નરસિંહપુરાણ · અધ્યાય 68

ઇત્ય્ એતત્ સર્વમ્ આખ્યાતં પુરાણં નારસિંહકમ્
સર્વપાપહરં પુણ્યં સર્વદુઃખનિવારણમ્ ॥

સમસ્તપુણ્યફલદં સર્વયજ્ઞફલપ્રદમ્
યે પઠન્ત્ય્ અપિ શૃણ્વન્તિ શ્લોકં શ્લોકાર્ધમ્ એવ વા ॥

ન તેષાં પાપબન્ધસ્ તુ કદાચિદ્ અપિ જાયતે
વિષ્ણ્વર્પિતમ્ ઇદં પુણ્યં પુરાણં સર્વકામદમ્ ॥

ભક્ત્યા ચ વદતામ્ એતચ્ *છૃણ્વતાં ચ ફલં શૃણુ
શતજન્માર્જિતૈઃ પાપૈઃ સદ્ય એવ વિમોચિતાઃ ॥

સહસ્રકુલસંયુક્તાઃ પ્રયાન્તિ પરમં પદમ્
કિં તીર્થૈર્ ગોપ્રદાનૈર્ વા તપોભિર્ વા કિમ્ અધ્વરૈઃ ॥

અહન્યહનિ ગોવિન્દં તત્પરત્વેન શૃણ્વતામ્
યઃ પઠેત્ પ્રાતર્ ઉત્થાય યદ્ અસ્ય શ્લોકવિંશતિમ્ ॥

જ્યોતિષ્ટોમફલં પ્રાપ્ય વિષ્ણુલોકે મહીયતે
એતત્ પવિત્રં પૂજ્યં ચ ન વાચ્યમ્ અકૃતાત્મનામ્ ॥

દ્વિજાનાં વિષ્ણુભક્તાનાં શ્રાવ્યમ્ એતન્ ન સંશયઃ
એતત્ પુરાણશ્રવણમ્ ઇહામુત્ર સુખપ્રદમ્ ॥

વદતાં શૃણ્વતાં સદ્યઃ સર્વપાપપ્રણાશનમ્
બહુનાત્ર કિમ્ ઉક્તેન ભૂયો ભૂયો મુનીશ્વરાઃ ॥

શ્રદ્ધયાશ્રદ્ધયા વાપિ શ્રોતવ્યમ્ ઇદમ્ ઉત્તમમ્
ભારદ્વાજમુખાઃ સર્વે કૃતકૃત્યા દ્વિજોત્તમાઃ ॥

સૂતં હૃષ્ટાઃ પ્રપૂજ્યાથ સર્વે સ્વસ્વાશ્રમં યયુઃ ॥