મત્સ્ય પુરાણ · અધ્યાય 89

અતઃ પરં પ્રવક્ષ્યામિ ઘૃતાચલમનુત્તમમ્
તેજો ઽમૃતમયં દિવ્યં મહાપાતકનાશનમ્ ॥

વિંશત્યા ઘૃતકુમ્ભાનામ્ ઉત્તમઃ સ્યાદ્ઘૃતાચલઃ
દશભિર્મધ્યમઃ પ્રોક્તઃ પઞ્ચભિસ્ત્વધમઃ સ્મૃતઃ ॥

અલ્પવિત્તો ઽપિ યઃ કુર્યાદ્ દ્વાભ્યામિહ વિધાનતઃ
વિષ્કમ્ભપર્વતાંસ્તદ્વચ્ ચતુર્ભાગેણ કલ્પયેત્ ॥

શાલિતણ્ડુલપાત્રાણિ કુમ્ભોપરિ નિવેશયેત્
કારયેત્સંહતાનુચ્ચાન્ યથાશોભં વિધાનતઃ ॥

વેષ્ટયેચ્છુક્લવાસોભિર્ ઇક્ષુદણ્ડફલાદિકૈઃ
ધાન્યપર્વતવચ્છેષં વિધાનમિહ પઠ્યતે ॥

અધિવાસનપૂર્વં ચ તદ્વદ્ધોમસુરાર્ચનમ્
પ્રભાતાયાં તુ શર્વર્યાં ગુરવે તં નિવેદયેત્
વિષ્કમ્ભપર્વતાંસ્તદ્વદ્ ઋત્વિગ્ભ્યઃ શાન્તમાનસઃ ॥

સંયોગાદ્ઘૃતમુત્પન્નં યસ્માદમૃતતેજસોઃ
તસ્માદ્ધૃતાર્ચિર્વિશ્વાત્મા પ્રીયતામત્ર શંકરઃ ॥

યસ્માત્તેજોમયં બ્રહ્મ ઘૃતે તદ્વિદ્ધ્યવસ્થિતમ્
ઘૃતપર્વતરૂપેણ તસ્માત્ત્વં પાહિ નો ઽનિશમ્ ॥

અનેન વિધિના દદ્યાદ્ ઘૃતાચલમનુત્તમમ્
મહાપાતકયુક્તો ઽપિ લોકમાપ્નોતિ શાંકરમ્ ॥

હંસસારસયુક્તેન કિઙ્કિણીજાલમાલિના
વિમાનેનાપ્સરોભિશ્ચ સિદ્ધવિદ્યાધરૈર્ વૃતઃ
વિહરેત્પિતૃભિઃ સાર્ધં યાવદાભૂતસંપ્લવમ્ ॥