Narada Purana · Chapter 1.95

iti śrībṛhannāradīyapurāṇe pūrvabhāge bṛhadupākhyāne caturthapāde viṣṇupurāṇānukramaṇīnirūpaṇaṃ nāma caturnavatitamo 'dhyāyaḥ
brahmovāca
śṛṇu vipra pravakṣyāmi purāṇaṃ vāyavīyakam /
yasmiñcchrute labhaddhāma rudrasya paramātmanaḥ

caturviṃśatisāhasraṃ tatpurāṇaṃ prakīrtitam /
śvetakalpaprasaṃgena dharmānatrāha mārutaḥ

tadbāyavīyanuditaṃ bhāgadvayasamanvitam /
sargādilakṣaṇaṃ yatra proktaṃ vipra savistaram

manvantareṣu vaṃśāśca rājñāṃ ye yatra kīrtitāḥ /
gayāsurasya hananaṃ vistarādyatra kīrtitam

māsānāṃ caiva māhātmyaṃ māghasyoktaṃ phalādhikam /
dānadharmā rājadharmā vistareṇoditā stathā

bhūpātālakakubvyomacāriṇāṃ yatra nirṇayaḥ /
vratādīnāṃ ca pūrvo 'yaṃ vibhāgaḥ samudāhṛtaḥ

uttare tasya bhāgetu narmadātīrthavarṇanam /
śivasya saṃhitoktā vai vistareṇa munīśvara

yo devaḥ sarvadevānāṃ durvijñeyaḥ sanātanaḥ /
sa tu sarvātmanā yasyāstīre tiṣṭhati saṃtatam

idaṃ brahmā hārīridaṃ sākṣāccedaṃ paro haraḥ /
idaṃ brahma nirākāraṃ kaivalyaṃ narmadājalam

dhruvaṃ lokahitārthāya śivena svaśarīrataḥ /
śaktiḥ kāpi saridṛpā reveyamavatāritā

ye vasaṃtyuttare kūle rudrasyānucarā hi te /
vasaṃti yāmyatīre ye lokaṃ te yānti vaiṣṇavam

oṅkāreśvaramārabhyayāvatpaścimasāgaraḥ /
saṃgamāḥ pañca ca triṃśannadīnāṃ pāpanāśanī

daśaikamuttare tīre trayoviṃśatirdakṣiṇe /
pañcatriṃśattamaḥ prokto revāsāgarasagamaḥ

saṃgamaiḥ sahitānyeva revātīradvaye 'pi ca /
catuḥśatāni tīrthāni prasiddhāni ca saṃti hi

ṣaṣṭitīrthasahasrāṇi ṣaṣṭikoṭyo munīśvara /
saṃti cānyāni revāyāstīrayugme pade pade

saṃhiteyaṃ mahāpuṇyā śivasya paramātmanaḥ /
narmadācaritaṃ yatra vāyunā parikīrtitam

likhitvedaṃ purāṇaṃ tu guḍadhenusamanvitam /
śrāvaṇyāṃ yo dadedbhaktyā brāhmaṇāya kuṭuṃbine

rudraloke vasetso 'pi yāvadindrāścaturddaśa /
yaḥ śrāvayedvā śṛṇuyādvāyavīyamidaṃ naraḥ

niyamena haviṣyāśī sa rudro nātra saṃśayaḥ /
yaścānukramaṇīmetāṃ śṛṇoti śrāvayettathā

so 'pi sarvapurāṇasya phalaṃ śravaṇajaṃ labhet