નરસિંહપુરાણ · અધ્યાય 36

અવતારાન્ અહં વક્ષ્યે દેવદેવસ્ય ચક્રિણઃ
તાન્ શૃણુષ્વ મહીપાલ પવિત્રાન્ પાપનાશનાન્ ॥

યથા મત્સ્યેન રૂપેણ દત્તા વેદાઃ સ્વયંભુવે
મધુકૈટભૌ ચ નિધનં પ્રાપિતૌ ચ મહાત્મના ॥

યથા કૌર્મેણ રૂપેણ વિષ્ણુના મન્દરો ધૃતઃ
યથા પૃથ્વી ધૃતા રાજન્ વારાહેણ મહાત્મના ॥

તેનૈવ નિધનં પ્રાપ્તો યથા રાજન્ મહાબલઃ
હિરણ્યાક્ષો મહાવીર્યો દિતિપુત્રો મહાતનુઃ ॥

યથા હિરણ્યકશિપુસ્ ત્રિદશાનામ્ અરિઃ પુરા
નરસિંહેન દેવેન પ્રાપિતો નિધનં નૃપ ॥

યથા બદ્ધો બલિઃ પૂર્વં વામનેન મહાત્મના
ઇન્દ્રસ્ ત્રિભુવનાધ્યક્ષઃ કૃતસ્ તેન નૃપાત્મજ ॥

રામેણ ભૂત્વા ચ યથા વિષ્ણુના રાવણો હતઃ
સગણાશ્ ચાદ્ભુતા રાજન્ રાક્ષસા દેવકણ્ટકાઃ ॥

યથા પરશુરામેણ ક્ષત્રમ્ ઉત્સાદિતં પુરા
બલભદ્રેણ રામેણ યથા દૈત્યઃ પુરા હતઃ ॥

યથા કૃષ્ણેન કંસાદ્યા હતા દૈત્યાઃ સુરદ્વિષઃ
કલૌ પ્રાપ્તે યથા બુદ્ધો ભવેન્ નારાયણઃ પ્રભુઃ ॥

કલ્કિરૂપં સમાસ્થાય યથા મ્લેચ્છા નિપાતિતાઃ
સમાપ્તે તુ કલૌ ભૂયસ્ તથા તે કથયામ્ય્ અહમ્ ॥

હરેર્ અનન્તસ્ય પરાક્રમં યઃ શૃણોતિ ભૂપાલ સમાહિતાત્મા
મયોચ્યમાનં ચ વિમુચ્ય પાપં પ્રયાતિ વિષ્ણોઃ પદમ્ અત્યુદારમ્ ॥