મોક્ષોપાય · અધ્યાય 6.238

અથ રાઘવ રુદ્રં તં તદા તસ્મિન્ મહામ્બરે ।
પ્રવૃત્તં નર્તિતું મત્તમ્ અપશ્યં વિતતાકૃતિમ્ ॥

વ્યોમેવાકૃતિમ્ આપન્નમ્ અજહદ્વ્યાપિતાં નિજામ્ ।
મહાકારં ઘનશ્યામં દશાશાપરિપૂરકમ્ ॥

અર્કેન્દુવહ્નિનયનં ચલદ્દશદિગમ્બરમ્ ।
ઘનદીર્ઘપ્રભાજાલમ્ આલાનં શ્યામલત્વિષામ્ ॥

વાડવાગ્નિદૃશં લોલભુજોર્મિભરભાસુરમ્ ।
એકાર્ણવાર્ણો દ્રાગ્ દેહબન્ધેનેવ સમુત્થિતમ્ ॥

પશ્યામ્ય્ અનન્તરમ્ અહં યાવત્ તસ્ય શરીરતઃ ।
છાયેવ પરિનિર્યાતિ નર્તનાનુવિધાયિની ॥

સૂર્યેષ્વ્ અવિદ્યમાનેષુ મહાતમસિ મન્થરે ।
સ્થિતે કથમ્ ઇયં છાયા ભવેદ્ ઇતિ મતિર્ મમ ॥

યાવદ્ વિચારયામ્ય્ આશુ તાવત્ તસ્ય તદા પુરઃ ।
સા સ્થિતા પરિનૃત્યન્તી વિશીર્ણા સ્ત્રી ત્રિલોચના ॥

કૃષ્ણા કૃશા સિરાલાઙ્ગી જર્જરા વિકૃતાકૃતિઃ ।
જ્વાલાકુલાનલાલોલવનસમ્ભારશેખરા ॥

ભિન્નાઞ્જનતમશ્શ્યામા યામિનીવાકૃતિં ગતા ।
તમશ્શ્રીર્ દેહયુક્તેવ સાકારેવામ્બરદ્યુતિઃ ॥

અતિદીર્ઘા કરાલાસ્યા નભો માતુમ્ ઇવોદ્યતા ।
દીર્ઘજાનુભુજભ્રાન્ત્યા માતુકામેવ દિઙ્મુખમ્ ॥

કૃશા બહૂપવાસેવ પરિનિમ્નમહાહનુઃ ।
કજ્જલશ્યામલા મેઘમાલેવ પવનાકુલા ॥

કૃશાશક્તા યદોત્થાતું સુદીર્ઘા વિધિના તદા ।
ગ્રથિતેવ સિરારૂપૈર્ દામભિર્ દૈર્ઘ્યશાલિભિઃ ॥

તથા નામ સુદીર્ઘા સા યથા તસ્યાશ્ શિરẖખુરમ્ ।
મયા દૃષ્ટં પ્રયત્નેન ચિરોર્ધ્વાધોગમાગમૈઃ ॥

આર્દ્રાન્ત્રતન્ત્રીગ્રથિતશિરẖખુરકરોત્કરા ।
અમૂલા સૂત્રવલિતા કણ્ટકાનામ્ ઇવ સ્થલી ॥

વિશ્વરૂપા યમાર્કાદિશિરẖકમલજાલકૈઃ ।
કૃતમાલામલાલોકવાન્તવહ્નિમયાચલા ॥

પ્રલમ્બકર્ણા લુલિતનાસા નૃશિરકુણ્ડલા ।
શુષ્કતુમ્બીલતાષ્ઠીવા દીર્ઘલોલાસિતસ્તની ॥

કુમારબર્હિપિઞ્છૌઘબ્રાહ્મમૂર્ધજમણ્ડલૈઃ ।
લાઞ્છિતોચ્ચસુરાધીશશિરẖખટ્વાઙ્ગમણ્ડલા ॥

દન્તેન્દુમાલાવિમલોદ્દ્યોતપીતતમોઽર્ણવા ।
કૃષ્ણોચ્ચૈર્ ધૂમલેખેવ વૃત્તાવર્તવિવર્તિની ॥

