નરસિંહપુરાણ · અધ્યાય 67

તીર્થાનિ કથિતાન્ય્ એવં ભૌમાનિ દ્વિજસત્તમ
માનસાનિ હિ તીર્થાનિ ફલદાનિ વિશેષતઃ ॥

મનોનિર્મલતા તીર્થં રાગાદિભિર્ અનાકુલા
સત્યં તીર્થં દયા તીર્થં તીર્થમ્ ઇન્દ્રિયનિગ્રહઃ ॥

ગુરુશુશ્રૂષણં તીર્થં માતૃશુશ્રૂષણં તથા
સ્વધર્માચરણં તીર્થં તીર્થમ્ અગ્નેર્ ઉપાસનમ્ ॥

એતાનિ પુણ્યતીર્થાનિ વ્રતાનિ શૃણુ મે ઽધુના
એકભુક્તં તથા નક્તમ્ ઉપવાસં ચ વૈ મુને ॥

પૂર્ણમાસ્યામ્ અમાવાસ્યામ્ એકભુક્તં સમાચરેત્
તત્રૈકભુક્તં કુર્વાણઃ પુણ્યાં ગતિમ્ અવાપ્નુયાત્ ॥

ચતુર્થ્યાં તુ ચતુર્દશ્યાં સપ્તમ્યાં નક્તમ્ આચરેત્
અષ્ટમ્યાં તુ ત્રયોદશ્યાં સ પ્રાપ્નોત્ય્ અભિવાઞ્છિતમ્ ॥

ઉપવાસો મનુશ્રેષ્ઠ એકાદશ્યાં વિધીયતે
નરસિંહં સમભ્યર્ચ્ય સર્વપાપૈઃ પ્રમુચ્યતે ॥

હસ્તયુક્તે ઽર્કદિવસે સૌરનક્તં સમાચરેત્
સ્નાત્વાર્કમધ્યે વિષ્ણું ચ ધ્યાત્વા રોગાત્ પ્રમુચ્યતે ॥

આત્મનો દ્વિગુણાં છાયાં યદા સંતિષ્ઠતે રવિઃ
સૌરનક્તં વિજાનીયાન્ ન નક્તં નિશિ ભોજનમ્ ॥

ગુરુવારે ત્રયોદશ્યામ્ અપરાહ્ણે જલે તતઃ
તર્પયિત્વા પિતૃન્ દેવાન્ ઋષીંશ્ ચ તિલતન્દુલૈઃ ॥

નરસિંહં સમભ્યર્ચ્ય યઃ કરોત્ય્ ઉપવાસકમ્
સર્વપાપવિનિર્મુક્તો વિષ્ણુલોકે મહીયતે ॥

યદાગસ્ત્યોદયે પ્રાપ્તે તદા સપ્તસુ રાત્રિષુ
અર્ઘ્યં દદ્યાત્ સમભ્યર્ચ્ય અગસ્ત્યાય મહામુને ॥

શઙ્ખે તોયં વિનિક્ષિપ્ય સિતપુષ્પાક્ષતૈર્ યુતમ્
મન્ત્રેણાનેન વૈ દદ્યાચ્ *છિતપુષ્પાદિનાર્ચિતે ॥

કાશપુષ્પપ્રતીકાશ અગ્નિમારુતસંભવ
મિત્રાવરુણયોઃ પુત્ર કુમ્ભયોને નમો ઽસ્તુ તે ॥

આતાપી ભક્ષિતો યેન વાતાપી ચ મહાસુરઃ
સમુદ્રઃ શોષિતો યેન સો ઽગસ્ત્યઃ પ્રીયતાં મમ ॥

એવં તુ દદ્યાદ્ યો સર્વમ્ અગસ્ત્યે વૈ દિશં પ્રતિ
સર્વપાપવિનિર્મુક્તસ્ તમસ્ તરતિ દુસ્તરમ્ ॥

એવં તે કથિતં સર્વં ભરદ્વાજ મહામુને
પુરાણં નારસિંહં ચ મુનીનાં સંનિધૌ મયા ॥

સર્ગશ્ ચ પ્રતિસર્ગશ્ ચ વંસો મન્વન્તરાણિ ચ
વંશાનુચરિતં ચૈવ સર્વમ્ એવ પ્રકીર્તિતમ્ ॥

બ્રહ્મણૈવ પુરા પ્રોક્તં મરીચ્યાદિષુ વૈ મુને
તેભ્યશ્ ચ ભૃગુણા પ્રોક્તં માર્કણ્ડેયાય વૈ તતઃ ॥

માર્કણ્ડેયેન વૈ પ્રોક્તં રાજ્ઞો નાગકુલસ્ય હ
પ્રસાદાન્ નરસિંહસ્ય પ્રાપ્તં વ્યાસેન ધીમતા ॥

તત્પ્રસાદાન્ મયા પ્રાપ્તં સર્વપાપપ્રણાશનમ્
પુરાણં નરસિંહસ્ય મયા ચ કથિતં તવ ॥

મુનીનાં સંનિધૌ પુણ્યં સ્વસ્તિ તે ઽસ્તુ વ્રજામ્ય્ અહમ્
યઃ શૃણોતિ શુચિર્ ભૂત્વા પુરાણં હ્ય્ એતદ્ ઉત્તમમ્ ॥

માઘે માસિ પ્રયાગે તુ સ સ્નાનફલમ્ આપ્નુયાત્
યો ભક્ત્યા શ્રાવયેદ્ ભક્તાન્ નિત્યં નરહરેર્ ઇદમ્ ॥

સર્વતીર્થફલં પ્રાપ્ય વિષ્ણુલોકે મહીયતે
શ્રુત્વૈવં સ્નાતકૈઃ સાર્ધં ભરદ્વાજો મહામતિઃ ॥

સૂતમ્ અભ્યર્ચ્ય તત્રૈવ સ્થિતવાન્ મુનયો ગતાઃ
સર્વપાપહરં પુણ્યં પુરાણં નૃસિંહાત્મકમ્ ॥

પઠતાં શૃણ્વતાં નૃણાં નરસિંહો પ્રસીદતિ
પ્રસન્ને દેવદેવેશે સર્વપાપક્ષયો ભવેત્ ॥

પ્રક્ષીણપાપબન્ધાસ્ તે મુક્તિં યાન્તિ નરા ઇતિ ॥