મત્સ્ય પુરાણ · અધ્યાય 90

અતઃ પરં પ્રવક્ષ્યામિ રત્નાચલમનુત્તમમ્
મુક્તાફલસહસ્રેણ પર્વતઃ સ્યાદનુત્તમઃ ॥

મધ્યમઃ પઞ્ચશતિકસ્ ત્રિશતેનાધમઃ સ્મૃતઃ
ચતુર્થાંશેન વિષ્કમ્ભ પર્વતાઃ સ્યુઃ સમન્તતઃ ॥

પૂર્વેણ વજ્રગોમેદૈર્ દક્ષિણેનેન્દ્રનીલકૈઃ
પદ્મરાગયુતઃ કાર્યો વિદ્વદ્ભિર્ગન્ધમાદનઃ ॥

વૈદૂર્યવિદ્રુમૈઃ પશ્ચાત્ સમ્મિશ્રો વિમલાચલઃ
પદ્મરાગૈઃ સસૌવર્ણૈર્ ઉત્તરેણ ચ વિન્યસેત્ ॥

ધાન્યપર્વતવત્સર્વમ્ અત્રાપિ પરિકલ્પયેત્
તદ્વદાવાહનં કુર્યાદ્ વૃક્ષાન્દેવાંશ્ચ કાઞ્ચનાન્ ॥

પૂજયેત્પુષ્પગન્ધાદ્યૈઃ પ્રભાતે ચ વિમત્સરઃ
પૂર્વવદ્ગુરુઋત્વિગ્ભ્ય ઇમાન્મન્ત્રાનુદીરયેત્ ॥

યદા દેવગણાઃ સર્વે સર્વરત્નેષ્વવસ્થિતાઃ
ત્વં ચ રત્નમયો નિત્યં નમસ્તે ઽસ્તુ સદાચલ ॥

યસ્માદ્રત્નપ્રદાનેન તુષ્ટિં પ્રકુરુતે હરિઃ
સદા રત્નપ્રદાનેન તસ્માન્નઃ પાહિ પર્વત ॥

અનેન વિધિના યસ્તુ દદ્યાદ્રત્નમયં ગિરિમ્
સ યાતિ વિષ્ણુસાલોક્યમ્ અમરેશ્વરપૂજિતઃ ॥

યાવત્કલ્પશતં સાગ્રં વસેચ્ચેહ નરાધિપ
રૂપારોગ્યગુણોપેતઃ સપ્તદ્વીપાધિપો ભવેત્ ॥

બ્રહ્મહત્યાદિકં કિંચિદ્ યદત્રામુત્ર વા કૃતમ્
તત્સર્વં નાશમાયાતિ ગિરિર્વજ્રહતો યથા ॥