મોક્ષોપાય · અધ્યાય 5.34

વરં ગુણનિધે દૈત્યકુલચૂડામહામણે ।
ગૃહાણાભિમતં ભૂયોજન્મદુઃખોપશાન્તયે ॥

સર્વસઙ્કલ્પફલદ સર્વલોકાન્તરસ્થિત ।
યદ્ ઉદારતમં વેત્સિ તદ્ એવાદિશ દેવ મે ॥

સર્વસમ્ભ્રમસંશાન્ત્યૈ પરમાય ફલાય ચ ।
બ્રહ્મવિશ્રાન્તિપર્યન્તો વિવેકો ઽસ્તુ તવાનઘ ॥

ઇત્ય્ ઉક્ત્વા દિતિપુત્રેન્દ્રં વિષ્ણુર્ અન્તરધીયત ।
કૃતઘર્ઘરનિર્હ્રાદસ્ તરઙ્ગસ્ તોયધેર્ ઇવ ॥

વિષ્ણાવ્ અન્તર્હિતે દેવે પૂજાયાઃ કુસુમાઞ્જલિમ્ ।
પાશ્ચાત્યં દાનવસ્ ત્યક્ત્વા મણિરત્નપરિષ્કૃતમ્ ॥

પદ્માસનસ્થો ઽથ મૃદાવ્ ઉપવિશ્ય વરાસને ।
સ્તોત્રપાઠવિધાવ્ અત્ર ચિન્તયામ્ આસ ચિન્તયા ॥

વિચારવાન્ એવ ભવાન્ ભવત્વ્ ઇતિ ભવારિણા ।
દેવેનોક્તો ઽસ્મિ તેનાન્તઃ કરોમ્ય્ આશુ વિચારણામ્ ॥

કિમ્ અહં નામ તાવત્ સ્યાં યો ઽસ્મિન્ ભુવનડમ્બરે ।
વચ્મિ ગચ્છામિ તિષ્ઠામિ પ્રયતે ચાહરામિ ચ ॥

જગત્ તાવદ્ ઇદં નાહં સવૃક્ષવનપર્વતમ્ ।
યદ્ બાહ્યં જડમ્ અત્યન્તં તત્ સ્યાં કથમ્ અહં કિલ ॥

અસન્ન્ અભ્યુત્થિતો મૂકઃ પવનૈસ્ સ્ફુરતિ ક્ષણમ્ ।
કાલેનાલ્પેન વિલયી દેહો નાહમ્ અચેતનઃ ॥

જડયા કર્ણશષ્કુલ્યા કલ્પ્યમાનઃ ક્ષણસ્થયા ।
શૂન્યાકૃતિશ્ શૂન્યભવશ્ શબ્દો નાહમ્ અચેતનઃ ॥

ત્વચા ક્ષણવિનાશિન્યા પ્રાપ્યમ્ અપ્રાપ્યમ્ અન્યથા ।
ચિત્પ્રસાદોપલબ્ધાત્મ સ્પર્શનં નાસ્મ્ય્ અચેતનમ્ ॥

લબ્ધાત્મા જિહ્વયા તુચ્છો લોલયા લોલસત્તયા ।
સ્વલ્પસ્પન્દો દ્રવ્યનિષ્ઠો રસો નાહમ્ અચેતનઃ ॥

દૃશ્યદર્શનયોર્ લીનં ક્ષયિ ક્ષણવિનાશિનોઃ ।
કેવલે દ્રષ્ટરિ ક્ષીણં રૂપં નાહમ્ અચેતનમ્ ॥

