મોક્ષોપાય · અધ્યાય 3.81

અહો નુ પરમાર્થોક્તિઃ પાવની તવ મન્ત્રિણઃ ।
રાજા રાજીવપત્ત્રાક્ષ ઇદાનીમ્ એષ ભાષતામ્ ॥

એષો ઽણુવેદનાદ્ વાયુર્ વાયુશ્ ચ ભ્રાન્તિદૃષ્ટિતઃ ।
તતો ન કિઞ્ચિદ્ વાય્વાદિ કેવલં શુદ્ધચેતનમ્ ॥

શબ્દસંવેદનાચ્ છબ્દશ્ શબ્દશ્ ચ ભ્રાન્તિદર્શનમ્ ।
તતો ઽત્ર શબ્દશબ્દાર્થદૃષ્ટિર્ દૂરતરં ગતા ॥

સો ઽણુસ્ સર્વં નકિઞ્ચિચ્ ચ સો ઽહં નાહં સ એવ ચ ।
સર્વશક્ત્યાત્મનો ઽસ્યૈવ પ્રતિભૈવાત્ર કારણમ્ ॥

આત્મા યત્નશતૈઃ પ્રાપ્યો લબ્ધે ઽસ્મિન્ ન ચ કિઞ્ચન ।
લબ્ધં ભવતિ તચ્ ચૈતત્ પરમં નામ કિઞ્ચન ॥

તાવજ્ જન્મવસન્તેષુ સંસૃતિવ્રતતિશ્ ચિરમ્ ।
વિકસત્ય્ ઉદિતો યાવન્ ન બોધો મૂલકાષકૃત્ ॥

અણુનાનેન રૂપં સ્વં દૃશ્યતામ્ ઇવ ગચ્છતા ।
તાપેનામ્બુ ધિયૈવેવ સ્વસ્થેનૈવાપહારિતમ્ ॥

અનેન સંવિદં નાના મેરુસ્ ત્રિભુવનં તૃણમ્ ।
વમિત્વા બહિર્ અન્તસ્સ્થં માયાત્મકમ્ અવેક્ષ્યતે ॥

ચિદણોર્ અન્તરે યદ્ યદ્ અસ્તિ તદ્ દૃશ્યતે બહિઃ ।
સઙ્કલ્પેષ્ટાલિઙ્ગનાદિ દૃષ્ટાન્તો ઽત્ર હિ રાગિણઃ ॥

આદિસર્ગે સર્વશક્તિશ્ ચિદ્ યથા ચોદિતાત્મના ।
તથાશુ પશ્યત્ય્ અખિલં સઙ્કલ્પમતિવત્ સ્વતઃ ॥

અભિજાતાશયસ્યાન્તર્ યદ્ યથા પ્રતિભાસતે ।
તત્ તથા પશ્યતીવાસૌ દૃષ્ટાન્તો ઽત્ર શિશોર્ મનઃ ॥

પરમાણુત એવાપિ ચિન્માત્રેણામુનાણુના ।
પરિસૂક્ષ્મતમેનૈવ વિશ્વગ્ વિશ્વં પ્રપૂરિતમ્ ॥

અણુર્ એવ ન માત્ય્ એષ યોજનાનાં શતેષ્વ્ અપિ ।
સર્વગત્વાદ્ અનાદ્યન્તરૂપત્વાદ્ વેદનાકૃતિઃ ॥

યથા ધૂર્તેન શિડ્ગેન પુંસા બાલઃ પ્રનાટ્યતે ।
સભ્રૂવિકારનયનનિરીક્ષણવિચેષ્ટિતૈઃ ॥

ચિદાલોકેન શુદ્ધેન સપર્વતતૃણં જગત્ ।
નાટ્યતે ઽવિરતં તદ્વદ્ વિવૃત્યાભિનયં સદા ॥

તેનૈવાનન્તરૂપત્વાદ્ અણુના વાસસા યથા ।
સંવિદન્તર્ ભવેદ્ બાહ્યે કૃત્વા મેર્વાદિ વેષ્ટિતમ્ ॥

દિક્કાલાદ્યનવચ્છિન્નરૂપત્વાન્ મેરુતો બૃહત્ ।
વાલાગ્રશતભાગાત્માપ્ય્ એષ સૂક્ષ્મઃ પરો ઽણુકઃ ॥

