Narasimha Purana · Chapter 36

avatārān ahaṃ vakṣye devadevasya cakriṇaḥ
tān śṛṇuṣva mahīpāla pavitrān pāpanāśanān //

yathā matsyena rūpeṇa dattā vedāḥ svayaṃbhuve
madhukaiṭabhau ca nidhanaṃ prāpitau ca mahātmanā //

yathā kaurmeṇa rūpeṇa viṣṇunā mandaro dhṛtaḥ
yathā pṛthvī dhṛtā rājan vārāheṇa mahātmanā //

tenaiva nidhanaṃ prāpto yathā rājan mahābalaḥ
hiraṇyākṣo mahāvīryo ditiputro mahātanuḥ //

yathā hiraṇyakaśipus tridaśānām ariḥ purā
narasiṃhena devena prāpito nidhanaṃ nṛpa //

yathā baddho baliḥ pūrvaṃ vāmanena mahātmanā
indras tribhuvanādhyakṣaḥ kṛtas tena nṛpātmaja //

rāmeṇa bhūtvā ca yathā viṣṇunā rāvaṇo hataḥ
sagaṇāś cādbhutā rājan rākṣasā devakaṇṭakāḥ //

yathā paraśurāmeṇa kṣatram utsāditaṃ purā
balabhadreṇa rāmeṇa yathā daityaḥ purā hataḥ //

yathā kṛṣṇena kaṃsādyā hatā daityāḥ suradviṣaḥ
kalau prāpte yathā buddho bhaven nārāyaṇaḥ prabhuḥ //

kalkirūpaṃ samāsthāya yathā mlecchā nipātitāḥ
samāpte tu kalau bhūyas tathā te kathayāmy aham //

harer anantasya parākramaṃ yaḥ śṛṇoti bhūpāla samāhitātmā
mayocyamānaṃ ca vimucya pāpaṃ prayāti viṣṇoḥ padam atyudāram //