Matsya Purana · Chapter 89

ataḥ paraṃ pravakṣyāmi ghṛtācalamanuttamam
tejo 'mṛtamayaṃ divyaṃ mahāpātakanāśanam //

viṃśatyā ghṛtakumbhānām uttamaḥ syādghṛtācalaḥ
daśabhirmadhyamaḥ proktaḥ pañcabhistvadhamaḥ smṛtaḥ //

alpavitto 'pi yaḥ kuryād dvābhyāmiha vidhānataḥ
viṣkambhaparvatāṃstadvac caturbhāgeṇa kalpayet //

śālitaṇḍulapātrāṇi kumbhopari niveśayet
kārayetsaṃhatānuccān yathāśobhaṃ vidhānataḥ //

veṣṭayecchuklavāsobhir ikṣudaṇḍaphalādikaiḥ
dhānyaparvatavaccheṣaṃ vidhānamiha paṭhyate //

adhivāsanapūrvaṃ ca tadvaddhomasurārcanam
prabhātāyāṃ tu śarvaryāṃ gurave taṃ nivedayet
viṣkambhaparvatāṃstadvad ṛtvigbhyaḥ śāntamānasaḥ //

saṃyogādghṛtamutpannaṃ yasmādamṛtatejasoḥ
tasmāddhṛtārcirviśvātmā prīyatāmatra śaṃkaraḥ //

yasmāttejomayaṃ brahma ghṛte tadviddhyavasthitam
ghṛtaparvatarūpeṇa tasmāttvaṃ pāhi no 'niśam //

anena vidhinā dadyād ghṛtācalamanuttamam
mahāpātakayukto 'pi lokamāpnoti śāṃkaram //

haṃsasārasayuktena kiṅkiṇījālamālinā
vimānenāpsarobhiśca siddhavidyādharair vṛtaḥ
viharetpitṛbhiḥ sārdhaṃ yāvadābhūtasaṃplavam //