શુદ્ધસંવેદનાકાશરૂપસ્ય પરમાણુના ।
શોભતે ન હિ સામ્યોક્તિર્ મેરુસર્ષપયોર્ ઇવ ॥

માયાકલાપરાણુત્વં નિર્માયા પરમાત્મતા ।
હેમ્નીવ કટકત્વેન નાતો ઽત્ર સમતા ભવેત્ ॥

પ્રકટો ઽનેન દીપેન પ્રકાશો ઽનુભવાત્મના ।
સ્વસત્તાનાશપૂર્વો હિ વિનાનેન ભવેત્ તુ સઃ ॥

યદિ સૂર્યાદિકં સર્વં જગદ્ એકજડં ભવેત્ ।
તતઃ કિમ્ આત્મા કિં રૂપં પ્રકાશસ્ સ્યાત્ ક્વ વાથ કિમ્ ॥

શુદ્ધચિન્માત્રસત્ત્વં યત્ સ્વતસ્ સ્વાત્મનિ સંસ્થિતમ્ ।
તદ્ એતદ્ અણુના તેજો દૃષ્ટં બહિર્ ઇવ સ્થિતમ્ ॥

તેજાંસ્ય્ અર્કેન્દુવહ્નીનામ્ અભિન્નાનિ તમોઘનાત્ ।
એતાવાન્ અત્ર ભેદો ઽસ્તિ યદ્ વર્ણે શૌક્લ્યકૃષ્ણતે ॥

યાદૃક્ કજ્જલનીહારમેઘનીહારયોર્ ભવેત્ ।
તાદૃક્ પ્રકાશતમસોર્ ભેદશ્ ચેતિ તયોસ્ સ્થિતઃ ॥

જડયોર્ ઉપલમ્ભાય ચિદાદિત્યઃ કિલૈતયોઃ ।
યદા તપતિ તેનૈતે લબ્ધસત્તૈકતાં ગતે ॥

તપત્ય્ એકશ્ ચિદાદિત્યો રાત્રિન્દિવમ્ અતન્દ્રિતઃ ।
અન્તર્ બહિશ્ શિલાદ્યન્તર્ અપ્ય્ અનસ્તમયોદયઃ ॥

ત્રિલોકી ભાતિ તેનેયં જીવસ્ય પ્રથિતાત્મનઃ ।
નાનોપલમ્ભભાણ્ડાઢ્યા કુટી કઠિનકોટરા ॥

તમસ્ત્વં તમસો દેહમ્ અવિનાશયતામુના ।
તપ્યતે ભાસયા ભાસા સર્વમ્ આભાસ્યતે તમઃ ॥

પદ્મોત્પલૌ યથાર્કેણ તપતા પ્રકટીકૃતૌ ।
પ્રકાશતમસોસ્ સત્તે ચિતૈવં પ્રકટીકૃતે ॥

અર્કઃ કુર્વન્ન્ અહોરાત્રં દર્શયત્ય્ આકૃતિં યથા ।
ચિતિસ્ સદસતી કૃત્વા દર્શયત્ય્ આકૃતિં તથા ॥

ચિદણોર્ અન્તરે સન્તિ વિચિત્રાનુભવાણવઃ ।
યથા મધુરસસ્યાન્તઃ પત્ત્રપુષ્પફલશ્રિયઃ ॥

ઉદ્યન્તિ ચિદણોર્ એતે સમગ્રાનુભવાણવઃ ।
મધુમાસરસાચ્ ચિત્રા ઇવ ષણ્ડપરમ્પરાઃ ॥

પરમાત્માણુર્ અત્યન્તં નિસ્સ્વાદસ્ સૂક્ષ્મતાવશાત્ ।
સમગ્રસ્વાદસત્તૈકજનકસ્ સ્વદતે સ્વયમ્ ॥

યો યો નામ રસઃ કશ્ચિત્ સ્વસત્તાયાં કૃતસ્થિતિઃ ।
પ્રતિબિમ્બમ્ ઇવાદર્શે તાં વિના નાસ્ત્ય્ અસૌ સ્વતઃ ॥

ત્યજતા સંશ્રિતં સર્વં ચિન્માત્રપરમાણુના ।
ત્યક્તં જગદ્ અસંવિત્ત્યા સંવિત્ત્યા સર્વમ્ આશ્રિતમ્ ॥