નાસયાત્યન્તજડયા ક્ષયિણ્યા પરિકલ્પિતઃ ।
પેલવો ઽનિયતાધારો ગન્ધો નાહમ્ અચેતનઃ ॥

નિર્મમો ઽમનનશ્ શાન્તો ગતપઞ્ચેન્દ્રિયભ્રમઃ ।
શુદ્ધશ્ ચેતન એવાહં કલાકલનવર્જિતઃ ॥

ચેત્યવર્જિતચિન્માત્રમ્ અહમ્ એષો ઽવભાસકઃ ।
સબાહ્યાભ્યન્તરવ્યાપી નિષ્કલામલસન્મયઃ ॥

આ ઇદાનીં સ્મૃતં સત્યમ્ એતત્ તદ્ અખિલં મયા ।
નિર્વિકલ્પચિદાભાસ એષ આત્માસ્મિ સર્વગઃ ॥

અનેન ચેતનેનેમે સર્વે ઘટપટાદયઃ ।
સૂર્યાન્તા અવભાસન્તે દીપેનોત્તમતેજસા ॥

અનેનૈતાસ્ સ્ફુરન્તીહ વિચિત્રેન્દ્રિયવૃત્તયઃ ।
તેજસાન્તઃ પ્રકાશેન યથાગ્નિકણપઙ્ક્તયઃ ॥

અનેનૈતાસ્ સ્ફુરન્ત્ય્ અન્તર્ મનોમનનશક્તયઃ ।
સર્વગેન નિદાઘેન યથા મરુમરીચયઃ ॥

અનેનૈતત્ પદાર્થાનાં વસ્તુત્વં પ્રતિપાદ્યતે ।
શુક્લાદિગુણવત્ત્વં સ્વં પ્રદીપેનેવ વાસસામ્ ॥

અસાવ્ એવ હિ ભૂતાનાં સર્વેષામ્ એવ જાગ્રતામ્ ।
સર્વાનુભવિતા ભૂમાવ્ આત્મા મકુરવત્ સ્થિતઃ ॥

અસ્ય તસ્યાવિકલ્પસ્ય ચિદ્દીપસ્ય પ્રસાદતઃ ।
ઉષ્ણો ઽર્કશ્ શિશિરશ્ ચન્દ્રો ઘનો ઽદ્રિર્ વિદ્રુતં પયઃ ॥

સાતત્યેનાનુભૂતાનાં પદાર્થાનામ્ અનેન તત્ ।
પદાર્થત્વમ્ ઉદેત્ય્ ઉચ્ચૈઃ પ્રતાપેનેવ તપ્તતા ॥

બ્રહ્મવિષ્ણ્વિન્દ્રરુદ્રાણાં કારણાનાં જગત્સ્થિતૌ ।
એતત્ કારણમ્ આદ્યં તત્ કારણં નાસ્ય વિદ્યતે ॥

અકારણાદ્ અકરણાત્ સર્વકારણકારણાત્ ।
એતસ્માજ્ જગદ્ ઉત્પન્નમ્ ઇદં શૈત્યં હિમાદ્ ઇવ ॥

ચિચ્ચેત્યદ્રષ્ટૃદૃશ્યાદિનામભિર્ વર્જિતાત્મને ।
સતે સકૃદ્વિભાતાય મહ્યમ્ અસ્મૈ નમો નમઃ ॥

એતસ્મિન્ સર્વભૂતાનિ નિર્વિકલ્પચિદાત્મનિ ।
ગુણભૂતાનિ ભૂતેશે તિષ્ઠન્તિ ચ વિશન્તિ ચ ॥

યત્ કિલાનેન કલિતં ચેતનેનાન્તર્ આત્મના ।
તત્ તદ્ ભવતિ સર્વત્ર નેતરત્ સદ્ અપિ સ્થિતમ્ ॥

યચ્ ચિતા કલિતં કિઞ્ચિત્ તદ્ આપ્નોતિ નિજં પદમ્ ।
યચ્ ચિતા કલિતં નેહ તત્ સદ્ અપ્ય્ અસ્તમ્ આગતમ્ ॥

ઇમા ઘટપટાકારપદાર્થશતપઙ્ક્તયઃ ।
જાગત્યો વિપુલાદર્શે હ્ય્ અસ્મિન્ વ્યોમનિ બિમ્બિતાઃ ॥

