નારદ પુરાણ · અધ્યાય 1.95

ઇતિ શ્રીબૃહન્નારદીયપુરાણે પૂર્વભાગે બૃહદુપાખ્યાને ચતુર્થપાદે વિષ્ણુપુરાણાનુક્રમણીનિરૂપણં નામ ચતુર્નવતિતમો ઽધ્યાયઃ
બ્રહ્મોવાચ
શૃણુ વિપ્ર પ્રવક્ષ્યામિ પુરાણં વાયવીયકમ્ ।
યસ્મિઞ્ચ્છ્રુતે લભદ્ધામ રુદ્રસ્ય પરમાત્મનઃ

ચતુર્વિંશતિસાહસ્રં તત્પુરાણં પ્રકીર્તિતમ્ ।
શ્વેતકલ્પપ્રસંગેન ધર્માનત્રાહ મારુતઃ

તદ્બાયવીયનુદિતં ભાગદ્વયસમન્વિતમ્ ।
સર્ગાદિલક્ષણં યત્ર પ્રોક્તં વિપ્ર સવિસ્તરમ્

મન્વન્તરેષુ વંશાશ્ચ રાજ્ઞાં યે યત્ર કીર્તિતાઃ ।
ગયાસુરસ્ય હનનં વિસ્તરાદ્યત્ર કીર્તિતમ્

માસાનાં ચૈવ માહાત્મ્યં માઘસ્યોક્તં ફલાધિકમ્ ।
દાનધર્મા રાજધર્મા વિસ્તરેણોદિતા સ્તથા

ભૂપાતાલકકુબ્વ્યોમચારિણાં યત્ર નિર્ણયઃ ।
વ્રતાદીનાં ચ પૂર્વો ઽયં વિભાગઃ સમુદાહૃતઃ

ઉત્તરે તસ્ય ભાગેતુ નર્મદાતીર્થવર્ણનમ્ ।
શિવસ્ય સંહિતોક્તા વૈ વિસ્તરેણ મુનીશ્વર

યો દેવઃ સર્વદેવાનાં દુર્વિજ્ઞેયઃ સનાતનઃ ।
સ તુ સર્વાત્મના યસ્યાસ્તીરે તિષ્ઠતિ સંતતમ્

ઇદં બ્રહ્મા હારીરિદં સાક્ષાચ્ચેદં પરો હરઃ ।
ઇદં બ્રહ્મ નિરાકારં કૈવલ્યં નર્મદાજલમ્

ધ્રુવં લોકહિતાર્થાય શિવેન સ્વશરીરતઃ ।
શક્તિઃ કાપિ સરિદૃપા રેવેયમવતારિતા

યે વસંત્યુત્તરે કૂલે રુદ્રસ્યાનુચરા હિ તે ।
વસંતિ યામ્યતીરે યે લોકં તે યાન્તિ વૈષ્ણવમ્

ઓઙ્કારેશ્વરમારભ્યયાવત્પશ્ચિમસાગરઃ ।
સંગમાઃ પઞ્ચ ચ ત્રિંશન્નદીનાં પાપનાશની

દશૈકમુત્તરે તીરે ત્રયોવિંશતિર્દક્ષિણે ।
પઞ્ચત્રિંશત્તમઃ પ્રોક્તો રેવાસાગરસગમઃ

સંગમૈઃ સહિતાન્યેવ રેવાતીરદ્વયે ઽપિ ચ ।
ચતુઃશતાનિ તીર્થાનિ પ્રસિદ્ધાનિ ચ સંતિ હિ

ષષ્ટિતીર્થસહસ્રાણિ ષષ્ટિકોટ્યો મુનીશ્વર ।
સંતિ ચાન્યાનિ રેવાયાસ્તીરયુગ્મે પદે પદે

સંહિતેયં મહાપુણ્યા શિવસ્ય પરમાત્મનઃ ।
નર્મદાચરિતં યત્ર વાયુના પરિકીર્તિતમ્

લિખિત્વેદં પુરાણં તુ ગુડધેનુસમન્વિતમ્ ।
શ્રાવણ્યાં યો દદેદ્ભક્ત્યા બ્રાહ્મણાય કુટુંબિને

રુદ્રલોકે વસેત્સો ઽપિ યાવદિન્દ્રાશ્ચતુર્દ્દશ ।
યઃ શ્રાવયેદ્વા શૃણુયાદ્વાયવીયમિદં નરઃ

નિયમેન હવિષ્યાશી સ રુદ્રો નાત્ર સંશયઃ ।
યશ્ચાનુક્રમણીમેતાં શૃણોતિ શ્રાવયેત્તથા

સો ઽપિ સર્વપુરાણસ્ય ફલં શ્રવણજં લભેત્