નારાયણીય · અધ્યાય 10.90

વૃકભૃગુસુનિમોહિન્યમ્બરીષાદિવૃત્તે-
ષ્વયિ તવ હિ મહત્ત્વં સર્વશર્વાદિજૈત્રમ્ ।
સ્થિતમિહ પરમાત્મન્! નિષ્કલાર્વાગભિન્નં
કિમપિ યદવભાતં તદ્ધિ રૂપં તવૈવ ॥

મૂર્તિત્રયેશ્વરસદાશિવપઞ્ચકં યત્
પ્રાહુઃ પરાત્મવપુરેવ સદાશિવોઽસ્મિન્ ।
તત્રેશ્વરસ્તુ સ વિકુણ્ઠપદસ્ત્વમેવ
ત્રિત્વં પુનર્ભજસિ સત્યપદે ત્રિભાગે ॥

તત્રાપિ સાત્ત્વિકતનું તવ વિષ્ણુમાહુર્-
ધાતા તુ સત્ત્વવિરલો રજસૈવ પૂર્ણઃ ।
સત્ત્ત્વોત્કટત્વમપિ ચાસ્તિ તમોવિકાર-
ચેષ્ટાદિકં ચ તવ શઙ્કરનામ્નિ મૂર્તૌ ॥

તં ચ ત્રિમૂર્ત્યતિગતં પુરપૂરુષં ત્વાં
શર્વાત્મનાપિ ખલુ સર્વમયત્વહેતોઃ ।
શંસન્ત્યુપાસનઅવિધૌ તદપિ સ્વતસ્તુ
ત્વદ્રૂપમિત્યતિદૃઢં બહુ નઃ પ્રમાણમ્ ॥

શ્રીશઙ્કરોઽપિ ભગવાન્ સકલેષુ તાવત્
ત્વામેવ માનયતિ યો ન હિ પક્ષપાતી ।
ત્વન્નિષ્ઠમેવ સ હિ નામસહસ્રકાદિ
વ્યાખ્યદ્ ભવત્સ્તુતિપરશ્ચ ગતિં ગતોઽન્તે ॥

મૂર્તિત્રયાતિગમુવાચ ચ મન્ત્રશાસ્ત્રસ્-
યાદૌ કલાયસુષમં સકલેશ્વરં ત્વામ્ ।
ધ્યાનં ચ નિષ્કલમસૌ પ્રણવે ખલૂક્ત્વા
ત્વામેવ તત્ર સકલં નિજગાદ નાન્યમ્ ॥

સમસ્તસારે ચ પુરાણસંગ્રહે વિસંશયં ત્વન્મહિમૈવ વર્ણ્યતે ।
ત્રિમૂર્તિયુક્સત્યપદત્રિભાગતઃ પરં પદં તે કથિતં ન શૂલિનઃ ॥

યદ્ બ્રાહ્મકલ્પ ઇહ ભાગવતદ્વિતીય-
સ્કન્ધોદિતં વપુરનાવૃતમીશ! ધાત્રે ।
તસ્યૈવ નામ હરિશર્વમુખં જગાદ
શ્રીમાધવં શિવપરોઽપિ પુરાણસારે ॥

યે સ્વપ્રકૃત્યનુગુણા ગિરિશં ભજન્તે
તેષાં ફલં હિ દૃઢયૈવ તદીયભક્ત્યા ।
વ્યાસો હિ તેન કૃતવાનધિકારિહેતોઃ
સ્કાન્દાદિકેષુ તવ હાનિવચોઽર્થવાદૈઃ ॥

ભૂતાર્થકીર્તિરનુવાદવિરુદ્ધવાદૌ
ત્રેધાર્થવાદગતયઃ ખલુ રોચનાર્થાઃ ।
સ્કાન્દાદિકેષુ બહવોઽત્ર વિરુદ્ધવાદાસ્-
ત્વત્તામસત્વપરિભૂત્યુપશિક્ષણાદ્યાઃ ॥

યત્કિઞ્ચિદપ્યવિદુષાપિ વિભો! મયોક્તં
તન્મન્ત્રશાસ્ત્રવચનાદ્યભિદૃષ્ટમેવ ।
વ્યાસોક્તિસારમયભાગવતોપગીત!
ક્લેશાન્ વિધૂય કુરુ ભક્તિભરં પરાત્મન્! ॥।