શુષ્કતુમ્બીલતેવોચ્ચૈર્ આકાશતરુસંશ્રિતા ।
વિલોલાવયવાષ્ઠીવા વાતૈḫ પટપટારવા ॥

બૃહત્તરઙ્ગોર્ધ્વભુજા શ્યામલોલ્લાસશાલિની ।
એકાર્ણવોર્મિમાલેવ નૃત્તાવર્તવિવર્તિની ॥

ક્ષણમ્ એકભુજાકારા ક્ષણં બહુભુજાકુલા ।
અનન્તોગ્રભુજા ક્ષિપ્રં જગન્નર્તનમણ્ડપા ॥

ક્ષિપ્રમ્ એકમુખાકારા ક્ષિપ્રં બહુમુખાકૃતિઃ ।
અનન્તોગ્રમુખી ક્ષિપ્રં નિર્મુખી વાપિ ચ ક્ષણમ્ ॥

એકપાદાન્વિતા ક્ષિપ્રં ક્ષિપ્રં પાદશતાન્વિતા ।
ક્ષણં ચાનન્તપાદાઢ્યા નિષ્પાદાકારિણી ક્ષણમ્ ॥

કાલરાત્રિર્ ઇયં સેતિ મયાનુમિતદેહિકા ।
કાલી ભગવતી સેયમ્ ઇતિ નિર્ણીતસઞ્ચરા ॥

જ્વાલાપૂર્ણારઘટ્ઠોગ્રખાતાભનયનત્રયા ।
જ્વલદ્વરેન્દ્રનીલાદ્રિસાનૂપમલલાટભૂઃ ॥

લોકાલોકેન્દ્રનીલાગ્રશ્વભ્રભીમહનુદ્વયા ।
વાતસ્કન્ધગુણપ્રોતતારામુક્તાકલાપિની ॥

ઇન્દ્રનીલાદ્રિતુલ્યોરુતોરણોચ્ચે પ્રભાસુરે ।
વિશ્રાન્તકાચશૈલાભભગભીષણવાયસા ॥

નૃત્યદ્ભુજલતાપુષ્પૈર્ નખશુભ્રાભ્રમણ્ડલૈઃ ।
પૂર્ણચન્દ્રશતાનીવ ભ્રમયન્તી નભસ્તલે ॥

ભ્રમદ્ભિર્ વ્યાપ્તદિક્ચક્રા ભુજૈẖ કલ્પામ્બુદૈર્ ઇવ ।
વર્ષદ્ભિḫ પાણિજપ્રાન્તતારાલેખાબૃહત્પ્રભાઃ ॥

નખપુષ્પાઙ્ગુલીવલ્લીજાલૈર્ ભ્રાન્તભુજદ્રુમૈઃ ।
કૃષ્ણૈẖ કાનનિતાશેષગગનાગ્રોગ્રમૂર્તિભિઃ ॥

તમાલતાલતન્મૂલમ્ અવદગ્ધં મહાનલૈઃ ।
વિડમ્બયન્તી ચલિતં જઙ્ઘાસઙ્ઘેન ચોપતા ॥

અપ્ય્ અનન્તે મહાવ્યોમ્નિ પારં પ્રાપ્તૈશ્ શિરોરુહૈઃ ।
કુર્વાણેવાતતં વાસવનં તિમિરદન્તિનઃ ॥

