નારાયણીય · અધ્યાય 10.42

કદાપિ જન્મર્ક્ષદિને તવ પ્રભો! નિમન્ત્રિતજ્ઞાતિવધૂમહીસુરા ।
મહાનસસ્ત્વાં સવિધે નિધાય સા મહાનસાદૌ વવૃતે વ્રજેશ્વરી ॥

તતો ભવત્ત્રાણનિયુક્તબાલકપ્રભીતિસઙ્ક્રન્દનસઙ્કુલારવૈઃ ।
વિમિશ્રમશ્રાવિ ભવત્સમીપતઃ પરિસ્ફુટદ્દારુચટચ્ચટારવઃ ॥

તતસ્તદાકર્ણનસંભ્રમશ્રમપ્રકમ્પિવક્ષોજભરા વ્રજાઙ્ગનાઃ ।
ભવન્તમન્તર્દદૃશુઃ સમન્તતો વિનિષ્પતદ્દારુણદારુમધ્યગમ્ ॥

શિશોરહો કિં કિમભૂદિતિ દ્રુતં પ્રધાવ્ય નન્દઃ પશુપાશ્ચ ભૂસુરાઃ ।
ભવન્તમાલોક્ય યશોદયા ધૃતં સમાશ્વસન્નશ્રુજલાર્દ્રલોચનાઃ ॥

કસ્કો નુ કૌતસ્કુત એષ વિસ્મયો વિશઙ્કટં યચ્છકટં વિપાટિતમ્ ।
ન કારણં કિઞ્ચિદિહેતિ તે સ્થિતાઃ સ્વનાસિકાદત્તકરાસ્ત્વદીક્ષકાઃ ॥

કુમારકસ્યાસ્ય પયોધરાર્થિનઃ પ્રરોદને લોલપદામ્બુજાહતમ્ ।
મયા મયા દૃષ્ટમનો વિપર્યગાદિતીશ! તે પાલકબાલકા જગુઃ ॥

ભિયા તદા કિઞ્ચિદજાનતામિદં કુમારકાણામતિદુર્ઘટં વચઃ ।
ભવત્પ્રભાવાવિદુરૈરિતીરિતં મનાગિવાશઙ્ક્યાત દૃષ્ટપૂતનૈઃ ॥

પ્રવાલતામ્રં કિમિદં પદં ક્ષતં સરોજરમ્યૌ નુ કરૌ વિરોજિતૌ ।
ઇતિ પ્રસર્પત્કરુણાતરઙ્ગિતાસ્ત્વદઙ્ગમાપસ્પૃશુરઙ્ગનાજનાઃ ॥

અયે સુતં દેહિ જગત્પતેઃ કૃપાતરઙ્ગપાતાત્ પરિપાતમદ્ય મે ।
ઇતિ સ્મ સઙ્ગૃહ્ય પિતા ત્વદઙ્ગુકં ગુહુર્મુહુઃ શ્લિષ્યતિ જીતકણ્ટકઃ ॥

અનોનિલીનઃ કિલ હન્તુમાગતઃ સુરારિરેવં ભવતા વિહિંસિતઃ ।
રજોઽપિ નોદૃષ્ટમમુષ્ય તત્ કથં સ શુદ્ધસત્ત્વે ત્વયિ લીનવાન્ ધ્રુવમ્ ॥

પ્રપૂજિતૈસ્તત્ર તતો દ્વિજાતિભિર્વિશેષતો લમ્ભિતમઙ્ગલાશિષઃ ।
વ્રજં નિજૈર્બાલ્યરસૈર્વિમોહયન્ મરુત્પુરાધીશ! રુજાં જહીહિ મે ॥