મોક્ષોપાય · અધ્યાય 3.46

એવં સઙ્કથયન્તીષુ તાસુ તસ્મિન્ ગૃહોદરે ।
વિદૂરથઃ કિમ્ અકરોન્ નિર્ગત્ય કુપિતો ગૃહાત્ ॥

વિદૂરથસ્ સ્વસદનાન્ નિર્ગત્ય પરિવારિતઃ ।
પરિવારેણ મહતા ઋક્ષૌઘેનૈવ ચન્દ્રમાઃ ॥

સન્નદ્ધસર્વાવયવો લગ્નહારવિભૂષણઃ ।
મહાજયજયારાવૈસ્ સુરેન્દ્ર ઇવ નિર્ગતઃ ॥

સમાદિશન્ યોધગણં શૃણ્વન્ મણ્ડલસંસ્થિતિમ્ ।
આલોકયન્ વીરરણાન્ આરુરોહ નૃપો રથમ્ ॥

ભૂતાગારસમાકારં મુક્તામાણિક્યમણ્ડિતમ્ ।
પતાકાપુઞ્જકવ્યાપ્તં દ્યુવિમાનમ્ ઇવાગતમ્ ॥

ચન્દ્રભિત્તિપરિસ્રોતઃપ્રપતત્કાઞ્ચનાઙ્કુરમ્ ।
મુક્તાઝણઝણત્કારચારુવિદ્રુમકૂવરમ્ ॥

સુગ્રીવૈર્ લક્ષણોપેતૈઃ પ્રશસ્તૈર્ ધવલૈઃ કૃશૈઃ ।
જવોન્નયનવેગેન પ્રસ્રવદ્ભિઃ ખુરાન્ ઇવ ॥

વાયૂન્ અપીવ સહજાન્ અસહદ્ભિર્ ગતિક્રમૈઃ ।
પ્રોજ્ઝદ્ભિર્ ઇવ પશ્ચાર્ધમ્ આપિબદ્ભિર્ ઇવામ્બરમ્ ॥

યોજિતૈર્ ઇવ સંપૂર્ણૈશ્ ચન્દ્રૈશ્ ચામરદીપ્તિભિઃ ।
અશ્વૈર્ અષ્ટભિર્ આબદ્ધમ્ આશાપૂરકહેષિતૈઃ ॥

અથોદભૂત્ તદોદ્દામનાગાભ્રરવનિર્ભરઃ ।
શૈલભિત્તિપ્રતિધ્વાનદારુણો દુન્દુભિધ્વનિઃ ॥

મત્તસૈનિકનિર્મુક્તૈર્ વ્યાપ્તૈઃ કલકલારવૈઃ ।
કિઙ્કિણીજાલનિધ્વાનૈર્ હેતિસઙ્ઘટ્ટટાઙ્કૃતૈઃ ॥

ધનુશ્ચટચટાશબ્દૈશ્ શરશીત્કારગાયનૈઃ ।
પરસ્પરાંસનિષ્પિષ્ટકવચૌઘઝણજ્ઝણૈઃ ॥

જ્વલદગ્નિટણત્કારૈર્ આર્તિમત્ક્રન્દનારવૈઃ ।
પરસ્પરં ભટાહ્વાનૈર્ બન્દીવિક્ષુબ્ધરોદનૈઃ ॥

શિલાઘનીકૃતાશેષબ્રહ્માણ્ડકુહરો ધ્વનિઃ ।
હસ્તગ્રાહ્યો ભવદ્ભીમો દશાશાકુઞ્જપૂરકઃ ॥

અથોદપતદ્ આદિત્યપથપીવરરોધકમ્ ।
રજોનિભેન ભૂપીઠમ્ અમ્બરોડ્ડયનોન્મુખમ્ ॥

ગર્ભવાસમ્ ઇવાપન્નં તેનાસીત્ તન્મહાપુરમ્ ।
મૂર્ખત્વં યૌવનેનેવ ઘનતામ્ આયયૌ તમઃ ॥

પ્રયયુઃ ક્વાપિ દીપૌઘા દિવસેનેવ તારકાઃ ।
આયયુર્ બલમ્ આલોલા નૈશભૂતપરમ્પરાઃ ॥

દદૃશુસ્ તન્મહાયુદ્ધં દ્વે લીલે સા કુમારિકા ।
પ્રસ્ફુરદ્ધૃદયેનૈતા દેવીદત્તમહાદૃશા ॥