અદૃશ્યં સર્વભૂતાનાં પ્રાપ્યં ગલિતચેતસામ્ ।
એતત્ તદ્ દૃશ્યતે સદ્ભિઃ પરં વ્યોમેતિ તન્મયૈઃ ॥

એતદ્ વૃદ્ધં વૃદ્ધિમતિ ક્ષયિ ક્ષયિણિ જાગતે ।
પદાર્થે સદ્ અસચ્ ચાપિ પ્રતિબિમ્બાર્કવત્ સ્થિતમ્ ॥

ઇયમ્ અભ્યુદયં યાતિ નાનાતા દૃશ્યમઞ્જરી ।
આચારચઞ્ચરીકાઢ્યા એતસ્માદ્ કારણદ્રુમાદ્ ॥

અસ્માદ્ ઇયમ્ ઉદેત્ય્ ઉચ્ચૈસ્ સંસારરચના ચલા ।
વિચિત્રતરુગુલ્માઢ્યા શૈલાદ્ ઇવ વનાવલી ॥

સર્વેષામ્ અવિભિન્નો ઽસૌ ત્રૈલોક્યોદરવર્તિનામ્ ।
બ્રહ્માદીનાં તૃણાન્તાનાં ચિદાત્મા સમ્પ્રકાશકઃ ॥

એષો ઽસાવ્ અહમ્ આદ્યન્તરહિતસ્ સર્વગાકૃતિઃ ।
ચરાચરાણામ્ ભૂતાનામ્ અન્તસ્ સ્વાનુભવસ્ સ્થિતઃ ॥

અસ્ય તસ્ય મમેમાનિ સ્થાવરાણિ ચરાણિ ચ ।
પરિસઙ્ખ્યાવિહીનાનિ શરીરાણિ બહૂનિ ચ ॥

એષો ઽસાવ્ અહમ્ એકાત્મા સ્વાનુભૂતિવશાત્ સ્વયમ્ ।
સર્વદૃગ્દ્રષ્ટૃદૃશ્યત્વાત્ સહસ્રકરલોચનઃ ॥

એષો ઽસાવ્ અહમ્ આકાશે સૂર્યદેહેન ચારુણા ।
વિહરામીતરેણાપિ વાયુદેહેન વાહિના ॥

મમૈતદ્ વપુર્ આનીલં શઙ્ખચક્રગદાધરમ્ ।
સર્વસૌભાગ્યસીમાન્તો હ્ય્ અસ્મિઞ્ જગતિ વલ્ગતિ ॥

અહમ્ અસ્મિન્ સમુદ્ભૂતઃ પદ્માસનગતસ્ સદા ।
નિર્વિકલ્પસમાધિસ્થઃ પરાં નિર્વૃતિમ્ આગતઃ ॥

અહં ત્રિનેત્રયાકૃત્યા ગૌરીવક્ત્રાબ્જષટ્પદઃ ।
સર્ગાન્તે સંહરામીદં કૂર્મો ઽઙ્ગપટલં યથા ॥

અહમ્ ઐન્દ્રેણ રૂપેણ ત્રિલોકીમઠિકામ્ ઇમામ્ ।
પાલયામિ ક્રમપ્રાપ્તાં મઠિકામ્ ઇવ તાપસઃ ॥

અહં તૃણલતાગુલ્મજાલં રસતયા સ્થિતઃ ।
ઉત્થાપયામિ ચિદ્ભૂમેઃ કૂપાદ્ ઉરુલતામ્ ઇવ ॥

સ્વલીલાર્થમ્ ઇદં ચારુ જગદાડમ્બરં તતમ્ ।
મયાભિજાતબાલેન પઙ્કક્રીડનકં યથા ॥

મયીદમ્ અર્પ્યતે સર્વં સત્તાં માં પ્રાપ્ય ગચ્છતિ ।
મત્પરિત્યક્તમ્ એતચ્ ચ સદ્ અપ્ય્ એવ ન કિઞ્ચન ॥