ઉહ્યન્તે મેરવો યેન તેન નિશ્શ્વાસવાયુના ।
ઘનઘુઙ્ઘુમદિગ્વક્ત્રગગનોગ્રાઙ્ગઘોષિણા ॥

ઘનમારુતઘૂત્કારૈẖ ક્ષ્વેડાગેયં પ્રગાયતા ।
નિયતાનુનયેનેવ વલિતાસ્યાનુવૃત્તિના ॥

તતો નૃત્તવશાવેશાદ્ વર્ધમાનશરીરિણી ।
મયા દૃષ્ટાવધાનેન ગગનાભોગપૂરિણી ॥

યાવત્ તયા ધૃતા દેહે હેલાવલનસારવા ।
માલા મલયકૈલાસસહ્યમન્દરમેરુભિઃ ॥

આસંસ્ તસ્યા યુગાન્તાભ્રમાલિકાḫ પટ્ટપટ્ટિકાઃ ।
આદર્શમણ્ડલાન્ય્ અગ્રે ત્રીણિ લોકાન્તરાણિ ચ ॥

કર્ણયોર્ હિમવન્મેરૂ રુપ્યકાઞ્ચનપુત્રિકે ।
બ્રહ્માણ્ડઘુર્ઘુરૈર્ માલા મહતી કટિમેખલા ॥

સ્રજẖ કુલાચલૈશ્ શૃઙ્ગવનપત્તનગુચ્છકાઃ ।
તરત્પુરવરદ્વીપગ્રામપેલવપલ્લવાઃ ॥

અસ્યા અઙ્ગેષુ દૃષ્ટાનિ પુરાણિ નગરાણિ ચ ।
ઋતવશ્ ચ ત્રયો લોકા માસાહોરાત્રમાલિકાઃ ॥

મુક્તાલતાદિકં નદ્યẖ કાલિન્દીત્રિપથાદિકાઃ ।
ધર્માધર્માવ્ ઉભૌ કર્ણભૂષણે ચાન્યકર્ણયોઃ ॥

સ્તનાસ્ તસ્યાસ્ તુ ચત્વારસ્ સ્રવદ્ધર્મપયોલવાઃ ।
વેદાસ્ સકલશાસ્ત્રાર્થચતુસ્સંસ્થાનચૂચુકાઃ ॥

ત્રિશૂલૈḫ પટ્ટિસૈḫ પ્રાસૈશ્ શરશક્ત્યૃષ્ટિમુદ્ગરૈઃ ।
નિર્યદાયુધજાલાનિ સ્રગ્દામાનિ બિભર્તિ સા ॥

ચતુર્દશવિધા ભૂતજાતયો યાસ્ સુરાદિકાઃ ।
તસ્યાશ્ શરીરશાયિન્યસ્ તા લોમાવલયસ્ સ્થિતાઃ ॥

તસ્યાશ્ ચ નગરગ્રામગિરયો દેહશાયિનઃ ।
નૃત્યન્ત્યાસ્ સહ નૃત્યન્તિ પુનર્જન્મમુદેવ તે ॥

જઙ્ગમાત્મકમ્ એવૈતજ્ જગદ્ અસ્થાવરં તદા ।
નૃત્યતીતિ મયા જ્ઞાતં પરલોકે સુખં સ્થિતમ્ ॥

નિગીર્ણં જગદ્ અઙ્ગસ્થં કૃત્વા તૃપ્તિમ્ ઉપાગતા ।
પરિનૃત્યતિ સા મત્તા જગજ્જીર્ણાહિચાતકી ॥

આદર્શપ્રતિબિમ્બસ્થમ્ ઇવાભાત્ય્ અખિલં જગત્ ।
તસ્યા વપુષિ વિસ્તીર્ણે ખરૂપિણિ ખરૂપધૃત્ ॥

તજ્જગન્નર્તનં ચારુ તદ્દેહાદર્શસંસ્થિતમ્ ।
ચિરં મયા તદા દૃષ્ટમ્ અવિનષ્ટં પુરસ્સ્થિતમ્ ॥