પ્રશેમુર્ અથ ગેહેષુ પ્રોદ્યત્કટકટારવાઃ ।
એકાર્ણવપયઃપૂરૈર્ વાડવા ઇવ વહ્નયઃ ॥

શરૈસ્ સેનાં સમાકર્ષન્ રાજા પરબલાન્તરમ્ ।
વિવેશ પક્ષપ્રોડ્ડીનો મેરુર્ એકમ્ ઇવાર્ણવમ્ ॥

અથોદભૂદ્ ગુણધ્વાનશ્ ચટચ્ચટદ્ ઇતિ સ્ફુટમ્ ।
રચિતાત્મમયામ્ભોદાસ્ તેરુશ્ શરપરમ્પરાઃ ॥

યયુર્ અમ્બરમ્ આશ્રિત્ય નાનાહેતિવિહઙ્ગમાઃ ।
પ્રસસ્રુર્ અલમ્ આશાસુ મિહિકાશ્ શસ્ત્રદીપ્તયઃ ॥

બભ્રમુશ્ શસ્ત્રસઙ્ઘટ્ટજ્વલના ઉલ્મુકાગ્નિવત્ ।
જગર્જુશ્ શરધારૌઘાન્ વર્ષન્તો વીરવારિદાઃ ॥

વિલેગુઃ કઙ્કવત્ક્રૂરા વીરાઙ્ગેષુ ચ હેતયઃ ।
પેતુઃ પટપટારાવં હેતિનિષ્પિષ્ટયો ઽમ્બરે ॥

જગ્મુશ્ શમં તમાંસ્ય્ આશુ શસ્ત્રજ્વલનદીપકૈઃ ।
બભૂવુર્ અખિલાસ્ સેના નવનારાચરોમશાઃ ॥

ઉત્તસ્થુર્ નૃત્તયાત્રાયાં કબન્ધનટપઙ્ક્તયઃ ।
જગુર્ ઉચ્ચૈ રણદ્રોહં પિશાચ્યો રણદારિકાઃ ॥

ઉદગુર્ મત્તસઙ્ઘટ્ટત્ક્રેઙ્કારા દન્તિનાં બલે ।
ઊહુઃ ક્ષેપણપાષાણમત્તનદ્યો નભસ્તલે ॥

પેતુશ્ ચ રથસઙ્ઘાતાસ્ સંશુષ્કવનપર્ણવત્ ।
નિર્યયુર્ લોહિતા નદ્યો રણાદ્રેર્ મૃતિવર્ષિણઃ ॥

પ્રશેમુઃ પાંસવો રક્તૈસ્ તમાંસ્ય્ આયુધવહ્નિભિઃ ।
યુદ્ધૈકધ્યાનતશ્ શબ્દા ભયાનિ મૃતિનિશ્ચયૈઃ ॥

અભવત્ કેવલં યુદ્ધં સશબ્દમ્ અસમં ભ્રમમ્ ।
અનાકુલામ્બુવાહાભખડ્ગવીચિસઝાઙ્કૃતમ્ ॥

ષવષવરવસંવહચ્છરૌઘં કટકટરવસંપતદ્ભુસુણ્ડિ ।
ઝણઝણરવસંમિલન્મહાસ્ત્રં નિશિ નવરણમ્ આસ સુપ્તવત્ તત્ ॥