મયિ સ્ફારે ચિદાદર્શે પ્રતિબિમ્બં યદ્ આગતમ્ ।
તદ્ અસ્તિ નેતરત્ તસ્માન્ મત્તો ઽન્યન્ નેહ વિદ્યતે ॥

કુસુમેષ્વ્ અહમ્ આમોદઃ પદ્મપત્ત્રેષ્વ્ અહં છવિઃ ।
છવિષ્વ્ અહં રૂપકલા રૂપેષ્વ્ અનુભવો ઽપ્ય્ અહમ્ ॥

યદ્ યત્ કિઞ્ચિદ્ ઇદં દૃશ્યં જગત્ સ્થાવરજઙ્ગમમ્ ।
સર્વસઙ્કલ્પરહિતં તચ્ ચિત્તત્ત્વમ્ અહં પરમ્ ॥

આપ્યા રસમયી શક્તિર્ અણ્વોઘવિવૃતોદયા ।
સા યથા દારુકુડ્યેષુ તથાહં સર્વવસ્તુષુ ॥

પરમાં તામ્ અહં સર્વપદાર્થાન્તરવર્તિતામ્ ।
ઉપેત્ય સંવિદ્વૈચિત્ર્યં પ્રતનોમિ સ્વયેચ્છયા ॥

ઘૃતં યથાન્તઃ પયસિ રસશક્તિર્ યથા જલે ।
ચિચ્છક્તિસ્ સર્વભાવેષુ તથાન્તર્ અહમ્ આસ્થિતઃ ॥

ઇદં જગત્ ત્રિકાલસ્થં ચિતિ મય્ય્ એવ સંસ્થિતમ્ ।
ચેત્યોપચારરહિતં વસ્તુજાતમ્ ઇવાવનૌ ॥

ભરિતાશેષદિક્કુક્ષિસ્ ત્યક્તસઙ્કોચવિભ્રમઃ ।
સર્વસ્થસ્ સર્વધર્તા ચ વિરાટ્ સમ્રાડ્ અહં સ્થિતઃ ॥

અપૂર્વમ્ અનિબદ્ધેન્દ્રમ્ અશસ્ત્રદલિતામરમ્ ।
અપ્રાર્થિતં મે સમ્પ્રાપ્તં જગદ્રાજ્યમ્ ઇદં તતમ્ ॥

અહો નુ વિતતાત્માસ્મિ ન મામ્ય્ આત્માત્મનાત્મનિ ।
કલ્પાન્તપવનોચ્છૂન એકાર્ણવ ઇવાર્ણવે ॥

નાત્મન્ય્ અન્તમ્ અવાપ્નોમિ સ્વચ્છે ઽન્તસ્ સ્વોદિતે સ્વયમ્ ।
ક્ષીરવારિનિધૌ પઙ્ગુસ્ સરીસૃપ ઇવ સ્ફુરન્ ॥

સ્વલ્પેયં મઠિકા બ્રાહ્મી જગન્નામ્ની સુસઙ્કટા ।
ગજો બિલ્વ ઇવાસ્યાં મે ન માતિ વિપુલં વપુઃ ॥

વિરિઞ્ચસદનાત્ પારે તત્ત્વાન્તે ઽપ્ય્ આહરત્ પદમ્ ।
પ્રસરત્ય્ એવ મે રૂપમ્ અદ્યાપિ ન નિવર્તતે ॥

અયં નામાહમ્ ઇત્ય્ અન્તઃ કુતો નિરવલમ્બના ।
અપર્યન્તાકૃતેર્ એષા કિલાસીત્ સ્વલ્પતા મમ ॥

ભવાન્ અયમ્ અહં ચાયમ્ ઇતિ મિથ્યૈવ વિભ્રમઃ ।
કો દેહઃ કો ઽપ્ય્ અદેહો વાપ્ય્ અપારવપુષશ્ ચિતઃ ॥

