Nārāyaṇīya · Chapter 10.60

madanāturacetaso'nvahaṃ bhavadaṅghridvayadāsyakāmpayā /
yamunātaṭasīmni saikatīṃ taralākṣyo girijāṃ samārcican //

tava nāmakathāratāḥ samaṃ sudṛśaḥ prātarupāgatā nadīm /
upahāraśatairapūjayan dayito nandasuto bhavediti //

iti māsamupāhitavratāstaralākṣīrabhivīkṣya tā bhavān /
karuṇāmṛdulo nadītaṭaṃ samayāsīt tadanugrahecchayā //

niyamāvasitau nijāmbaraṃ taṭasīmanyavamucya tāstadā /
yamunājalakhelanākulāḥ puratastvāmavalokya lajjitāḥ //

trapayā namitānanāsvatho vanitāsvambarajālamantike /
nihitaṃ parigṛhya bhūruho viṭapaṃ taṃ tarasādhirūḍhavān //

iha tāvadupetya nīyatāṃ vasanaṃ vaḥ sudṛśo! yathāyatham /
iti narmamṛdusmite tvayi vruvati vyāmumuhe vadhūjanaiḥ //

ayi jīva ciraṃ kiśora! nastava dāsīravaśīkaroṣi kim /
pradiśāmbaramambujekṣaṇetyuditastvaṃ smitameva vattavān //

adhiruhya taṭaṃ kṛtāñjalīḥ pariśuddhāḥ svagatīrnirīkṣya tāḥ /
vasanānyakhilānyanugrahaṃ punarevaṃ giramapyadā mudā //

viditaṃ nanu vo manīṣitaṃ vaditārastviha yogyamuttaram /
yamunāpulīne sacandrikāḥ kṣaṇadā ityabalāstvamūcivān //

upakarṇya bhavanmukhacyutaṃ madhuniṣyandi vaco mṛgīdṛśaḥ /
praṇayādayi vīkṣya vīkṣya te vadanābjaṃ śanakairgṛhaṃ gatāḥ //

iti nanvanugṛhya ballavīrtipinānteṣu pureva sañcaran /
karuṇāśiśiro hare! hara tvarayā me sakalāmayāvalim //