નારદ પુરાણ · અધ્યાય 1.105

ઇતિ શ્રીબૃહન્નારદીય પુરાણે પૂર્વભાગે બૃહદુપાખ્યાને ચતુર્થપાદે સ્કન્દપુરાણાનુક્રમણીવર્ણનં નામ ચતુરધિકશતતમો ઽધ્યાયઃ
બ્રહ્મોવાચ
શૃણુ વત્સ પ્રવક્ષ્યામિ પુરાણં વામનાભિધમ્ ।
ત્રિવિક્રમચરિત્રાઢ્યં દશસાહસ્રસંખ્યકમ્

કૂર્મકલ્પસમાખ્યાનં વર્ગત્રયકથાનમ્ ।
ભાગદ્વયસમાયુક્તં વક્તૃશ્રોતૃશુભાવહમ્

પુરાણપ્રશ્નઃ પ્રથમં બ્રહ્મશીર્ષચ્છિદા તતઃ ।
કપાલમોચનાખ્યાનં દક્ષયજ્ઞવિહિંસનમ્

હરસ્ય કાલરૂપાખ્યા કામસ્ય દહનં તતઃ ।
પ્રહ્લાદનારાયણયોર્યુદ્ધં દેવાસુરાહવઃ

સુકેશ્યર્કસમાખ્યાનં તતો ભુવનકોશકમ્ ।
તતઃ કામ્યવ્રતાખ્યાનં શ્રીદુર્ગાચરિતં તતઃ

તપતીચરિતં પશ્ચાત્કુરુક્ષેત્રસ્ય વર્ણનમ્ ।
સત્યામાહાત્મ્યમતુલં પાર્વતીજન્મકીર્તનમ્

તપસ્તસ્યા વિવાહશ્ચ ગૌર્યુપાખ્યાનકં તતઃ ।
તતઃ કૌશિક્યુપાખ્યાનં કુમારચરિતં તતઃ

તતો ઽન્ધકવધાખ્યાનંસાધ્યોપાખ્યાનકન્તતઃ ।
જાબાલિચરિતં પશ્ચાદરજાયાઃ કથાદ્ભુતા

અન્ધકેશરયોર્યુદ્ધં ગણત્વં ચાન્ધકસ્ય ચ ।
મરુતાં જન્મકથનં બલેશ્ચ ચરિતં તતઃ

તતસ્તુ લક્ષ્મ્યાશ્ચરિતં ત્રૈવિક્રમમતઃ પરમ્ ।
પ્રહ્લાદતીર્થયાત્રાયાં પ્રોચ્યન્તે ઽથ કથાઃ શુભાઃ

તતશ્ચ ધુન્ધુ ચરિતં પ્રેતોપાખ્યાનકં તતઃ ।
નક્ષત્રપુરુષાખ્યાનં શ્રીદામચરિતં તતઃ

ત્રિવિક્રમચરિત્રાન્તે બ્રહ્મપ્રોક્તઃ સ્તવોત્તમઃ ।
પ્રહ્લાદબલિસંવાદે સુતલે હરિશંસનમ્

ઇત્યેષ પૂર્વભાગો ઽસ્ય પુરાણસ્ય તવોદિતઃ ।
શૃણ્ણતો ઽસ્યોત્તરં ભાગં બહદ્વામનસંજ્ઞકમ્

માહેશ્વરી ભાગવતી સૌરી ગાણેશ્વરી તથા ।
ચતસ્રઃ સંહિતાશ્ચાત્ર પૃથક્ સાહસ્રસંખ્યયા

માહેશ્વર્યાં તુ કૃષ્ણસ્ય તદ્ભક્તાનાં ચ કીર્તનમ્ ।
ભાગવત્યાં જગન્માતુખતારકથાદ્ભુતા

સૌર્યાં સૂર્યસ્ય મહિમા ગદિતઃ પાપનાશનઃ ।
ગાણેશ્વર્યાં ગણેશસ્ય ચરિતં ચ મહેશિતુઃ

ઇત્યેતદ્વામનં નામ પુરાણં સુવિચિત્રકમ્ ।
પુલસ્ત્યેન સમાખ્યાતં નારદાય મહાત્મને

તતો નારદતઃ પ્રાપ્તં વ્યાસેન સુમહાત્મના ।
વ્યાસાત્તુ લબ્ધવાંશ્ચૈતત્ તચ્છિષ્યો રોમહર્ષણઃ

સ ચાખ્યાસ્યતિ વિપ્રેભ્યો નૈમિષીયેભ્ય એવ ચ ।
એવં પરંપરાપ્રાપ્તં પુરાણં વામનં શુભમ્

યે પઠન્તિ ચ શૃણ્વન્તિ તે ઽપિ યાન્તિ પરાં ગતિમ્ ।
લિખિત્વૈતત્પુરાણં તુ યઃ શરદ્વિષુવેર્ઽપયેત્

વિપ્રાય વેદવિદુષે ઘૃતધેનુસમન્વિતમ્ ।
સ સમુદ્ધૃત્ય નરકાન્નયેત્સ્વર્ગં પિતૄન્સ્વકાન્
દેહાન્તે ભુક્તભોગો ઽસૌ યાતિ વિષ્ણોઃ પરં પદમ્