નરસિંહપુરાણ · અધ્યાય 34

પુનર્ એવ દ્વિજશ્રેષ્ઠ માર્કણ્ડેય મહામતે
નિર્માલ્યાપનયાદ્ વિષ્ણોર્ યત્ પુણ્યં તદ્ વદસ્વ મે ॥

નિર્માલ્યમ્ અપનીયાથ તોયેન સ્નાપ્ય કેશવમ્
નરસિંહાકૃતિં રાજન્ સર્વપાપૈઃ પ્રમુચ્યતે ॥

સર્વતીર્થફલં પ્રાપ્ય યાનારૂઢો દિવં વ્રજેત્
શ્રીવિષ્ણોઃ સદનં પ્રાપ્ય મોદતે કાલમ્ અક્ષયમ્ ॥

આગચ્છ નરસિંહેતિ આવાહ્યાક્ષતપુષ્પકૈઃ
એતાવતાપિ રાજેન્દ્ર સર્વપાપૈઃ પ્રમુચ્યતે ॥

દત્ત્વાસનમ્ અથાર્ઘ્યં ચ પાદ્યમ્ આચમનીયકમ્
દેવદેવસ્ય વિધિના સર્વપાપૈઃ પ્રમુચ્યતે ॥

સ્નાપ્ય તોયેન પયસા નરસિંહં નરાધિપ
સર્વપાપવિનિર્મુક્તો વિષ્ણુલોકે મહીયતે ॥

સ્નાપ્ય દધ્ના સકૃદ્ યસ્ તુ નિર્મલઃ પ્રિયદર્શનઃ
વિષ્ણુલોકમ્ અવાપ્નોતિ પૂજ્યમાનઃ સુરોત્તમૈઃ ॥

યઃ કરોતિ હરેર્ અર્ચાં મધુના સ્નાપયન્ નરઃ
અગ્નિલોકે સ મોદિત્વા પુનર્ વિષ્ણુપુરે વસેત્ ॥

ઘૃતેન સ્નપનં યસ્ તુ સ્નાનકાલે વિશેષતઃ
નરસિંહાકૃતેઃ કુર્યાચ્ *છઙ્ખભેરીનિનાદિતમ્ ॥

પાપકઞ્ચુકમ્ ઉન્મુચ્ય યથા જીર્ણમ્ અહિસ્ ત્વચમ્
દિવ્યં વિમાનમ્ આસ્થાય વિષ્ણુલોકે મહીયતે ॥

પઞ્ચગવ્યેન દેવેશં યઃ સ્નાપયતિ ભક્તિતઃ
મન્ત્રપૂર્વં મહારાજ તસ્ય પુણ્યમ્ અનન્તકમ્ ॥

યશ્ ચ ગોધૂમકૈશ્ ચૂર્ણૈર્ ઉદ્વર્ત્યોષ્ણેન વારિણા
પ્રક્ષાલ્ય દેવદેવેશં વારુણં લોકમ્ આપ્નુયાત્ ॥

પાદપીઠં તુ યો ભક્ત્યા બિલ્વપત્રર્ નિર્ઘર્ષિતમ્
ઉષ્ણામ્બુના ચ પ્રક્ષાલ્ય સર્વપાપૈર્ પ્રમુચ્યતે ॥

કુશપુષ્પોદકૈઃ સ્નાત્વા બ્રહ્મલોકમ્ અવાપ્નુયાત્
રત્નોદકેન સાવિત્રં કૌબેરં હેમવારિણા
નરસિંહં તુ સંસ્નાપ્ય કર્પૂરાગુરુવારિણા ॥

ઇન્દ્રલોકે સ મોદિત્વા પશ્ચાદ્ વિષ્ણુપુરે વસેત્
પુણ્યોદકેન ગોવિન્દં સ્નાપ્ય ભક્ત્યા નરોત્તમ ॥

સાવિત્રં લોકમ્ આસાદ્ય વિષ્ણુલોકે મહીયતે
વસ્ત્રાભ્યામ્ અર્ચનં ભક્ત્યા પરિધાપ્ય હરિં હરેઃ ॥

સોમલોકે રમિત્વા ચ વિષ્ણુલોકે મહીયતે
કુઙ્કુમાગુરુશ્રીખણ્ડ કર્દમૈર્ અચ્યુતાકૃતિમ્ ॥

આલિપ્ય ભક્ત્યા રાજેન્દ્ર કલ્પકોટિં વસેદ્ દિવિ
મલ્લિકામાલતીજાતિ કેતક્યશોકચમ્પકૈઃ ॥

