Narada Purana · Chapter 1.103

iti śrībṛhannāradīyapurāṇe pūrvabhāge bṛhadupākhyāne caturthapāde liṅgapurāṇānukramaṇīnirūpaṇaṃ nāma dvyuttaraśatatamo 'dhyāyaḥ
brahmovāca
śṛṇu vatsa pravakṣyāmi vārāhaṃ vai purāṇakam /
bhāgadvayayutaṃ śaśvadviṣṇumāhātmyasūcakam

mānavasya tu kalpasya prasaṃgaṃ matkṛtaṃ purā /
nibabandha purāṇe 'smiṃścaturviṃśasahasrake

vyāso hi viduṣāṃ śreṣṭhaḥ sākṣānnārāyaṇo bhuvi /
tatrādau śubhasaṃvādaḥ smṛtobhūmivarāhayoḥ

athādikṛtavṛttānte raṃbhasya caritaṃ tataḥ /
durjayasya ca tatpaścācchrāddhakalpa udīritaḥ

mahātapasa ākhyānaṃ gauryutpattistataḥ parā /
vināyakasya nāgānāṃ senānyādityayorapi

gaṇānāṃ ca tathā devyā dhanadasya vṛṣasya ca /
ākhyānaṃ satyatapaso vratākhyānasamanvitam

agastyagītā tatpaścādrudragītā prakīrtitā /
mahiṣāsuravidhvaṃsamāhātmyaṃ ca triśaktijam

parvādhyāyastataḥ śvetopākhyānaṃ gopradānikam /
ityādi kṛtavṛttāntaṃ prathame darśitaṃ mayā

bhagavaddharmake paścādvatatīrthakathānakam /
dvātriṃśadaparādhānāṃ prāyaścittaṃ śarīragam

tīrthānāṃ cāpi sarveṣāṃ māhātmyaṃ pṛthagīritam /
mathurāyā viśeṣeṇa śrāddhādīnāṃ vidhistataḥ

varṇanaṃ yamalokasya ṛṣiputraprasaṃgataḥ /
vipākaḥ karmaṇāṃ caiva viṣṇuvratanirūpaṇam

gokarṇasya ca māhātmyaṃ kīrtitaṃ pāpanāśanam /
ityevaṃ pūrvabhāgo 'yaṃ purāṇasya nirūpitaḥ

uttare pravibhāge tu pulastyakururājayoḥ /
saṃvāde sarvatīrthānāṃ māhātmyaṃ vistarātpṛthak

aśeṣadharmāścākhyātāḥ pauṣkaraṃ puṇyaparva ca /
ityevaṃ tava vārāhaṃ proktaṃ pāpavināśanam

paṭhatāṃ śṛṇvatāṃ caiva bhagavadbhaktivardhanam /
kāñcanaṃ garuḍa kṛtvā tiladhenusamanvitam

likhitvaitacca yo dadyāccaitryāṃ viprāya bhaktitaḥ /
sa labhedvaiṣṇavaṃ dhāma devarṣigaṇavanditaḥ

yo vānukramaṇīmentāṃ śṛṇotyapi paṭhatyapi /
so 'pi bhaktiṃ labhedviṣṇau saṃsārocchedakāriṇīm