મોક્ષોપાય · અધ્યાય 5.33

ગર્જન્તમ્ અતિસંરબ્ધં સુરલોકમ્ અથારિહા ।
ઉવાચ માધવો વાક્યં શિખિવૃન્દમ્ ઇવામ્બુદઃ ॥

વિબુધા મા વિષણ્ણાસ્ સ્થ પ્રહ્લાદો ભક્તિમાન્ ઇતિ ।
પાશ્ચાત્યં જન્મ તસ્યેદં મોક્ષાર્હો ઽસાવ્ અરિન્દમઃ ॥

ઇત ઉત્તરમ્ એતેન ગર્ભતા દનુસૂનુના ।
ન કર્તવ્યા પ્રદગ્ધેન બીજેનેવાઙ્કુરક્રિયા ॥

ગુણવાન્ નિર્ગુણો જાત ઇત્ય્ અનર્થક્રમં વિદુઃ ।
નિર્ગુણો ગુણવાઞ્ જાત ઇત્ય્ આહુસ્ સિદ્ધિદં ક્રમમ્ ॥

આત્મીયાનિ વિચિત્રાણિ ભુવનાન્ય્ અમરોત્તમાઃ ।
પ્રયાત નાસુખાયૈષા પ્રાહ્લાદી ગુણિતેહ વઃ ॥

ઇત્ય્ ઉક્ત્વા વિબુધાંસ્ તત્ર ક્ષીરોદાર્ણવવીચિષુ ।
અન્તર્ધાનં યયૌ દેવસ્ તટતાપિઞ્છગુચ્છવત્ ॥

સો ઽપિ સમ્પૂજિતહરિસ્ સુરૌઘો ઽવ્રજદ્ અમ્બરમ્ ।
પુનર્ મન્દરનિર્ધૂતાત્ કણજાલમ્ ઇવાર્ણવાત્ ॥

પ્રહ્લાદં પ્રતિ ગીર્વાણાસ્ તતસ્ સ્નિગ્ધત્વમ્ આયયુઃ ।
મહાન્તો યત્ર નોદ્વિગ્નાસ્ તત્ર વિશ્વાસવન્ મનઃ ॥

પ્રત્યહં પૂજયામ્ આસ દેવદેવં જનાર્દનમ્ ।
મનસા કર્મણા વાચા પ્રહ્લાદો ભક્તિમાન્ ઇતિ ॥

અથ પૂજાપરસ્યાસ્ય સમવર્ધન્ત કાલતઃ ।
વિવેકાનન્દવૈરાગ્યવિભવપ્રમુખા ગુણાઃ ॥

નાભ્યનન્દદ્ અસૌ ભોગપૂગં શુષ્કમ્ ઇવ દ્રુમમ્ ।
ન ચારમત કાન્તાસુ મૃગો મરુમહીષ્વ્ ઇવ ॥

ન રેમે લોકચર્ચાસુ શાસ્ત્રાર્થકથનાદ્ ઋતે ।
નાજાયત રતિસ્ તસ્ય દૃશ્યે સ્થલ ઇવાબ્જિની ॥

ન વિશશ્રામ ચેતો ઽસ્ય ભોગરોગાનુરઞ્જને ।
મુક્તાફલમ્ અસંશ્લિષ્ટં મુક્તાફલ ઇવાતલે ॥

ત્યક્તભોગાભિકલનં વિશ્રાન્તિમ્ અથ નાગતમ્ ।
ચેતઃ કેવલમ્ અસ્યાસીદ્ દોલાયામ્ ઇવ યોજિતમ્ ॥

પ્રાહ્લાદીં તાં સ્થિતિં કૃષ્ણદેહઃ ક્ષીરોદકોટરાત્ ।
વિવેદ સર્વગતયા તયા પરમકાન્તયા ॥

અથ પાતાલમાર્ગેણ વિષ્ણુર્ આહ્લાદિતાગ્રગઃ ।
પૂજાદેવગૃહં તસ્ય પ્રહ્લાદસ્ય સમાયયૌ ॥

વિજ્ઞાયાભ્યાગતં દેવં પૂજયા દ્વિગુણેદ્ધયા ।
દૈત્યેન્દ્રઃ પુણ્ડરીકાક્ષમ્ આદરાત્ પર્યપૂજયત્ ॥

પૂજાગૃહગતં દેવં પ્રત્યક્ષાવસ્થિતં હરિમ્ ।
પ્રહ્લાદઃ પરમપ્રીતો ગિરા તુષ્ટાવ પુષ્ટયા ॥

ત્રિભુવનભવનાભિરામકોશં સકલકલઙ્કહરં પરં પ્રકાશમ્ ।
અશરણશરણં શરણ્યમ્ ઈશં હરિમ્ અજમ્ ઈશ્વરમ્ અચ્યુતં પ્રપદ્યે ॥

કુવલયદલશૈલસન્નિકાશં શરદમલામ્બરકોટરોપમાનમ્ ।
ભ્રમરતિમિરકજ્જલાઞ્જનાભં સરસિજચક્રગદાધરં પ્રપદ્યે ॥

વિચલદલિકલાપકોમલાઙ્ગં સિતદલપઙ્કજકુટ્મલાભશઙ્ખમ્ ।
શ્રુતિરણિતવિરિઞ્ચચઞ્ચરીકં સ્વહૃદયપદ્મજલાશયં પ્રપદ્યે ॥

સિતમણિગણતારકાવકીર્ણં સ્મિતધવલાનનપીવરેન્દુબિમ્બમ્ ।
હૃદયમણિમરીચિજાલગઙ્ગં હરિશરદમ્બરમ્ આતતં પ્રપદ્યે ॥

ત્રિભુવનનલિનીસિતારવિન્દં તિમિરસમાનવિમોહદીપમ્ અગ્ર્યમ્ ।
જડતરમ્ અજડં ચિદાત્મતત્ત્વં જગદખિલાર્તિહરં હરિં પ્રપદ્યે ॥

નવવિકસિતપદ્મરેણુગૌરં સ્ફુટકમલાવપુષોપરૂષિતાઙ્ગમ્ ।
દિનગમસમયારુણામ્બરાભં કનકનિભામ્બરસુન્દરં પ્રપદ્યે ॥

અવિરતહતસૃષ્ટસર્ગલીલં સતતમ્ અજાતમ્ અવર્ધનં વિશાલમ્ ।
યુગશતજરઢાભિજાતદેહં તરુતલશાયિનમ્ અર્ભકં પ્રપદ્યે ॥

દિતિસુતનલિનીતુષારપાતં સુરનલિનીસતતોદિતાર્કબિમ્બમ્ ।
કમલજનલિનીજલાવપૂરં હૃદિ નલિનીનિલયં વિભું પ્રપદ્યે ॥

ઇતિ ગુણબહુલાભિર્ વાગ્ભિર્ અભ્યર્ચિતો ઽસૌ હરિર્ અસુરવિનાશશ્ શ્રીનિષણ્ણાંસદેશઃ ।
જલદ ઇવ મયૂરં પ્રીતિમાન્ પ્રીયમાણં કુવલયદલદેહઃ પ્રત્યુવાચાસુરેન્દ્રમ્ ॥