વરાકાઃ પેલવધિયો બભૂવુર્ મે પિતામહાઃ ।
યે સામ્રાજ્યમ્ ઇદં ત્યક્ત્વા રેમિરે ઽર્થવિભૂતિષુ ॥

ક્વેયં કિલ મહાદૃષ્ટિર્ ભરિતા બ્રહ્મબૃંહિતા ।
ક્વ સરીસૃપભીમાભી રતી રાજ્યવિભૂતિભિઃ ॥

અનન્તાનન્તસમ્ભોગા પરોપશમશાલિની ।
શુદ્ધેયં ચિન્મયી દૃષ્ટિર્ જયત્ય્ અખિલદૃષ્ટિષુ ॥

સર્વભાવાન્તરસ્થાય ચેત્યમુક્તચિદાત્મને ।
પ્રત્યક્ચેતનરૂપાય મહ્યમ્ એવ નમો નમઃ ॥

જયામ્ય્ અહમ્ અહં જાતો જીર્ણસંસારસંસૃતિઃ ।
પ્રાપ્તઃ પ્રાપ્તો મયાત્માયં જીવામિ ચ જયામિ ચ ॥

ઇદમ્ ઉત્તમસામ્રાજ્યં બોધં સન્ત્યજ્ય શાશ્વતમ્ ।
ન રમે ઽહમ્ અરમ્યાસુ રાજ્યદુઃખવિભૂતિષુ ॥

દારુવારિદૃષન્માત્રે લુલુભે યો ધરાતલે ।
ધિગ્ વરાકમ્ અનાત્મજ્ઞં તં પિતામહકીટકમ્ ॥

અવિદ્યૈકાત્મભિર્ દ્રવ્યૈર્ અવિદ્યામયમ્ આજ્યપમ્ ।
અજ્ઞેન સન્તર્પયતા કિં નામ ગુરુણા કૃતમ્ ॥

વર્ષાણિ કતિચિત્ પ્રાપ્ય જગદ્ગ્રામટિકામ્ ઇમામ્ ।
કિં નામ પ્રાપદ્ ઉચિતં હિરણ્યકશિપુઃ કિલ ॥

અનાસ્વાદ્ય શમાનન્દં જગદ્રાજ્યશતાન્ય્ અપિ ।
સમાસ્વાદયતા નેહ કિઞ્ચિદ્ આસ્વાદિતં ભવેત્ ॥

ન કિઞ્ચિદ્ યેન સમ્પ્રાપ્તં તેનેદં પરમામૃતમ્ ।
સમ્પ્રાપ્યાન્તઃ પ્રપૂર્ણેન સર્વં પ્રાપ્તમ્ અખણ્ડિતમ્ ॥

ત્યક્તામિતપદો મૂર્ખો મિતમ્ એતિ ન પણ્ડિતઃ ।
ઉષ્ટ્રો હિ ત્યક્તસુલતઃ કણ્ટકં યાતિ નેતરઃ ॥

પરાં દૃષ્ટિમ્ ઇમાં ત્યક્ત્વા દગ્ધરાજ્યે રમેત કઃ ।
કસ્ ત્યક્તેક્ષુરસઃ પ્રાજ્ઞઃ કટુનિમ્બપયઃ પિબેત્ ॥

મૂર્ખા એવ હિ તે સર્વે બભૂવુર્ મે પિતામહાઃ ।
ઇમાં દૃષ્ટિં પરિત્યજ્ય યે રતા રાજ્યસઙ્કટે ॥

ક્વ ફુલ્લા નન્દનસ્થલ્યઃ ક્વ દગ્ધા મરુભૂમયઃ ।
ક્વેમા બોધદૃશશ્ શાન્તાઃ ક્વ ભોગેષ્વ્ આત્મબુદ્ધયઃ ॥

ન કિઞ્ચિદ્ અસ્તિ ત્રૈલોક્યે યદ્ રાજ્યમ્ અભિવાઞ્છ્યતે ।
સર્વં ચાસ્ત્ય્ એવ ચિત્તત્ત્વે તત્ કસ્માન્ નાનુભૂયતે ॥

