Nārāyaṇīya · Chapter 10.62

kadācid gopālān vihitamakhasambhāravibhavān
nirīkṣya tvaṃ śaure! maghavamadamuddhvaṃsitumanāḥ /
vijānannapyetān vinayamṛdu nandādipaśupā-
napṛcchaḥ ko vāyaṃ janaka! bhavatāmudyama iti //

babhāṣe nandastvāṃ suta! nanu vidheyo maghavato
makho varṣe varṣe sukhayati sa varṣeṇa pṛthivīm /
nṛṇāṃ varṣāyattaṃ nikhilamupajīvyaṃ mahitale
viśeṣādasmākaṃ tṛṇasalilajīvā hi paśavaḥ //

iti śrutvā vācaṃ piturayi bhavānāha sarasaṃ
dhigetanno satyaṃ maghavajanitā vṛṣṭiriti yat /
adṛṣṭaṃ jīvānāṃ sṛjati khalu vṛṣṭiṃ samucitāṃ
mahāraṇye vṛkṣāḥ kimiva balimindrāya dadate //

idaṃ tāvat satyaṃ yadiha paśapo naḥ kuladhanaṃ
tadājīvyāyāsau baliracalabhartre samucitaḥ /
surebhyo'pyutkṛṣṭā nanu dharaṇidevāḥ kṣititale
tataste'pyārādhyā iti jagaditha tvaṃ nijajanām //

bhavadvācaṃ śrutvā bahumatiyutāste'pi paśupā
dvijendrānarcanto balimadaduruccaiḥ kṣitibhṛte /
vyadhuḥ prādakṣiṇyaṃ subhṛśamanamannādarayutās-
tvamādaḥ śailātmā balimakhilamābhīrapurataḥ //

avocaścaivaṃ tān kimiha vitathaṃ me nigaditaṃ
girīndro nanveṣu svabalimupabhūṅkte svavapuṣā /
ayaṃ gotro gotradviṣi ca kupite rakṣitumalaṃ
samastānityuktā jahṛṣurakhilā gokulajuṣaḥ //

pariprītā yātāḥ khalu bhavadupetā vrajajuṣo
vrajaṃ yāvat tāvannijamakhavibhaṅgaṃ niśamayan /
bhavantaṃ jānannapyadhikarajasākrāntahṛdayo
na sehe devendrastvaduparacitātmonnatirapi //

manuṣyatvaṃ yāto madhubhidapi deveṣvavinayaṃ
vidhatte cennaṣṭastridaśasadasāṃ ko'pi mahimā /
tataśca dhvaṃsiṣye paśupahatakasya śriyamiti
pravṛttastvāṃ jetuṃ sa kila maghavā durmadanidhiḥ //

tvadāvāsaṃ hantuṃ pralayajaladānambarabhuvi
prahiṇvan bibhrāṇaḥ kuliśamayamabhrebhagamanaḥ /
pratasthe'nyairantardahanamarudādyairvihasito
bhavanmāyā naiva tribhūvanapate! mohayati kam //

surendraḥ kuddhaśced dvijakaruṇayā śailakṛpayā-
pyanātaṅko'smākaṃ niyata iti viśvāsya paśupān /
aho kiṃ nāyāto giribhiditi sañcintya nivasan
marudgehādhīśa! praṇuda muravairin! mama gadān //