નારાયણીય · અધ્યાય 10.62

કદાચિદ્ ગોપાલાન્ વિહિતમખસમ્ભારવિભવાન્
નિરીક્ષ્ય ત્વં શૌરે! મઘવમદમુદ્ધ્વંસિતુમનાઃ ।
વિજાનન્નપ્યેતાન્ વિનયમૃદુ નન્દાદિપશુપા-
નપૃચ્છઃ કો વાયં જનક! ભવતામુદ્યમ ઇતિ ॥

બભાષે નન્દસ્ત્વાં સુત! નનુ વિધેયો મઘવતો
મખો વર્ષે વર્ષે સુખયતિ સ વર્ષેણ પૃથિવીમ્ ।
નૃણાં વર્ષાયત્તં નિખિલમુપજીવ્યં મહિતલે
વિશેષાદસ્માકં તૃણસલિલજીવા હિ પશવઃ ॥

ઇતિ શ્રુત્વા વાચં પિતુરયિ ભવાનાહ સરસં
ધિગેતન્નો સત્યં મઘવજનિતા વૃષ્ટિરિતિ યત્ ।
અદૃષ્ટં જીવાનાં સૃજતિ ખલુ વૃષ્ટિં સમુચિતાં
મહારણ્યે વૃક્ષાઃ કિમિવ બલિમિન્દ્રાય દદતે ॥

ઇદં તાવત્ સત્યં યદિહ પશપો નઃ કુલધનં
તદાજીવ્યાયાસૌ બલિરચલભર્ત્રે સમુચિતઃ ।
સુરેભ્યોઽપ્યુત્કૃષ્ટા નનુ ધરણિદેવાઃ ક્ષિતિતલે
તતસ્તેઽપ્યારાધ્યા ઇતિ જગદિથ ત્વં નિજજનામ્ ॥

ભવદ્વાચં શ્રુત્વા બહુમતિયુતાસ્તેઽપિ પશુપા
દ્વિજેન્દ્રાનર્ચન્તો બલિમદદુરુચ્ચૈઃ ક્ષિતિભૃતે ।
વ્યધુઃ પ્રાદક્ષિણ્યં સુભૃશમનમન્નાદરયુતાસ્-
ત્વમાદઃ શૈલાત્મા બલિમખિલમાભીરપુરતઃ ॥

અવોચશ્ચૈવં તાન્ કિમિહ વિતથં મે નિગદિતં
ગિરીન્દ્રો નન્વેષુ સ્વબલિમુપભૂઙ્ક્તે સ્વવપુષા ।
અયં ગોત્રો ગોત્રદ્વિષિ ચ કુપિતે રક્ષિતુમલં
સમસ્તાનિત્યુક્તા જહૃષુરખિલા ગોકુલજુષઃ ॥

પરિપ્રીતા યાતાઃ ખલુ ભવદુપેતા વ્રજજુષો
વ્રજં યાવત્ તાવન્નિજમખવિભઙ્ગં નિશમયન્ ।
ભવન્તં જાનન્નપ્યધિકરજસાક્રાન્તહૃદયો
ન સેહે દેવેન્દ્રસ્ત્વદુપરચિતાત્મોન્નતિરપિ ॥

મનુષ્યત્વં યાતો મધુભિદપિ દેવેષ્વવિનયં
વિધત્તે ચેન્નષ્ટસ્ત્રિદશસદસાં કોઽપિ મહિમા ।
તતશ્ચ ધ્વંસિષ્યે પશુપહતકસ્ય શ્રિયમિતિ
પ્રવૃત્તસ્ત્વાં જેતું સ કિલ મઘવા દુર્મદનિધિઃ ॥

ત્વદાવાસં હન્તું પ્રલયજલદાનમ્બરભુવિ
પ્રહિણ્વન્ બિભ્રાણઃ કુલિશમયમભ્રેભગમનઃ ।
પ્રતસ્થેઽન્યૈરન્તર્દહનમરુદાદ્યૈર્વિહસિતો
ભવન્માયા નૈવ ત્રિભૂવનપતે! મોહયતિ કમ્ ॥

સુરેન્દ્રઃ કુદ્ધશ્ચેદ્ દ્વિજકરુણયા શૈલકૃપયા-
પ્યનાતઙ્કોઽસ્માકં નિયત ઇતિ વિશ્વાસ્ય પશુપાન્ ।
અહો કિં નાયાતો ગિરિભિદિતિ સઞ્ચિન્ત્ય નિવસન્
મરુદ્ગેહાધીશ! પ્રણુદ મુરવૈરિન્! મમ ગદાન્ ॥