પુંનાગનાગબકુલૈઃ પદ્મૈર્ ઉત્પલજાતિભિઃ
તુલસીકરવીરૈશ્ ચ પાલાશૈઃ સાનુકુમ્બકૈઃ ॥

એતૈર્ અન્યૈશ્ ચ કુસુમૈઃ પ્રશસ્તૈર્ અચ્યુતં નરઃ
અર્ચયેદ્ દશસુવર્ણસ્ય પ્રત્યેકં ફલમ્ આપ્નુયાત્ ॥

માલાં કૃત્વા યથાલાભમ્ એતેષાં વિષ્ણુમ્ અર્ચયેત્
કલ્પકોટિસહસ્રાણિ કલ્પકોટિશતાનિ ચ ॥

દિવ્યાં વિમાનમ્ આસ્થાય વિષ્ણુલોકે સ મોદતે
નરસિંહં તુ યો ભક્ત્યા બિલ્વપત્રૈર્ અખણ્ડિતૈઃ ॥

નિશ્છિદ્રૈઃ પૂજયેદ્ યસ્ તુ તુલસીભિઃ સમન્વિતમ્
સર્વપાપવિનિર્મુક્તઃ સર્વભૂષણભૂષિતઃ ॥

કાઞ્ચનેન વિમાનેન વિષ્ણુલોકે મહીયતે
માહિષાખ્યં ગુગ્ગુલં ચ આજ્યયુક્તં સશર્કરમ્ ॥

ધૂપં દદાતિ રાજેન્દ્ર નરસિંહસ્ય ભક્તિમાન્
ધૂપિતૈઃ સર્વદિગ્ભ્યસ્ તુ સર્વપાપવિવર્જિતઃ ॥

અપ્સરોગણસંકીર્ણ વિમાનેન વિરાજતે
વાયુલોકે સ મોદિત્વા પશ્ચાદ્ વિષ્ણુપુરં વ્રજેત્ ॥

ઘૃતેન વાથ તૈલેન દીપં પ્રજ્વાલયેન્ નરઃ
વિષ્ણવે વિધિવદ્ ભક્ત્યા તસ્ય પુણ્યફલં શૃણુ ॥

વિહાય પાપકલિલં સહરાદિત્યસપ્રભઃ
જ્યોતિષ્મતા વિમાનેન વિષ્ણુલોકં સ ગચ્છતિ ॥

હવિઃ શાલ્યોદનં દિવાન્ આજ્યયુક્તં સશર્કરમ્
નિવેદ્ય નરસિંહાય યાવકં પાયસં તથા ॥

સમાસ્ તન્દુલસંખ્યાયા યાવતીસ્ તાવતીર્ નૃપ
વિષ્ણુલોકે મહાભોગાન્ ભુઞ્જન્ન્ આસ્તે સ વૈષ્ણવઃ ॥

બલિના વૈષ્ણવેનાથ તૃપ્તાઃ સન્તો દિવૌકસઃ
શાન્તિં તસ્ય પ્રયચ્છન્તિ શ્રિયમ્ આરોગ્યમ્ એવ ચ ॥

પ્રદક્ષિણેન ચૈકેન દેવદેવસ્ય ભક્તિતઃ
કૃતેન યત્ ફલં નૄણાં તચ્ છૃણુષ્વ નૃપાત્મજ ॥

પૃથ્વીપ્રદક્ષિણફલં પ્રાપ્ય વિષ્ણુપુરે વસેત્
નમસ્કારઃ કૃતો યેન ભક્ત્યા વૈ માધવસ્ય ચ ॥

ધર્માર્થકામમોક્ષાખ્યં ફલં તેનાપ્તમ્ અઞ્જસા
સ્તોત્રૈર્ જપૈશ્ ચ દેવાગ્રે યઃ સ્તૌતિ મધુસૂદનમ્ ॥

સર્વપાપવિનિર્મુક્તો વિષ્ણુલોકે મહીયતે
ગીતવાદ્યાદિકં નાટ્યં શઙ્ખતૂર્યાદિનિઃસ્વનૈઃ ॥

યઃ કારયતિ વૈ વિષ્ણોઃ સ યાતિ મન્દિરં નરઃ
પર્વકાલે વિશેષેણ કામગઃ કામરૂપવાન્ ॥

સુસંગીતવિદૈશ્ ચૈવ સેવ્યમાનો ઽપ્સરોગણૈઃ
મહાર્હમણિચિત્રેણ વિમાનેન વિરાજતા ॥

સ્વર્ગાત્ સ્વર્ગમ્ અનુપ્રાપ્ય વિષ્ણુલોકે મહીયતે
ધ્વજં તુ વિષ્ણવે યસ્ તુ ગરુડેન સમન્વિતમ્ ॥

દદ્યાત્ સો ઽપિ ધ્વજાકીર્ણ વિમાનેન વિરાજતા
વિષ્ણુલોકમ્ અવાપ્નોતિ સેવ્યમાનો ઽપ્સરોગણૈઃ ॥