વિવલત્તારકાજાલં ભ્રમત્પર્વતમણ્ડલમ્ ।
મષકવ્યૂહવદ્ વાતવ્યાધૂતામરદાનવમ્ ॥

સઙ્ગ્રામોન્મુક્તચક્રાભદ્વીપાર્ણવવૃતામ્બરમ્ ।
હેલાવિવલનાવર્તપ્રૌઢશૈલધરાતૃણમ્ ॥

નીલમેઘાંશુકાવૃત્તિવાતઘુઙ્ઘુમિતામ્બરમ્ ।
કાષ્ઠાદ્ર્યસ્થિપુરાસ્ફોટપટત્પટપટારવમ્ ॥

જગત્પદાર્થૈર્ વ્યામિશ્રૈર્ અમિશ્રૈર્ મકુરે યથા ।
વ્યાપ્તમ્ આભોગિભાઙ્કરૈર્ અઙ્ગૈ રઙ્ગભ્રમૈસ્ તથા ॥

મેરુર્ નૃત્યતિ લોલોચ્ચકુલાચલબૃહદ્ભુજઃ ।
ભ્રમદભ્રપટાટોપો નમત્તરુતનૂરુહઃ ॥

અત્યજન્તસ્ સમુદ્રાસ્ સ્વં મર્યાદામુદ્રણં દ્રુતાઃ ।
ભૂમેર્ નભસ્તલં યાન્તિ નભસો યાન્તિ ભૂતલમ્ ॥

પુરાણિ ઘર્ઘરારાવૈર્ દૃશ્યન્તે લુઠિતાન્ય્ અધઃ ।
સગૃહાટ્ટાલવાસ્તવ્યં ન ચ કિઞ્ચિલ્ લુઠત્ય્ અધઃ ॥

તસ્યાં ભ્રમન્ત્યાં ચતુરં ચન્દ્રાર્કા દિનરાત્રયઃ ।
નખાગ્રલેખાલોકાન્તર્ ભાન્તિ કાઞ્ચનસૂત્રવત્ ॥

વિભાન્તિ વૃષ્ટયસ્ તસ્યા ઘર્માર્તિજલજાલિકાઃ ।
ઇવ નીહારહારિણ્યો લીલાવારિદવાસસઃ ॥

ખમ્ એવ તસ્યાસ્ સમ્પન્નં કવરીમણ્ડલં બૃહત્ ।
પાતાલં ચરણા ભૂમિર્ ઉદરં બાહવો દિશઃ ॥

દ્વીપાબ્ધયો ઽન્ત્રાવલયḫ પાર્શુકાસ્ સર્વપર્વતાઃ ।
પ્રાણાપાનાવલીદોલાḫ પવનસ્કન્ધશાલિકાઃ ॥

તદાનુભૂતં નૃત્યન્ત્યાસ્ તસ્યા વપુષિ વિસ્તૃતે ।
હિમવન્મેરુસહ્યાદ્યૈર્ દોલાન્દોલનમ્ અદ્રિભિઃ ॥

તરદદ્રિગુણાશ્ છાતા વલયન્ત્યા તયા સ્રજઃ ।
પુનẖ કલ્પાન્ત આરબ્ધ ઇવ તાણ્ડવહેલયા ॥

સુરાસુરોરગાનીકરોમશોગ્રશરીરિકા ।
નિસ્સ્પન્દં સ્થાતુમ્ અશકન્ નાસૌ ભ્રમિતચક્રવત્ ॥

નાનાવિભવવિજ્ઞાનયજ્ઞયજ્ઞોપવીતિની ।
સા સરન્તી નભસ્ય્ આસીદ્ ઘનઘૂત્કારઘોષિણી ॥

તત્ર ભૂતલમ્ આકાશમ્ આકાશમ્ અપિ ભૂતલમ્ ।
પ્રતિકૃત્ય ભવત્ય્ અન્તર્ ન ચ કિઞ્ચિદ્ વિવર્તતે ॥

બૃહન્નાસાગુહાગેહનિર્ગતા ઘનઘુઙ્ઘુમાઃ ।
તત્રોગ્રા વાયવો વાન્તિ ઘનઘૂત્કારકારિણઃ ॥

નભẖ કરશતૈસ્ તસ્યાશ્ ચતુરાવર્તનર્તિભિઃ ।
ભાતિ ચણ્ડાનિલોદ્ધૂતૈર્ આકીર્ણમ્ ઇવ પલ્લવૈઃ ॥

