નરસિંહપુરાણ · અધ્યાય 60

અત ઊર્ધ્વં પ્રવક્ષ્યામિ યતિધર્મમ્ અનુત્તમમ્
શ્રદ્ધયા યદ્ અનુષ્ઠાય યતિર્ મુચ્યેત બન્ધનાત્ ॥

એવં વનાશ્રમે તિષ્ઠંસ્ તપસા દગ્ધકિલ્બિષઃ
ચતુર્થમ્ આશ્રમં ગચ્છેત્ સંન્યસ્ય વિધિના દ્વિજઃ ॥

દિવ્યં ઋષિભ્યો દેવેભ્યઃ સ્વપિતૃભ્યશ્ ચ યત્નતઃ
દત્ત્વા શ્રાદ્ધમ્ ઋષિભ્યશ્ ચ મનુજેભ્યસ્ તથાત્મને ॥

ઇષ્ટિં વૈશ્વાનરીં કૃત્વા પ્રાજાપત્યમ્ અથાપિ વા
અગ્નિં સ્વાત્મનિ સંસ્થાપ્ય મન્ત્રવત્ પ્રવ્રજેત્ પુનઃ ॥

તતઃ પ્રભૃતિ પુત્રાદૌ સુખલોભાદિ વર્જયેત્
દદ્યાચ્ ચ ભૂમાવ્ ઉદકં સર્વભૂતાભયંકરમ્ ॥

ત્રિદણ્ડં વૈણવં સૌમ્યં સત્વચં સમપર્વકમ્
વેષ્ટિતં કૃષ્ણગોવાલ રજ્જ્વા ચ ચતુરઙ્ગુલમ્ ॥

ગ્રન્થિભિર્ વા ત્રિભિર્ યુક્તં જલપૂતં ચ ધારયેત્
ગૃહ્ણીયાદ્ દક્ષિણે હસ્તે મન્ત્રેણૈવ તુ મન્ત્રવિત્ ॥

કૌપીનાચ્ છાદનં વાસઃ કુથાં શીતનિવારિણીમ્
પાદુકે ચાપિ ગૃહ્ણીયાત્ કુર્યાન્ નાન્યસ્ય સંગ્રહમ્ ॥

એતાનિ તસ્ય લિઙ્ગાનિ યતેઃ પ્રોક્તાનિ ધર્મતઃ
સંગૃહ્ય કૃતસંન્યાસો ગત્વા તીર્થમ્ અનુત્તમમ્ ॥

સ્નાત્વા હ્ય્ આચમ્ય વિધિવજ્ જલયુક્તાંશુકેન વૈ
વારિણા તર્પયિત્વા તુ મન્ત્રવદ્ ભાસ્કરં નમેત્ ॥

આસીનઃ પ્રાઙ્મુખો મૌની પ્રાણાયામત્રયં ચરેત્
ગાયત્રીં ચ યથાશક્તિ જપ્ત્વા ધ્યાયેત્ પરં પદમ્ ॥

સ્થિત્યર્થમ્ આત્મનો નિત્યં ભિક્ષાટનમ્ અથાચરેત્
સાયાહ્નકાલે વિપ્રાણાં ગૃહાણિ વિચરેદ્ યતિઃ ॥

સ્યાદ્ અર્થી યાવતાન્નેન તાવદ્ ભૈક્ષં સમાચરેત્
તતો નિવૃત્ત્ય તત્પાત્રમ્ અભ્યુક્ષ્યાચમ્ય સંયમી ॥

સૂર્યાદિદૈવતેભ્યો હિ દત્ત્વાન્નં પ્રોક્ષ્ય વારિણા
ભુઞ્જીત પર્ણપુટકે પાત્રે વા વગ્યતો યતિઃ ॥

વટકાશ્વત્થપત્રેષુ કુમ્ભીતિન્દુકપત્રયોઃ
કોવિદારકરઞ્જેષુ ન ભૂઞ્જીત કદાચન ॥

ભુક્ત્વાચમ્ય નિરુદ્ધાસુર્ ઉપતિષ્ઠેત ભાસ્કરમ્
જપધ્યાનેતિહાસૈસ્ તુ દિનશેષં નયેદ્ યતિઃ ॥

પલાશાઃ સર્વ ઉચ્યન્તે યતયઃ કાંસ્યભોજિનઃ
કાંસ્યસ્યેવ તુ યત્પાત્રં ગૃહસ્થસ્ય તથૈવ ચ ॥

કાંસ્યભોજી યતિઃ સર્વં પ્રાપ્નુયાત્ કિલ્બિષં પુનઃ
ભુક્તપાત્રે યતિર્ નિત્યં ભક્ષયેન્ મન્ત્રપૂર્વકમ્ ॥

ન દુષ્યેત્ તસ્ય તત્ પાત્રં યજ્ઞેષુ ચમસા ઇવ
કૃતસંધ્યસ્ તતો રાત્રિં નયેદ્ દેવગૃહાદિષુ ॥

હૃત્પુણ્ડરીકનિલયે ધ્યાયન્ નારાયણં હરિમ્
તત્પદં સમવાપ્નોતિ યત્ પ્રાપ્ય ન નિવર્તતે ॥