ચિતા સર્વસ્થયા સ્વચ્છસમયા નિર્વિકારયા ।
સર્વથા સર્વદા સર્વં સર્વતસ્ સાધુ લભ્યતે ॥

ભાનવી તૈજસી શક્તિર્ અમૃતસ્રુતિર્ ઐન્દવી ।
બ્રાહ્મી મહત્તા મહતી શાક્રી ત્રૈલોક્યરાજતા ॥

પરમા પૂર્ણતા શાર્વી જયલક્ષ્મીશ્ ચ વૈષ્ણવી ।
માનસી શીઘ્રગમિતા બલવત્તા તુ વાયવી ॥

આગ્નેયી દાહકલના પાયસી રસનિર્વૃતિઃ ।
મૌની મહાતપસ્સિદ્ધિર્ વિદ્યા બાર્હસ્પતી તથા ॥

વૈમાનિકી વ્યોમગતા સ્થિરતાપિ ચ પાર્વતી ।
ગમ્ભીરતાથ સામુદ્રી મૈરવી ચ મહોન્નતિઃ ॥

સમશ્રીસ્ સૌગતી સોમ્યા માદની મદલોલતા ।
માધવી પુષ્પમયતા શારદી ઘનસસ્યતા ॥

યાક્ષી ચ માયામયતા નાભસી નિષ્કલઙ્કતા ।
શીતતાપિ ચ તૌષારી નૈદાઘી તાપતપ્તતા ॥

એતાશ્ ચાન્યાસ્ તથા બહ્વ્યો દેશકાલક્રિયાત્મિકાઃ ।
નાનાકારવિકારોત્થાસ્ ત્રિકાલોદરસંસ્થિતાઃ ॥

વિચિત્રાશ્ શક્તયસ્ સ્વચ્છસમયા નિર્વિકારયા ।
ચિતા ક્રિયન્તે પરયા કલાકલનમુક્તયા ॥

વિકલ્પહીના ચિત્ સર્વપદાર્થશતદૃષ્ટિષુ ।
સમમ્ એવાભિપતતિ પ્રભા પ્રાભાકરી યથા ॥

સર્વાશાકોશવિશ્રાન્તાં પદાર્થપટલીં મહી ।
કાલત્રયેહાકલિતાં યથાનુભવતિ ક્ષણાત્ ॥

તથા સમસ્તસંસારબૃહદ્દૃશ્યદશાશ્રિયમ્ ।
કાલત્રયસ્થામ્ અમલા ચિચ્ ચિનોતિ તતાત્મિકા ॥

તુલ્યકાલપરામૃષ્ટત્રિકાલકલનાશતા ।
અનન્તાનુભવાભોગા પરિપૂર્ણૈવ શુદ્ધચિત્ ॥

પરામૃષ્ટત્રિકાલાયા દૃષ્ટાનન્તદૃશશ્ ચિતઃ ।
સમતાપરપર્યાયા પૂર્ણતૈવાવશિષ્યતે ॥

તુલ્યકાલાવબુદ્ધેન મૃદુના કટુના ચ ચિત્ ।
સમેન સમતામ્ એતિ મધુનિષ્ઠાનુભૂતિવત્ ॥

ત્યક્તસઙ્કલ્પકલયા સૂક્ષ્મયા ચિદવસ્થયા ।
સર્વભાવાનુગતયા સત્તાદ્વૈતૈકરૂપયા ॥

વિચિત્રાપિ પદાર્થશ્રીર્ અન્યોઽન્યવલિતાન્તરા ।
તુલ્યકાલાનુભવનાત્ સામ્યેનૈવાનુભૂયતે ॥

ભાવેન ભાવમ્ આશ્રિત્ય ભાવસ્ ત્યજતિ દુઃખિતામ્ ।
પ્રેક્ષ્ય ભાવમ્ અભાવેન ભાવસ્ ત્યજતિ તુષ્ટતામ્ ॥