તદઙ્ગગજગદ્વસ્તુજાતભ્રમણસમ્ભ્રમાત્ ।
દૃષ્ટિર્ ધીરાપિ મોહે મે સન્ના સેનેવ સઙ્ગરે ॥

પ્રોહ્યન્તે યન્ત્રવચ્ છૈલા નિપતન્તિ નભશ્ચરાઃ ।
લુઠન્ત્ય્ અમરગેહાનિ ચલે તદ્દેહદર્પણે ॥

મેરવḫ પર્ણવદ્ વ્યૂઢા મલયાḫ પલ્લવા ઇવ ।
હિમાદ્રયો હિમકણા ઇવોર્વ્યો ઽબ્દલતા ઇવ ॥

સહ્યા મહ્યામ્ ઇવ ખગા વિન્ધ્યા વિદ્યાધરા ઇવ ।
ઋક્ષવન્તો ભ્રમન્તો ઽન્તર્ આસન્ હંસા ઇવામ્બરે ॥

દ્વીપાન્ય્ અપિ તૃણાનીવ સમુદ્રા વલયા ઇવ ।
સુરલોકાલયાḫ પદ્મા આસંસ્ તદ્દેહવારિણિ ॥

વિશદાકાશસઙ્કાશે સ્વપ્નાઞ્જનપુરોપમે ।
અઙ્ગે તસ્યા બૃહજ્જઙ્ઘે પિણ્ડાદર્શસમત્વિષિ ॥

વિન્ધ્યો નૃત્યતિ કાઞ્ચનાચલવને સહ્યશ્ ચ મહ્યાં ગિરિẖ કૈલાસો મલયો મહેન્દ્રશિખરે ક્રૌઞ્ચાચલે મન્દરઃ ।
ગોકર્ણો ગગનાઙ્ગને વસુમતી વિદ્યાધરાણાં પુરે સર્વા જઙ્ગમતાં ગતા વનભુવસ્ તસ્યાશ્ શરીરે તદા ॥

અબ્ધિર્ નૃત્યતિ પર્વતે ગિરિર્ અપિ પ્રોચ્ચૈર્ નભẖકોટરે વ્યોમાપીન્દુદિવાકરર્ક્ષવલિતં ભૂમેર્ અધસ્તાદ્ ગતમ્ ।
સદ્વીપાચલપત્તનો વનગણḫ પ્રોત્કીર્ણપુષ્પો દિવિ વ્યાલોલં જગદ્ અમ્બુધાવ્ ઇવ તૃણં દિક્ચક્રકે ભ્રામ્યતિ ॥

વ્યોમ્નિ ભ્રમન્તિ ગિરયો ઽમ્બુધયો દિગન્તલોકાન્તરાણિ પુરપત્તનમણ્ડલાનિ ।
નદ્યસ્ સરાંસિ મકુરાન્તર્ અશેષબદ્ધવાતાવકીર્ણતૃણપર્ણગણક્રમેણ ॥

મત્સ્યાશ્ ચરન્તિ ચ મરૌ વરવારિણીવ વ્યોમ્નિ સ્થિરાણિ નગરાણિ ભુવીવ ભાન્તિ ।
ખે ભૂર્ અધો ગગનમ્ અક્ષયવારિવાહમ્ ઉત્પાતવાતપરિવૃત્તગિરિસ્થિતં તત્ ॥

ઋક્ષોત્કરો ભ્રમતિ દીપસહસ્રયન્ત્રચક્રભ્રમેણ મણિવર્ષણમેઘચારુઃ ।
અન્તર્ બહિશ્ ચ ચકિતૈḫ પ્રણયેન મુક્તં વિદ્યાધરામરગણૈર્ ઇવ પુષ્પવર્ષમ્ ॥

સંહારસર્ગનિચયા દિનરાત્રિભાગે બિન્દૂપમા રજનયો દિવસોત્કરાશ્ ચ ।
કૃષ્ણાસ્ સિતાશ્ ચ પરિતો ઽમલશુક્લકૃષ્ણસ્વાદર્શમણ્ડલવદ્ આકુલમ્ ઉલ્લસન્તિ ॥