અશક્તયાપ્ય્ આત્મગુપ્તૌ સર્વમ્ આચ્છાદિતં જગત્ ।
ચિતાણુતામ્ એવ પરાં સમ્પ્રસાર્ય વિતાનવત્ ॥

આત્મગુપ્તિં ન શક્નોતિ પરમાત્મામ્બરાકૃતિઃ ।
મનાગ્ અપિ ક્ષણમ્ અપિ ગજો દૂર્વાવને યથા ॥

તથાપ્ય્ આક્રાન્તવાન્ વિશ્વં જ્ઞતાં ગોપયતિ ક્ષણાત્ ।
જગદ્ધાનાં કણં બાલ ઇવાહો ઘનમાયિતા ॥

ચિન્માત્રાણુનયેનેદં જગત્ સમભિજીવતિ ।
વસન્તરસવેધેન વિચિત્રેવ વનાવલી ॥

ચિત્સત્તૈવેયમ્ અખિલં સ્વતો જગદ્ ઇવોદિતા ।
મધુમાસરસોલ્લાસી ચિત્રો હિ વનષણ્ડકઃ ॥

સત્યં ચિન્મયમ્ એવેદં જગદ્ ઇત્ય્ એવ વિદ્ધ્ય્ અલમ્ ।
વસન્તરસમ્ એવેદં વિદ્ધિ પલ્લવગુલ્મકમ્ ॥

સર્વાવયવિસારત્વાત્ સહસ્રકરલોચનઃ ।
પરંઆણુર્ અસાવ્ એવ નિત્યાનવયવોદયઃ ॥

નિમેષાંશાવબોધે ઽપિ ચિદણોઃ પ્રતિભાસતે ।
યતઃ કલ્પસહસ્રૌઘસ્ સ્વપ્નવાર્દ્ધકબાલ્યવત્ ॥

તતસ્ સો ઽપ્ય્ નિમેષાણુઃ કલ્પકોટિશતાન્ય્ અલમ્ ।
સર્વસત્તાવિલાસેન પ્રતિભૈકા હિ જૃમ્ભતે ॥

અભુક્તવત્ય્ એવ યથા ભુક્તવાન્ અહમ્ ઇત્ય્ અલમ્ ।
જાયતે પ્રત્યયસ્ તદ્વન્ નિમેષે કલ્પનિશ્ચયઃ ॥

અભુક્ત્વા ભુક્તવાન્ અસ્મીત્ય્ એવં પ્રત્યયશાલિનઃ ।
દૃશ્યન્તે વાસનાવિષ્ટાસ્ સ્વપ્ને સ્વમરણમ્ યથા ॥

જગન્તિ પરિતિષ્ઠન્તિ પરમાણૌ ચિદાત્મનિ ।
પ્રતિભાસાઃ પ્રવર્તન્તે તત એવ હિ જાગતાઃ ॥

યદ્ અસ્તિ યત્ર તત્ તસ્માત્ સમુદેતિ તદ્ એવ તત્ ।
આકારિણિ વિકારાદિ દૃષ્ટં ન ગગને ઽમલે ॥

ચિતિ ભૂતાનિ ભૂતાનિ વર્તમાનાનિ સમ્પ્રતિ ।
ભવિષ્યન્તિ ભવિષ્યન્તિ શક્તિબીજે દ્રુમા ઇવ ॥

નિમેષકલ્પાવ્ એતેન તુષેણાન્નકણાવ્ ઇવ ।
વલિતૌ નૈષ ચૈતાભ્યામ્ અણુસ્ સ્વાઙ્ગાત્મકશ્ ચિતઃ ॥

ઉદાસીનવદ્ આસીનો ન સંસ્પૃષ્ટો મનાગ્ અપિ ।
એષ ભોક્તૃત્વકર્તૃત્વૈઃ ખાત્મા કુર્વઞ્ જગન્ત્ય્ અપિ ॥

જગત્સત્તોદિતેયં હિ શુદ્ધચિત્પરમાણુતઃ ।
પરામણોશ્ ચ ભોક્તૃત્વકર્તૃત્વે ક્વેવ સંસ્થિતે ॥

જગન્ ન કિઞ્ચિત્ ક્રિયતે સર્વદૈવ ન કેનચિત્ ।
વિલીયતે ચ નો કિઞ્ચિન્ માત્રસ્યાદ્ય્ અસ્ય ખણ્ડનમ્ ॥

