મોક્ષોપાય · અધ્યાય 5.37

ઇતિ સઞ્ચિન્તયન્ન્ એવ પ્રહ્લાદઃ પરવીરહા ।
નિર્વિકલ્પં પરાનન્દસમાધિં સમુપાયયૌ ॥

નિર્વિકલ્પસમાધિસ્થશ્ ચિત્રાર્પિત ઇવાચલઃ ।
શૈલાદ્ ઇવ સમુત્કીર્ણો બભૌ સ્વપદમ્ આસ્થિતઃ ॥

તથાથ તિષ્ઠતસ્ તસ્ય કાલો બહુતરો યયૌ ।
સ્વે ગૃહે ભુવનસ્થસ્ય મેરોર્ ઇવ સુરદ્વિષઃ ॥

બોધિતો ઽપ્ય્ અસુરાધીશૈર્ નાબુધ્યત મહામતિઃ ।
અકાલે બહુસેકો ઽપિ બીજકોશાદ્ ઇવાઙ્કુરઃ ॥

પઞ્ચવર્ષસહસ્રાણિ પીનાંસો ઽતિષ્ઠદ્ એકદૃક્ ।
શાન્ત એવાસુરપુરે મત્તાર્ણવ ઇવોપલઃ ॥

પરાનન્દદશૈકાન્તપરિણામિતયા તયા ।
નિરાનન્દમ્ અનાભાસમ્ ઇવાભાસપદં ગતઃ ॥

એતાવતાથ કાલેન તદ્રસાતલમણ્ડલમ્ ।
બભૂવારાજકં તીક્ષ્ણમાત્સ્યન્યાયકદર્થિતમ્ ॥

હિરણ્યકશિપૌ ક્ષીણે સમાધૌ તત્સુતે સ્થિતે ।
ન બભૂવાપરઃ કશ્ચિદ્ રાજા દનુસુતાલયે ॥

અસુરેશાર્થિનાં તેષાં દાનવાનાં સમાધિતઃ ।
પરેણાપિ પ્રયત્નેન પ્રહ્લાદો ન વ્યબુધ્યત ॥

ન પ્રાપુર્ વિકસદ્રૂપં પતિં તત્રામરારયઃ ।
લસત્પત્ત્રપ્રભાજાલં નિશિ પદ્મમ્ ઇવાલયઃ ॥

સંવિદ્વાતો ન તસ્યાન્તર્ અબુધ્યત વિચેતસઃ ।
ભુવશ્ ચેષ્ટાક્રમ ઇવ પૌરુષો ગતભાસ્વતઃ ॥

અથોદ્વિગ્નેષુ દૈત્યેષુ ગતેષ્વ્ અભિમતા દિશઃ ।
વિચરત્સુ યથાકામમ્ અરાજનિ પુરે પુરે ॥

પાતાલમણ્ડલમ્ અભૂદ્ અભૂપાલતયા તયા ।
માત્સ્યન્યાયવિપર્યસ્તમ્ અસ્તઙ્ગતગુણક્રમમ્ ॥

બલિભુક્તાબલપુરં મર્યાદાક્રમવર્જિતમ્ ।
સર્વગાશેષવનિતં પરસ્પરહતાસુરમ્ ॥

પ્રલાપાક્રન્દપરુષં વિસંસ્થાનપુરાન્તરમ્ ।
લુઠદુદ્યાનનગરં વ્યર્થાનર્થકદર્થિતમ્ ॥

ચિન્તાપરાસુરગણં નિરન્નફલબાન્ધવમ્ ।
અકાણ્ડોત્પાતવિવશં ધ્વસ્તાશામુખમણ્ડલમ્ ॥

સુરાર્ભકપરાભૂતં ભૂતૈર્ આક્રાન્તમ્ અન્યજૈઃ ।
ભૂતરિક્તમ્ અલક્ષ્મીકમ્ ઉત્સન્નપ્રાયકોટરમ્ ॥

અનિયતવનિતાર્થમત્તયુદ્ધં હૃતધનદારવિરાવિતં સમન્તાત્ ।
કલિયુગસમયોદ્ભટોદરાભં તદ્ અસુરમણ્ડલમ્ આકુલં બભૂવ ॥