Scripture Library

Narada Purana · Chapter 1.105

1.105.1

iti śrībṛhannāradīya purāṇe pūrvabhāge bṛhadupākhyāne caturthapāde skandapurāṇānukramaṇīvarṇanaṃ nāma caturadhikaśatatamo 'dhyāyaḥ
brahmovāca
śṛṇu vatsa pravakṣyāmi purāṇaṃ vāmanābhidham /
trivikramacaritrāḍhyaṃ daśasāhasrasaṃkhyakam

1.105.2

kūrmakalpasamākhyānaṃ vargatrayakathānam /
bhāgadvayasamāyuktaṃ vaktṛśrotṛśubhāvaham

1.105.3

purāṇapraśnaḥ prathamaṃ brahmaśīrṣacchidā tataḥ /
kapālamocanākhyānaṃ dakṣayajñavihiṃsanam

1.105.4

harasya kālarūpākhyā kāmasya dahanaṃ tataḥ /
prahlādanārāyaṇayoryuddhaṃ devāsurāhavaḥ

1.105.5

sukeśyarkasamākhyānaṃ tato bhuvanakośakam /
tataḥ kāmyavratākhyānaṃ śrīdurgācaritaṃ tataḥ

1.105.6

tapatīcaritaṃ paścātkurukṣetrasya varṇanam /
satyāmāhātmyamatulaṃ pārvatījanmakīrtanam

1.105.7

tapastasyā vivāhaśca gauryupākhyānakaṃ tataḥ /
tataḥ kauśikyupākhyānaṃ kumāracaritaṃ tataḥ

1.105.8

tato 'ndhakavadhākhyānaṃsādhyopākhyānakantataḥ /
jābālicaritaṃ paścādarajāyāḥ kathādbhutā

1.105.9

andhakeśarayoryuddhaṃ gaṇatvaṃ cāndhakasya ca /
marutāṃ janmakathanaṃ baleśca caritaṃ tataḥ

1.105.10

tatastu lakṣmyāścaritaṃ traivikramamataḥ param /
prahlādatīrthayātrāyāṃ procyante 'tha kathāḥ śubhāḥ

1.105.11

tataśca dhundhu caritaṃ pretopākhyānakaṃ tataḥ /
nakṣatrapuruṣākhyānaṃ śrīdāmacaritaṃ tataḥ

1.105.12

trivikramacaritrānte brahmaproktaḥ stavottamaḥ /
prahlādabalisaṃvāde sutale hariśaṃsanam

1.105.13

ityeṣa pūrvabhāgo 'sya purāṇasya tavoditaḥ /
śṛṇṇato 'syottaraṃ bhāgaṃ bahadvāmanasaṃjñakam

1.105.14

māheśvarī bhāgavatī saurī gāṇeśvarī tathā /
catasraḥ saṃhitāścātra pṛthak sāhasrasaṃkhyayā

1.105.15

māheśvaryāṃ tu kṛṣṇasya tadbhaktānāṃ ca kīrtanam /
bhāgavatyāṃ jaganmātukhatārakathādbhutā

1.105.16

sauryāṃ sūryasya mahimā gaditaḥ pāpanāśanaḥ /
gāṇeśvaryāṃ gaṇeśasya caritaṃ ca maheśituḥ

1.105.17

ityetadvāmanaṃ nāma purāṇaṃ suvicitrakam /
pulastyena samākhyātaṃ nāradāya mahātmane

1.105.18

tato nāradataḥ prāptaṃ vyāsena sumahātmanā /
vyāsāttu labdhavāṃścaitat tacchiṣyo romaharṣaṇaḥ

1.105.19

sa cākhyāsyati viprebhyo naimiṣīyebhya eva ca /
evaṃ paraṃparāprāptaṃ purāṇaṃ vāmanaṃ śubham

1.105.20

ye paṭhanti ca śṛṇvanti te 'pi yānti parāṃ gatim /
likhitvaitatpurāṇaṃ tu yaḥ śaradviṣuver'payet

1.105.21

viprāya vedaviduṣe ghṛtadhenusamanvitam /
sa samuddhṛtya narakānnayetsvargaṃ pitṝnsvakān
dehānte bhuktabhogo 'sau yāti viṣṇoḥ paraṃ padam

Original text: Nāradapurāṇa (or Nāradīyapurāṇa) · Data entry members of the Sansknet Project · GRETIL (Göttingen) · CC BY-NC-SA 4.0