નારદ પુરાણ · અધ્યાય 1.103

ઇતિ શ્રીબૃહન્નારદીયપુરાણે પૂર્વભાગે બૃહદુપાખ્યાને ચતુર્થપાદે લિઙ્ગપુરાણાનુક્રમણીનિરૂપણં નામ દ્વ્યુત્તરશતતમો ઽધ્યાયઃ
બ્રહ્મોવાચ
શૃણુ વત્સ પ્રવક્ષ્યામિ વારાહં વૈ પુરાણકમ્ ।
ભાગદ્વયયુતં શશ્વદ્વિષ્ણુમાહાત્મ્યસૂચકમ્

માનવસ્ય તુ કલ્પસ્ય પ્રસંગં મત્કૃતં પુરા ।
નિબબન્ધ પુરાણે ઽસ્મિંશ્ચતુર્વિંશસહસ્રકે

વ્યાસો હિ વિદુષાં શ્રેષ્ઠઃ સાક્ષાન્નારાયણો ભુવિ ।
તત્રાદૌ શુભસંવાદઃ સ્મૃતોભૂમિવરાહયોઃ

અથાદિકૃતવૃત્તાન્તે રંભસ્ય ચરિતં તતઃ ।
દુર્જયસ્ય ચ તત્પશ્ચાચ્છ્રાદ્ધકલ્પ ઉદીરિતઃ

મહાતપસ આખ્યાનં ગૌર્યુત્પત્તિસ્તતઃ પરા ।
વિનાયકસ્ય નાગાનાં સેનાન્યાદિત્યયોરપિ

ગણાનાં ચ તથા દેવ્યા ધનદસ્ય વૃષસ્ય ચ ।
આખ્યાનં સત્યતપસો વ્રતાખ્યાનસમન્વિતમ્

અગસ્ત્યગીતા તત્પશ્ચાદ્રુદ્રગીતા પ્રકીર્તિતા ।
મહિષાસુરવિધ્વંસમાહાત્મ્યં ચ ત્રિશક્તિજમ્

પર્વાધ્યાયસ્તતઃ શ્વેતોપાખ્યાનં ગોપ્રદાનિકમ્ ।
ઇત્યાદિ કૃતવૃત્તાન્તં પ્રથમે દર્શિતં મયા

ભગવદ્ધર્મકે પશ્ચાદ્વતતીર્થકથાનકમ્ ।
દ્વાત્રિંશદપરાધાનાં પ્રાયશ્ચિત્તં શરીરગમ્

તીર્થાનાં ચાપિ સર્વેષાં માહાત્મ્યં પૃથગીરિતમ્ ।
મથુરાયા વિશેષેણ શ્રાદ્ધાદીનાં વિધિસ્તતઃ

વર્ણનં યમલોકસ્ય ઋષિપુત્રપ્રસંગતઃ ।
વિપાકઃ કર્મણાં ચૈવ વિષ્ણુવ્રતનિરૂપણમ્

ગોકર્ણસ્ય ચ માહાત્મ્યં કીર્તિતં પાપનાશનમ્ ।
ઇત્યેવં પૂર્વભાગો ઽયં પુરાણસ્ય નિરૂપિતઃ

ઉત્તરે પ્રવિભાગે તુ પુલસ્ત્યકુરુરાજયોઃ ।
સંવાદે સર્વતીર્થાનાં માહાત્મ્યં વિસ્તરાત્પૃથક્

અશેષધર્માશ્ચાખ્યાતાઃ પૌષ્કરં પુણ્યપર્વ ચ ।
ઇત્યેવં તવ વારાહં પ્રોક્તં પાપવિનાશનમ્

પઠતાં શૃણ્વતાં ચૈવ ભગવદ્ભક્તિવર્ધનમ્ ।
કાઞ્ચનં ગરુડ કૃત્વા તિલધેનુસમન્વિતમ્

લિખિત્વૈતચ્ચ યો દદ્યાચ્ચૈત્ર્યાં વિપ્રાય ભક્તિતઃ ।
સ લભેદ્વૈષ્ણવં ધામ દેવર્ષિગણવન્દિતઃ

યો વાનુક્રમણીમેન્તાં શૃણોત્યપિ પઠત્યપિ ।
સો ઽપિ ભક્તિં લભેદ્વિષ્ણૌ સંસારોચ્છેદકારિણીમ્