રત્નાનિ ભાસ્કરનિશાકરમણ્ડલાનિ તારોત્કરાસ્ તરલકાન્તિભૃતશ્ ચ હારાઃ ।
સ્વચ્છામ્બરાણિ વલિતાનિ મહામ્બરાણિ કુર્વન્ત્ય્ અનારતમ્ અનલ્પમ્ અલાતલેખાઃ ॥

કલ્પાન્તકાલવિલુઠત્ત્રિજગન્મણીનિ વ્યાવર્તનૈર્ ઝગિતિજાતઝણજ્ઝણાનિ ।
તેજાંસિ સન્તતતયોર્ધ્વમ્ અધશ્ ચ યાન્તિ નાનાવિધાનિ ગુણવન્તિ વિભૂષણાનિ ॥

સઙ્ગ્રામમત્તભટખડ્ગમરીચિવીચિશ્યામાયમાનસકલાતપવાસરાણામ્ ।
વ્યાવૃત્તિભિર્ વિલુઠતામ્ અપિ સુસ્થિરાણામ્ આકર્ણ્યતે કલકલો જનમણ્ડલાનામ્ ॥

બ્રહ્મેન્દ્રવિષ્ણુહરવહ્નિરવીન્દુપૂર્વા દેવાસુરાḫ પરિવિવૃત્તિભિર્ આપતન્તઃ ।
અન્યોઽન્યમ્ એવ વિવિધા ઉપયાન્તિ યાન્તિ વાતાવધૂતમષકાશનિવિભ્રમેણ ॥

સંહારસર્ગસુખદુẖખભવાભવેહાનીહાનિષેધવિધિજન્મમૃતિભ્રમાદ્યાઃ ।
સાર્ધં પૃથક્ ચ વિલસન્તિ સદૈવ સર્વે વ્યામિશ્રતામ્ ઉપગતા અપિ તત્ર ભાવાઃ ॥

ભાવોદ્ભવસ્થિતિવિપત્કરણભ્રમાણાં સંહારસર્ગભુવનાવનિવિભ્રમાણામ્ ।
મિથ્યૈવ ખે પ્રકચતાં ખશરીરકાણાં સંલક્ષ્યતે ઽત્ર ન મનાગ્ અપિ નામ સઙ્ખ્યા ॥

ઉત્પાતશાન્તિમરણોત્સવયુદ્ધસામ્યવિદ્વેષરાગભયવિશ્વસનાદિ તત્ર ।
એકત્ર કોશ ઇવ રત્નચયો વિભાતિ નાનારસાપ્રતિઘસર્ગપરમ્પરં તત્ ॥

તસ્યાશ્ ચિદમ્બરમયે વપુષિ સ્વભાવભૂતાસ્ સ્ફુટાનુભવભાવજગદ્વ્યવસ્થાઃ ।
સર્ગક્ષયા મલિનદૃક્કલિતામ્બરસ્થકેશોણ્ડુકસ્ફુરણવત્ પરિતસ્ સ્ફુરન્તિ ॥

જગત્ સઙ્ક્સુબ્ધમ્ અક્ષુબ્ધં દૃશ્યતે ઽસ્થિતિસંસ્થિતિ ।
સઞ્ચાલ્યમાનમકુરપ્રતિબિમ્બ ઇવ સ્થિતમ્ ॥

નૃત્તસ્થપૂતા અપ્ય્ અન્તર્ જગદર્થાḫ પ્રતિક્ષણમ્ ।
સ્થિતિં ત્યજન્તિ ગૃહ્ણન્તિ બાલસઙ્કલ્પસર્ગવત્ ॥

ક્રિયાશક્તિશરીરે ઽન્તḫ પૂયમાના અનારતમ્ ।
રાશીભૂય વિશીર્યન્તે જગન્મુદ્ગકણોત્કરાઃ ॥

