Narasimha Purana · Chapter 60

ata ūrdhvaṃ pravakṣyāmi yatidharmam anuttamam
śraddhayā yad anuṣṭhāya yatir mucyeta bandhanāt //

evaṃ vanāśrame tiṣṭhaṃs tapasā dagdhakilbiṣaḥ
caturtham āśramaṃ gacchet saṃnyasya vidhinā dvijaḥ //

divyaṃ ṛṣibhyo devebhyaḥ svapitṛbhyaś ca yatnataḥ
dattvā śrāddham ṛṣibhyaś ca manujebhyas tathātmane //

iṣṭiṃ vaiśvānarīṃ kṛtvā prājāpatyam athāpi vā
agniṃ svātmani saṃsthāpya mantravat pravrajet punaḥ //

tataḥ prabhṛti putrādau sukhalobhādi varjayet
dadyāc ca bhūmāv udakaṃ sarvabhūtābhayaṃkaram //

tridaṇḍaṃ vaiṇavaṃ saumyaṃ satvacaṃ samaparvakam
veṣṭitaṃ kṛṣṇagovāla rajjvā ca caturaṅgulam //

granthibhir vā tribhir yuktaṃ jalapūtaṃ ca dhārayet
gṛhṇīyād dakṣiṇe haste mantreṇaiva tu mantravit //

kaupīnāc chādanaṃ vāsaḥ kuthāṃ śītanivāriṇīm
pāduke cāpi gṛhṇīyāt kuryān nānyasya saṃgraham //

etāni tasya liṅgāni yateḥ proktāni dharmataḥ
saṃgṛhya kṛtasaṃnyāso gatvā tīrtham anuttamam //

snātvā hy ācamya vidhivaj jalayuktāṃśukena vai
vāriṇā tarpayitvā tu mantravad bhāskaraṃ namet //

āsīnaḥ prāṅmukho maunī prāṇāyāmatrayaṃ caret
gāyatrīṃ ca yathāśakti japtvā dhyāyet paraṃ padam //

sthityartham ātmano nityaṃ bhikṣāṭanam athācaret
sāyāhnakāle viprāṇāṃ gṛhāṇi vicared yatiḥ //

syād arthī yāvatānnena tāvad bhaikṣaṃ samācaret
tato nivṛttya tatpātram abhyukṣyācamya saṃyamī //

sūryādidaivatebhyo hi dattvānnaṃ prokṣya vāriṇā
bhuñjīta parṇapuṭake pātre vā vagyato yatiḥ //

vaṭakāśvatthapatreṣu kumbhītindukapatrayoḥ
kovidārakarañjeṣu na bhūñjīta kadācana //

bhuktvācamya niruddhāsur upatiṣṭheta bhāskaram
japadhyānetihāsais tu dinaśeṣaṃ nayed yatiḥ //

palāśāḥ sarva ucyante yatayaḥ kāṃsyabhojinaḥ
kāṃsyasyeva tu yatpātraṃ gṛhasthasya tathaiva ca //

kāṃsyabhojī yatiḥ sarvaṃ prāpnuyāt kilbiṣaṃ punaḥ
bhuktapātre yatir nityaṃ bhakṣayen mantrapūrvakam //

na duṣyet tasya tat pātraṃ yajñeṣu camasā iva
kṛtasaṃdhyas tato rātriṃ nayed devagṛhādiṣu //

hṛtpuṇḍarīkanilaye dhyāyan nārāyaṇaṃ harim
tatpadaṃ samavāpnoti yat prāpya na nivartate //