૌકસામ્ અલેખિ ચિત્રે કતમઃ કૃશોદરિ ॥

લતેવ સમ્મીલિતષટ્પદસ્વના કિયચ્ ચિરં નિર્વચનૈવ તિષ્ઠસિ
ઇતશ્ ચકોરાક્ષિ વિચિન્ત્ય સૂનૃતં મમોત્તરં કિં ચન દાતુમ્ અર્હસિ ॥

યથાતિજિહ્રેષિ યથાતિવેપસે યથા કપોલે પુલકં બિભર્ષિ ચ
તથાત્ર મન્યે તવ પક્ષપાતવન્ નિતાન્તમ્ અન્તઃકરણં કૃશોદરિ ॥

હ્રિયે તવેયં યદિ કલ્પતે કથા કિમ્ એતયા નઃ પ્રકૃતે યતામહે
યદ્ અર્થમ્ એતે વયમ્ આગતાઃ સ્વયં સ નાર્પ્યતે કિં કરભોરુ સાયકઃ ॥

સલીલમ્ એવં વદતિ સ્મિતાનને નૃપે નવપ્રેમસાર્દ્રચેતસિ
વિવર્તયન્તી મણિકઙ્કણં કરે મુમોચ મૌનં ન ફણીન્દ્રકન્યકા ॥

તયા તથા દૃષ્ટમ્ અથાન્તરાન્તરા કટાક્ષકાન્તિઃ સ્નપિતાવતંસયા
ઇતિ સ્મિતાપ્ય્ આયિતદન્તદીધિતિર્ જગાદ તં માલ્યવાતી વિશામ્પતિમ્ ॥

તવૈતયા સત્કૃતિપાત્ર સત્કૃતં સ્વયં ન યત્ કલ્પિતમ્ અલ્પમધ્યયા
ન સ અવલેપો ન ચ સા પ્રમાદિતા ન ચ ત્રપા તત્ર નૃપો ઽપરાદ્ધ્યતિ ॥

કૃતીતિ વાર્તા તવ વેત્સિ વાઞ્છિતં ત્વમ્ અન્તરાત્મેવ ન કસ્ય વા ભુવિ
અતઃ સખીભાવગતસ્ય ગોપનં ન યુજ્યતે નસ્ ત્વયિ તન્ નિશામ્યતામ્ ॥

શિલીમુખે ઽસ્મિંસ્ તવ નામલાઞ્છિતે મૃગોપનીતે મૃગશાવલોચના
પ્રમોદમ્ આપ્તેયમ્ ઇતો વિલોકિતે કરે ચકોરીવ તુષારદીધિતેઃ ॥

ક એષ રાજેતિ મુહુઃ કુતૂહલાદ્ ઇયં યદા પૃષ્ટવતી સખીજનમ્
અતસ્ તદાસ્યૈ કથિતઃ સવિસ્તરં મયા ત્વમ્ ઉર્વીતલમીનલાઞ્છાનઃ ॥

કરેણ સાસૂયમ્ અપાસ્ય કર્ણતઃ ક્વણદ્દ્વિરેફાવલિ નીલમ્ ઉત્પલમ્
તદૈતયાભ્યુદ્ગતપક્ષપાતયા શ્રુતા ગુણાઢ્યસ્ય બૃહત્કથા તવ ॥

ઇમાં ત્વદાકારનિરૂપિણે સખીમ્ અવેત્ય પર્યુત્સુકલોચનામ્ ઇવ
તતો મયા વિશ્વવિલોચનોત્સવસ્ ત્વમ્ એવ ચિત્રે લિખિતો ઽસિ પાર્થિવ ! ॥

ઉદઞ્ચિતવ્યાયતપક્ષ્મણા તતઃ સખીસમક્ષં નિભૃતેન ચક્ષુષા
ચિરં નિપીતસતૃષેવ મુગ્ધયા ત્વયૈતયા મધ્યમલોકવાસસઃ ॥

અતો વરો ઽયં યુવયોઃ સમાગમઃ કુમુદ્વતીચન્દ્રમસોર્ ઇવોચિતઃ
ઇયં હિ બાલોચ્છ્વસિતો મનોભુવસ્ ત્વમ્ અત્ર લોકત્રિતયૈકસુન્દરઃ ॥

નૃપ ગૃહીતું નયમ્ અત્ર કો ઽપ્ય્ અલં સુરેષુ વા પન્નગપુઙ્ગવેષુ વા
સ એષ પઙ્કેરુહકર્ણિકામૃદુસ્ ત્વયા શયો ઽસ્યાઃ ક્રિયતે સકૌતુકઃ ॥