ક્ષણમ્ આલક્ષ્યતે કિઞ્ચિન્ ન કિઞ્ચિદ્ અપિ સા ક્ષણમ્ ।
ક્ષણમ્ અઙ્ગુષ્ઠમાત્રૈવ ક્ષણમ્ આકાશપૂરિણી ॥

યસ્માત્ સા કલના દેવી સંવિચ્છક્તિર્ જગન્મયી ।
અનન્તા પરમાકાશકોશશુદ્ધશરીરિણી ॥

કાલત્રયસ્થિતજગત્ત્રિતયામ્બરાઙ્ગી ચિત્ સા તથા કચતિ તેન તથાસ્થિતેન ।
રૂપેણ ચિત્રકૃદુદારમનસ્સ્થચિત્રસંસારજાલસદૃશેન કચજ્જવેન ॥

સર્ગાત્મકં વપુર્ અનેકચિદાત્મકત્વાત્ સંશાન્તખૈકવપુર્ એકવિદાત્મકત્વાત્ ।
એકં નિમેષણસમુન્મિષિતૈકરૂપં સા બિભ્રતી વપુર્ અનન્તમ્ અનાદિ ભાતિ ॥

તસ્યાં વિભાતિ તદ્ અનન્તશિલાત્મકોશલેખાબ્જચક્રરચનાદિવદ્ એવ દૃશ્યમ્ ।
વ્યોમાત્મકં ગગનમાત્રશરીરવત્યાં ચિત્ત્વાદ્ દ્રવાજ્ જલધિકોશ ઇવોર્મિલેખાઃ ॥

મહતી ભૈરવી દેવી નૃત્યતḫ પૂરિતામ્બરા ।
તસ્ય કલ્પાન્તરુદ્રસ્ય સા પુરો ભૈરવાકૃતેઃ ॥

સિરામર્માશ્રિતોગ્રાગ્નિદગ્ધસ્થાણુવનાવનિઃ ।
કલ્પાન્તવાતવ્યાધૂતા વનમાલેવ નૃત્યતિ ॥

કુણાલોલૂખલબૃસીહલશૂર્પકરણ્ડકૈઃ ।
મુસુલોદઞ્ચનસ્થાલીકુમ્ભસ્રગ્દામધારિણી ॥

એવંવિધાનાં સ્રગ્દામજાલાનાં કુસુમોત્કરમ્ ।
કિરન્તી સંસૃજન્તી ચ નૃત્તક્ષુબ્ધાક્ષયં તતમ્ ॥

વન્દ્યમાનસ્ તયા સો ઽપિ તથૈવાકાશભૈરવઃ ।
તથૈવ વિતતાકારસ્ તદોચ્ચૈḫ પરિનૃત્યતિ ॥

ડિમ્બં ડિમ્બં કુડિમ્બં પચ મન ડુહ મા ઝમ્ પ્રઝમ્ પ્રં પ્રઝમ્ પ્રં તૃલ્લં તૃલ્લં તૃતૃલ્લં તૃખલુ ખલુમયં ખઙ્ખમં ખઙ્ખમઙ્ખમ્ ।
ગું હં ગું હં તુ ગું હં ગુડુલડુડુમુડં ડાડિમાડિં ડુડેતિ નૃત્યન્તી શબ્દવાદ્યૈḫ પ્રલયપિતૃવને શ્રેયસે વો ઽસ્તુ કાલી ॥

બદ્ધ્વા ખટ્વાઙ્ગશૃઙ્ગે કપિલમ્ ઉરુજટામણ્ડલં પદ્મયોનેẖ કૃત્વા દૈત્યોત્તમાઙ્ગૈસ્ સ્રજમ્ ઉરસિ શિરશ્શેખરં તાર્ક્ષ્યપક્ષૈઃ ।
પૂર્ણં રક્તાસવાનાં યમમહિષમહાશૃઙ્ગમ્ આદાય પાણૌ પાયાદ્ વો વન્દ્યમાનḫ પ્રલયમુદિતયા ભૈરવẖ કાલરાત્ર્યા ॥