સર્વં સમરસાભાસમ્ ઇદમ્ આકાશકોશગમ્ ।
જગત્પર્યાયશબ્દાખ્યં વિદ્ધ્ય્ અનાખ્યં ચ રાક્ષસિ ॥

ચિદણુર્ દૃશ્યસિદ્ધ્યર્થમ્ આન્તરીં ચિચ્ચમત્કૃતિમ્ ।
બહીરૂપતયા ધત્તે સ્વાત્મનાત્મનિ સંસ્થિતામ્ ॥

એતદ્ બહિસ્સ્થમ્ અન્તસ્સ્થમ્ અસ્તિ શબ્દે ન વસ્તુનિ ।
ઉપદેશાય સત્ત્વાનાં ચિદ્રૂપત્વાજ્ જગત્ત્રયે ॥

દ્રષ્ટા દૃશ્યપદં ગચ્છન્ન્ આત્માનં સમ્પ્રપશ્યતિ ।
નેત્રં દૃશ્યાભિપાતીવ સદ્ એવાસદ્ ઇવ સ્થિતમ્ ॥

ન ચ ગચ્છતિ દૃશ્યત્વં દ્રષ્ટા હ્ય્ અસદ્ અવાસ્તવમ્ ।
આત્મન્ય્ એવ ન યત્ કિઞ્ચિત્ તત્તામ્ એતિ કથં પુરઃ ॥

દૃગ્ એવ લોચને સા ચ વાસના તન્ નિજં વપુઃ ।
બહુરૂપતયા દૃશ્યં કૃત્વા દ્રષ્ટૃતયોદિતા ॥

ન વિના દ્રષ્ટૃતામ્ અસ્તિ દૃશ્યસત્તા કથઞ્ચન ।
પિતૃતેવ વિના પુત્રં દ્વિતેવૈક્યપદં વિના ॥

દ્રષ્ટૈવ દૃશ્યતામ્ એતિ ન દ્રષ્ટૃત્વં વિનાસ્તિ તત્ ।
વિના પિત્રેવ તનયો વિના ભોક્ત્રેવ ભોગ્યતા ॥

દ્રષ્ટુર્ હિ દૃશ્યનિર્માણે ચિત્ત્વાદ્ અસ્ત્ય્ એવ શક્તતા ।
કનકસ્યાવદાતસ્ય કટકત્વકૃતાવ્ ઇવ ॥

દૃશ્યસ્ય દ્રષ્ટૃનિર્માણે જડત્વાન્ નાસ્તિ શક્તતા ।
કટકત્વસ્ય મોહસ્ય યથા કનકનિર્મિતૌ ॥

ચેતનાદ્ દૃશ્યનિર્માણં ચિત્ કચત્ય્ અસદ્ એવ યત્ ।
અકારણં મોહહેતુર્ હેમૈવ કટકભ્રમઃ ॥

કટકત્વાવભાસે હિ યથા હેમ્નો ન હેમતા ।
સત્યૈવ પ્રકચત્ય્ એવં દ્રષ્ટુર્ દૃશ્યસ્થિતૌ વપુઃ ॥

દ્રષ્ટા દૃશ્યતયા તિષ્ઠન્ દ્રષ્ટૃતામ્ ઉજ્ઝતીવ હિ ।
સત્યાં કટકસંવિત્તૌ હેમ કાઞ્ચનતામ્ ઇવ ॥

એકસ્મિન્ પ્રતિભાસે ઽસ્તિ ન સત્તા દ્રષ્ટૃદૃશ્યયોઃ ।
પુમ્પ્રત્યયપ્રકચને ક્વ પશુપ્રત્યયોદયઃ ॥

દૃશ્યં પશ્યન્ સ્વમ્ આત્માનં ન દ્રષ્ટા સ્વં પ્રપશ્યતિ ।
દ્રષ્ટુર્ હિ દૃશ્યતાપત્તૌ સત્તાસત્તેવ તિષ્ઠતિ ॥

બોધાદ્ ગલિતદૃશ્યસ્ય દ્રષ્ટુસ્ સત્તૈવ ભાસતે ।
અબુદ્ધકટકત્વસ્ય હેમ્નઃ કનકતા યથા ॥

દૃશ્યે ઽસત્ય્ અસ્તિ ન દ્રષ્ટા દૃશ્યં દ્રષ્ટરિ નાસતિ ।
દ્વયેન ચ વિના નૈક્યં નૈક્યમ્ અપ્ય્ અસ્તિ ચાનયોઃ ॥