અયાચિતો ઽપ્ય્ અર્પિત એવ તે શરઃ ક્ષિતેર્ અયં ન્યાયવિદાં વરૈતયા
તદ્ એનમ્ અભ્યર્થયસે કથં પુનઃ કલત્રમ્ એષા હિ વસુન્ધરા તવ ॥

ઇતીતિવૃત્તં તદુપાશ્રયં તથા પ્રકાશયન્તી પૃથિવીપતિં પ્રતિ
છલાદ્ અલીકભૃકુટિં વિધાય સા તયાલુલોકે ફણિરાજકન્યયા ॥

અથ દ્વિરેફસ્ય મુખાબ્જપાતિનો નિવારણયોરગરાજકન્યકા
શિલાતલાત્ સંભ્રમમીલિતસ્મૃતિસ્ તદાશુ લીલાશતપત્રમ્ આદદે ॥

તતઃ સ રોમઞ્ચનિપીડિતાઙ્ગદો રમાઙ્ગદં વ્યક્તશશિપ્રભેઙ્ગિતઃ
અપશ્યદ્ ઇન્દીવરદામદીર્ઘયા પ્રમોદવિસ્તરિતયા દૃશા નૃપઃ ॥

સમર્પિતા પાર્થિવ પુષ્પકેતુના તવેયમ્ આર્દ્રપ્રણયા મનસ્વિની
અસીમસૌન્દર્યસુધાવિલાસભૂર્ ઉદન્વતેવેન્દુકલા પિનાકિનઃ ॥

કિમ્ અન્યદ્ અત્રોલ્લસિતં જગત્ત્રયે તવૈવ સૌભાગ્યપતાકયા નૃપ
યદ્ આગતા મન્મથપત્રિણામ્ ઇયં શરવ્યતામ્ એવમ્ અપિ શ્રુતે ત્વયિ ॥

વધૂર્ દિલીપસ્ય સુદક્ષિણા યથા યથા સુનન્દા ભરતસ્ય ભૂપતેઃ
રઘૂદ્વહસ્યાવનિકન્યકા યથા તથા તવેયં વિધિના ઉપપાદિતા ॥

કિમ્ અન્યદ્ અસ્યાઃ કૃતપાણિપીડનઃ પદં નિધત્સે ગૃહમેધિનાં ધુરિ
ઇતિ પ્રસર્પત્સ્મિતચન્દ્રિકઃ શનૈર્ અભાષતોર્વીતિલકં રમાઙ્ગદઃ ॥

વિલોકિતં ચિત્રમ્ અલીકભાષિણી ભવત્સખીયં પ્રતિભાસતે મમ
ઉદીરિતૈવં કિલ પાર્થિવેન સા ભૃશમ્ લલજ્જે નિભૃતં જહાસ ચ ॥

વિલોકયન્તી તમ્ અપાઙ્ગલોચના સમુલ્લસત્સ્વેદલવાઙ્કિતસ્તની
તતઃ સુજાતસ્તબકાસ્તમૌક્તિકા લતેવ સા હેમમયી વ્યકમ્પત ॥

મુખે તવાસક્તમ્ ઇદં શશિપ્રભે દૃશાવતંસાગતયૈતદીયયા
સખીજનઃ સસ્મિતમ્ ઇત્ય્ ઉવાચ તામ્ અવન્તિનાથં ચ મિથો રમાઙ્ગદઃ ॥

અત્રાન્તરે ઝટિતિ ચિત્તમ્ ઇવાચ્છમ્ અમ્ભઃ ક્ષોભં જગામ સરિતસ્ તુહિનાંશુસૂતેઃ
વાતિ સ્મ ચ પ્રસભભગ્નતમાલતાલ હિન્તાલસાલસરલઃ સહસા સમીરઃ ॥

ઉદનમદ્ અથ તત્ક્ષણાદ્ ઉદઞ્ચત્ કનકપિશઙ્ગતડિલ્લતઃ પયોદઃ
અધરિતમુરજધ્વનીનિ મુઞ્ચન્ વિધુરિતકર્ણતલાનિ ગર્જિતાનિ ॥

અથ સમુદિતત્રાસા મેઘસ્વનાન્ નનુ ભૂપતેર્ ભુજપરિઘયોર્ અન્તો બાલા પ્રવેષ્ટુમ્ ઇયેષ સા
કિમ્ અસિ ચકિતા મા ત્વં ભૈષીર્ ઇતો ભવ લજ્જયા કૃતમ્ ઇતિ ચ તામ્ ઊચે દેવઃ સ સાહસલાઞ્ચનઃ ॥