કાલત્રયમ્ ઉપેક્ષિત્ર્યા હીનાયાશ્ ચેત્યબન્ધનૈઃ ।
ચિતશ્ ચેત્યમ્ ઉપેક્ષિત્ર્યાસ્ સમતૈવાવશિષ્યતે ॥

યાતિ વાચામ્ અગમ્યત્વાદ્ અસત્તામ્ ઇવ શાશ્વતીમ્ ।
નૈરાત્મ્યસિદ્ધાન્તદશામ્ ઉપયાતેવ તિષ્ઠતિ ॥

ભવત્ય્ આત્મા તથા બ્રહ્મ નકિઞ્ચિચ્ ચાખિલં ચ વા ।
પરમોપશમે લીના મોક્ષનામ્ના પરોચ્યતે ॥

સઙ્કલ્પકલિતા ત્વ્ એષા મન્દાભાસતયા જગત્ ।
ન સમ્યક્ પશ્યતીદં ચિદ્ દૃષ્ટિઃ પટલિની યથા ॥

ઈહાનીહામયૈર્ અન્તર્ યા ચિદ્ આવલિતા મલૈઃ ।
સા હિ નોત્પતિતું શક્તા પાશબદ્ધેવ પક્ષિણી ॥

સઙ્કલ્પકલનેનૈવ યે કેચન જના ઇમે ।
પતિતા મોહજાલેષુ વિનેત્રા ઇવ પક્ષિણઃ ॥

સઙ્કલ્પજાલવલિતૈર્ વિષયાવટપાતિભિઃ ।
પદવી ગતબાધેયં ન દૃષ્ટા મત્પિતામહૈઃ ॥

દિનૈઃ કતિપયૈર્ એવ સ્ફુરિત્વા ધરણીતલે ।
વરાકાસ્ તેન તે નષ્ટા મષકાઃ કુહરેષ્વ્ ઇવ ॥

અજ્ઞાસ્યન્ યદિ તે તત્ત્વં ભોગદુઃખાર્થિનસ્ તતઃ ।
ભાવાભાવાન્ધકૂપેષુ નાપતિષ્યન્ હતાશયાઃ ॥

ઇચ્છાદ્વેષસમુત્થેન દ્વન્દ્વમોહેન જન્તવઃ ।
ધરાવિવરમગ્નાનાં કીટાનાં સમતાં ગતાઃ ॥

ઈહિતાનીહિતાકારા કલનામૃગતૃષ્ણિકા ।
સત્યાવબોધમેઘેન યસ્ય શાન્તા સ જીવતિ ॥

કુતઃ કિલાસ્યાશ્ શુદ્ધાયા અવિચ્છિન્નામલાકૃતેઃ ।
ચન્દ્રિકાયા રુચઃ કોષ્ણાઃ કલઙ્કકલનાશ્ ચિતઃ ॥

આત્મને ઽસ્તુ નમો મહ્યમ્ અવિચ્છિન્નચિદાત્મને ।
લોકાલોકમણે દેવ ચિરેણાધિગતો ઽસ્ય્ અહો ॥

પરામૃષ્ટો ઽસિ લબ્ધો ઽસિ પ્રોદિતો ઽસિ ચિરાય ચ ।
ઉદ્ધૃતો ઽસિ વિકલ્પેભ્યો યો ઽસિ સો ઽસિ નમો ઽસ્તુ તે ॥

મહ્યં તુભ્યમ્ અનન્તાય તુભ્યં મહ્યં શિવાત્મને ।
નમો દેવાતિદેવાય પરાય પરમાત્મને ॥

ગતઘનમ્ ઇવ પૂર્ણમ્ ઇન્દુબિમ્બં ગતકલનાવરણં સ્વમ્ એવ રૂપમ્ ।
સ્વવપુષિ મુદિતં સ્વયં સ્વસંસ્થં સ્વયમ્ ઉદિતં સ્વરસં સ્વયં નમામિ ॥