સર્વં યથાવદ્ વિજ્ઞાય શુદ્ધસંવિન્મયાત્મનઃ ।
વાચામ્ અવિષયસ્ સ્વાસ્થ્યં કિઞ્ચિદ્ એવાવશિષ્યતે ॥

આત્માથ દર્શનં દૃશ્યં દીપેનેવાવભાસિતમ્ ।
કૃતં ચ સર્વમ્ એતેન ચિન્માત્રપરમાણુના ॥

માતૃમેયપ્રમાણાખ્યં બુદ્ધૌ નિગિરતિ ત્રયમ્ ।
હેમેવ કટકાદિત્વમ્ અસન્મયમ્ ઉપસ્થિતમ્ ॥

યથા ન જલમ્ ઊર્મ્યાદેઃ પૃથક્ કિઞ્ચિન્ મનાગ્ અપિ ।
તથૈતસ્માત્ સ્વભાવાણોર્ ન કિઞ્ચિત્ પૃથગ્ એવ હિ ॥

સર્વગાનુભવાત્મત્વાત્ સર્વાનુભવરૂપતઃ ।
એકત્વાનુભવે ન્યાય્યે રૂઢે સર્વૈકતાસ્ય હિ ॥

અસ્યેચ્છયા પૃથક્તાસ્તિ વીચિતેવ મહામ્ભસઃ ।
ઇચ્છાનુરૂપસમ્પત્તેર્ ભાવિતાર્થૈકલાભિનઃ ॥

દિક્કાલાદ્યનવચ્છિન્નઃ પરમાત્માસ્તિ કેવલઃ ।
સર્વાત્મત્વાત્ સ સર્વાત્મા સર્વાનુભવતસ્ સ્વતઃ ॥

સન્ન્ એષ ચેતનાત્મત્વાદ્ અસન્ન્ અનવબોધતઃ ।
દ્વૈતૈક્યે નાત્ર વિદ્યેતે સત્યરૂપે મહાત્મનિ ॥

યદિ કશ્ચિદ્ દ્વિતીયસ્ સ્યાત્ તદ્ એકસ્યૈકતા ભવેત્ ।
દ્વિત્વૈક્યયોર્ મિથસ્ સિદ્ધિર્ આતપચ્છાયયોર્ ઇવ ॥

યત્ર નાસ્તિ દ્વિતીયો હિ તત્રૈકસ્યૈકતા કથમ્ ।
એકતાયામ્ અસિદ્ધાયાં દ્વયમ્ એવ ન વિદ્યતે ॥

એવં સ્થિતે તુ યચ્ છિષ્ટં તત્ સ્યાદ્ રિક્તમ્ ઇહાસ્થિતેઃ ।
તસ્માન્ ન વ્યતિરિક્તં તદ્રૂપં દ્રવ ઇવામ્ભસઃ ॥

નાનારમ્ભવિશાલં ચ સામ્યેનાક્ષુબ્ધરૂપિ ચ ।
બીજસ્યાન્તસ્ તરુર્ ઇવ બ્રહ્મણો ઽન્તસ્ સ્થિતં જગત્ ॥

દ્વૈતમ્ અપ્ય્ અપૃથક્ તસ્માદ્ ધેમ્નઃ કટકતા યથા ।
સામ્યબુદ્ધાવબોધે હિ દ્વૈતં સચ્ ચ નસન્મયમ્ ॥

યથા દ્રવત્વં પયસસ્ સ્પન્દનં માતરિશ્વનઃ ।
વ્યોમ્નશ્ શૂન્યત્વમ્ એવં હિ ન પૃથગ્ દ્વૈતમ્ ઈશ્વરાત્ ॥

દ્વૈતાદ્વૈતોપલમ્ભો હિ દુઃખાયૈષ ક્ષયાત્મને ।
નિપુણો ઽનુપલમ્ભો યસ્ ત્વ્ એતયોસ્ તત્ પરં વિદુઃ ॥

માતૃમાનપ્રમેયાદિ દ્રષ્ટૃદર્શનદૃશ્યતાઃ ।
એતાવજ્ જગદ્ એતચ્ ચ પરમાણૌ ચિતસ્ સ્થિતમ્ ॥

