નારાયણીય · અધ્યાય 10.60

મદનાતુરચેતસોઽન્વહં ભવદઙ્ઘ્રિદ્વયદાસ્યકામ્પયા ।
યમુનાતટસીમ્નિ સૈકતીં તરલાક્ષ્યો ગિરિજાં સમાર્ચિચન્ ॥

તવ નામકથારતાઃ સમં સુદૃશઃ પ્રાતરુપાગતા નદીમ્ ।
ઉપહારશતૈરપૂજયન્ દયિતો નન્દસુતો ભવેદિતિ ॥

ઇતિ માસમુપાહિતવ્રતાસ્તરલાક્ષીરભિવીક્ષ્ય તા ભવાન્ ।
કરુણામૃદુલો નદીતટં સમયાસીત્ તદનુગ્રહેચ્છયા ॥

નિયમાવસિતૌ નિજામ્બરં તટસીમન્યવમુચ્ય તાસ્તદા ।
યમુનાજલખેલનાકુલાઃ પુરતસ્ત્વામવલોક્ય લજ્જિતાઃ ॥

ત્રપયા નમિતાનનાસ્વથો વનિતાસ્વમ્બરજાલમન્તિકે ।
નિહિતં પરિગૃહ્ય ભૂરુહો વિટપં તં તરસાધિરૂઢવાન્ ॥

ઇહ તાવદુપેત્ય નીયતાં વસનં વઃ સુદૃશો! યથાયથમ્ ।
ઇતિ નર્મમૃદુસ્મિતે ત્વયિ વ્રુવતિ વ્યામુમુહે વધૂજનૈઃ ॥

અયિ જીવ ચિરં કિશોર! નસ્તવ દાસીરવશીકરોષિ કિમ્ ।
પ્રદિશામ્બરમમ્બુજેક્ષણેત્યુદિતસ્ત્વં સ્મિતમેવ વત્તવાન્ ॥

અધિરુહ્ય તટં કૃતાઞ્જલીઃ પરિશુદ્ધાઃ સ્વગતીર્નિરીક્ષ્ય તાઃ ।
વસનાન્યખિલાન્યનુગ્રહં પુનરેવં ગિરમપ્યદા મુદા ॥

વિદિતં નનુ વો મનીષિતં વદિતારસ્ત્વિહ યોગ્યમુત્તરમ્ ।
યમુનાપુલીને સચન્દ્રિકાઃ ક્ષણદા ઇત્યબલાસ્ત્વમૂચિવાન્ ॥

ઉપકર્ણ્ય ભવન્મુખચ્યુતં મધુનિષ્યન્દિ વચો મૃગીદૃશઃ ।
પ્રણયાદયિ વીક્ષ્ય વીક્ષ્ય તે વદનાબ્જં શનકૈર્ગૃહં ગતાઃ ॥

ઇતિ નન્વનુગૃહ્ય બલ્લવીર્તિપિનાન્તેષુ પુરેવ સઞ્ચરન્ ।
કરુણાશિશિરો હરે! હર ત્વરયા મે સકલામયાવલિમ્ ॥