સુવર્ણાભરણૈર્ દિવ્યૈર્ હારકેયૂરકુણ્ડલૈઃ
મુકુટાભરણાદ્યૈશ્ ચ યો વિષ્ણું પૂજયેન્ નૃપ ॥

સર્વપાપવિનિર્મુક્તઃ સર્વભૂષણભૂષિતઃ
ઇન્દ્રલોકે વસેદ્ ધીમાન્ યાવદ્ ઇન્દ્રાશ્ ચતુર્દશ ॥

યો ગાં પયસ્વિનીં વિષ્ણોઃ કપિલાં સંપ્રયચ્છતિ
આરાધ્ય તમ્ અથાગ્રે તુ યત્ કિંચિદ્ દગ્ધમ્ ઉત્તમમ્ ॥

તદ્ દત્ત્વા નરસિંહાય વિષ્ણુલોકે મહીયતે
પિતરસ્ તસ્ય મોદન્તે શ્વેતદ્વીપે ચિરં નૃપ ॥

એવં યઃ પૂજયેદ્ રાજન્ નરસિંહં નરોત્તમઃ
તસ્ય સ્વર્ગાપવર્ગૌ તુ ભવતો નાત્ર સંશયઃ ॥

યત્રૈવં પૂજ્યતે વિષ્ણુર્ નરસિંહો નરૈર્ નૃપ
ન તત્ર વ્યાધિદુર્ભિક્ષ રાજચૌરાદિકં ભયમ્ ॥

નરસિંહં સમારાધ્ય વિધિનાનેન માધવમ્
નાનાસ્વર્ગસુખં ભુક્ત્વા ન ભૂયઃ સ્તનપો ભવેત્ ॥

નિત્યં સર્પિસ્ તિલૈર્ હોમો ગ્રામે યસ્મિન્ પ્રવર્તતે
ન ભવેત્ તસ્ય ગ્રામસ્ય ભયં વા તત્ર કુત્રચિત્ ॥

અનાવૃષ્ટિર્ માહામારી દોષા નો દાહકા નૃપ
નરસિંહં સમારાધ્ય બ્રાહ્મણૈર્ વેદપારગૈઃ ॥

કારયેલ્ લક્ષહોમં તુ ગ્રામે યત્ર પુરાધિપઃ
કૃતે તસ્મિન્ મયોક્તે તુ આગચ્છતિ ન તદ્ભયમ્ ॥

દૃષ્ટોપસર્ગમરણં પ્રજાનામ્ આત્મનશ્ ચ હિ
સમ્યગારાધનીયં તુ નરસિંહસ્ય મન્દિરે ॥

શંકરાયતને ચાપિ કોટિહોમં નરાધિપ
કારયેત્ સંયતૈર્ વિપ્રૈઃ સભોજનસદક્ષિણૈઃ ॥

કૃતે તસ્મિન્ નૃપશ્રેષ્ઠ નરસિંહપ્રસાદતઃ
ઉપસર્ગાદિમરણં પ્રજાનામ્ ઉપશામ્યતિ ॥

દુઃસ્વપ્નદર્શને ઘોરે ગ્રહપીડાસુ ચાત્મનઃ
હોમં ચ ભોજનં ચૈવ તસ્ય દોષઃ પ્રણશ્યતિ ॥

અયને વિષુવે ચૈવ ચન્દ્રસૂર્યગ્રહે તથા
નરસિંહં સમારાધ્ય લક્ષહોમં તુ કારયેત્ ॥

શાન્તિર્ ભવતિ રાજેન્દ્ર તસ્ય તત્સ્થાનવાસિનામ્
એવમાદિફલોપેતં નરસિંહાર્ચનં નૃપ ॥

કુરુ ત્વં ભૂપતેઃ પુત્ર યદિ વાઞ્છસિ સદ્ગતિમ્
અતઃ પરતરં નાસ્તિ સ્વર્ગમોક્ષફલપ્રદમ્ ॥

નરેન્દ્રૈઃ સુકરં કર્તું દેવદેવસ્ય પૂજનમ્
સન્ત્ય્ અરણ્યે હ્ય્ અમૂલ્યાનિ પત્રપુષ્પાણિ શાખિનામ્ ॥

તોયં નદીતડાગેષુ દેવઃ સાધારણઃ સ્થિતઃ
મનો નિયમયેદ્ એકં વિદ્યાસાધનકર્મણિ ॥

મનો નિયમિતં યેન મુક્તિસ્ તસ્ય કરે સ્થિતા ॥

ઇત્ય્ એવમ્ ઉક્તં ભૃગુચોદિતેન મયા તવેહાર્ચનમ્ અચ્યુતસ્ય
દિને દિને ત્વં કુરુ વિષ્ણુપૂજાં વદસ્વ ચાન્યત્ કથયામિ કિં તે ॥