અયં જગદણુર્ નિત્યમ્ અનેનાણુસુમેરુણા ।
સ્પન્દનં પવનેનેવ સ્વાઙ્ગ એવ ધૃતઃ કુતઃ ॥

અહો નુ ભીમા માયેયમ્ અથ વા માયિતા પરા ।
પરમાણ્વન્તર્ એવાસ્તિ યત્ ત્રૈલોક્યપરમ્પરા ॥

અથાસમ્ભવમાયિત્વમ્ એવૈતત્ સર્વદા સ્થિતમ્ ।
ચિન્માત્રપરમાણ્વન્તમાત્રમ્ એવ જગત્ સ્થિતમ્ ॥

અન્તર્ગતજગજ્જાલો ઽપ્ય્ એષો ઽણુસ્ સામ્યમ્ અત્યજન્ ।
સ્થિતો ઽન્તસ્સ્થબૃહદ્વૃક્ષં બીજં ભાણ્ડોદરે યથા ॥

બીજે ઽન્તર્ વૃક્ષવિસ્તારસ્ સ્થિતસ્ સફલપલ્લવઃ ।
પરયા દૃશ્યતે દૃષ્ટ્યા જગચ્ ચ ચિદણૂદરે ॥

સ શાખાફલવૃક્ષત્વમ્ અજહદ્ બીજકોટરે ।
યથા તરુસ્ સ્થિતસ્ તદ્વદ્ વિકાસિ ચિદણૌ જગત્ ॥

સંસ્થિતદ્વૈતમ્ અદ્વૈતબીજકોશમ્ ઇવ સ્થિતમ્ ।
જગચ્ ચિત્પરમાણ્વન્તર્ યઃ પશ્યતિ સ પશ્યતિ ॥

ન દ્વૈતં ન ચ વાદ્વૈતં ન બીજં ન ચ વાઙ્કુરઃ ।
ન સ્થૂલં ન ચ વા સૂક્ષ્મં નાજાતં જાતમ્ એવ નો ॥

ન ચાસ્તિ ન ચ નાસ્તીદં ન સોમ્યં ક્ષુભિતં ન ચ ।
ત્રિજગચ્ચિદણોર્ અન્તસ્ સત્ત્વં વાથ ન કિઞ્ચન ॥

ન જગન્ નાજગદ્ વાસ્તિ વિદ્યતે ચિત્પરાણુતા ।
સર્વાત્મિકા યદા યત્ર યા યથોદેતિ તત્ તથા ॥

ઉદેત્ય્ અનુદિતો ઽપ્ય્ એષ સ્વસંવેદનજૃમ્ભિતઃ ।
પરમાત્માણુર્ એકાત્મા સમગ્રાત્મતયેવ ખે ॥

દ્રુમીભૂયેવ બીજત્વમ્ ઇવોદેત્ય્ અનુદય્ય્ અપિ ।
પરં તત્ત્વં જગદ્ભઙ્ગ્યા જગન્નાશોદયેન ચ ॥

દ્રુમો બીજતયેવાશુ ન સન્ત્યક્તસમસ્થિતિઃ ।
તિષ્ઠત્ય્ અપગતસ્પન્દત્યાગાત્યાગઃ પરો ઽણુકઃ ॥

બિસતન્તુર્ મહામેરુઃ પરાત્માણોર્ અપેક્ષયા ।
દૃશ્યઃ કિલ બિસે તન્તુર્ અદૃશ્યાક્ષ્ણા પરાત્મતા ॥

બિસતન્તુર્ મહામેરુઃ પરમાણોઃ કિલાત્મનઃ ।
તસ્યૈવ તદ્ઘનાચ્ ચાન્તસ્સ્થિતા મેર્વાદિકોટયઃ ॥

એતેન તેન મહતા પરમાણુના ચ વ્યાપ્તં તતં વિરચિતં જનિતં કૃતં ચ ।
વિશ્વપ્રપઞ્ચરચનં નભસેવ વિષ્વક્ શૂન્યત્વમ્ અચ્છમ્ અભિતઃ પરિલબ્ધમ્ એવ ॥

દ્વૈતેન સુન્દરતરં સ્વમ્ અનુજ્ઝતેવ રૂપં સુષુપ્તસદૃશેન પરાવબોધાત્ ।
ઐક્યં ગતં સ્થિતગમાગમમુક્તમ્ એવમ્ ઇત્થં સ્થિતં નનુ જગત્ પરમાર્થપિણ્ડઃ ॥