મઞ્જુશ્રીનામસંગીતિ (અન્ય આવૃત્તિ) · શ્લોક 1-20

અથ વજ્રધરઃ શ્રીમાન્ દુર્દાન્તદમકઃ પરઃ
ત્રિલોકવિજયી વીરો ગુહ્યરાટ્ કુલિશેશ્વરઃ ॥

વિબુદ્ધપુણ્ડરીકાક્ષઃ પ્રોત્ફુલ્લકમલાનનઃ
પ્રોલ્લાલયન્ વજ્રવરં સ્વકરેણ મુહુર્ મુહુઃ ॥

ભૃકુટીતરઙ્ગપ્રમુખૈર્ અનન્તૈર્ વજ્રપાણિભિઃ
દુર્દાન્તદમકૈર્ વીરૈર્ વીરબીભત્સરૂપિભિઃ ॥

ઉલ્લાલયદ્ભિઃ સ્વકરૈઃ પ્રસ્ફુરદ્વજ્રકોટિભિઃ
પ્રજ્ઞોપાયમહાકરુણા જગદર્થકરૈઃ પરૈઃ ॥

હૃષ્ટતુષ્ટાશયૈર્ મુદિતૈઃ ક્રોધવિગ્રહરૂપિભિઃ
બુદ્ધકૃત્યકરૈર્ નાથૈઃ સાર્ધં પ્રણતવિગ્રહૈઃ ॥

પ્રણમ્ય નાથં સંબુદ્ધં ભગવન્તં તથાગતમ્
કૃતાઞ્જલિપુટો ભૂત્વા ઇદમ્ આહ સ્થિતો ઽગ્રતઃ ॥

મદ્ધિતાય મમાર્થાય અનુકમ્પાય મે વિભો
માયાજાલાભિસંબોધેર્ યથા લાભી ભવામ્ય્ અહં ॥

અજ્ઞાનપઙ્કમગ્નાનાં ક્લેશવ્યાકુલચેતસાં
હિતાય સર્વસત્વાનામ્ અનુત્તરફલાપ્તયે ॥

પ્રકાશયતુ સંબુદ્ધો ભગવાં શાસ્તા જગદ્ગુરુઃ
મહાસમયતત્વજ્ઞ ઇન્દ્રિયાશયવિત્ પરઃ ॥

ભગવજ્જ્ઞાનકાયસ્ય મહોષ્ણીષસ્ય ગીષ્પતેઃ
મઞ્જુશ્રીજ્ઞાનસત્વસ્ય જ્ઞાનમૂર્તેઃ સ્વયંભુવઃ ॥

ગમ્ભીરાર્થામ્ ઉદારાર્થાં મહાર્થામ્ અસમાં શિવાં
આદિમધ્યાન્તકલ્યાણીં નામસંગીતિમ્ ઉત્તમાં ॥

યાતીતૈર્ ભાષિતા બુદ્ધૈર્ ભાષિષ્યન્તે હ્ય્ અનાગતાઃ
પ્રત્યુત્પન્નાશ્ ચ સંબુદ્ધા યાં ભાષન્તે પુનઃ પુનઃ ॥

માયાજાલમહાતન્ત્રે યા ચાસ્મિં સંપ્રગીયતે
મહાવજ્રધરૈર્ હૃષ્ટૈર્ અમેયૈર્ મન્ત્રધારિભિઃ ॥

અહં ચૈનાં ધારયિષ્યામ્ય્ આ નિર્યાણાદ્ દૃઢાશયઃ
યથા ભવામ્ય્ અહં નાથ સર્વસંબુદ્ધગુહ્યધૃક્ ॥

પ્રકાશયિષ્યે સત્વાનાં યથાશયવિશેષતઃ
અશેષક્લેશનાશાય અશેષાજ્ઞાનહાનયે ॥

એવમ્ અધ્યેષ્ય ગુહ્યેન્દ્રો વજ્રપાણિસ્ તથાગતં
કૃતાઞ્જલિપુટો ભૂત્વા પ્રહ્વકાયસ્થિતો ઽગ્રતઃ ॥

અથ શાક્યમુનિર્ ભગવાં સંબુદ્ધો દ્વિપદોત્તમઃ
નિર્ણમય્યાયતાં સ્ફીતાં સ્વજિહ્વાં સ્વમુખાચ્ છુભાં ॥

સ્મિતં સંદર્શ્ય લોકાનામ્ અપાયત્રયશોધનં
ત્રૈલોક્યાભાસકરણં ચતુર્મારારિશાસનં ॥

ત્રિલોકમ્ આપૂરયન્ત્યા બ્રાહ્મ્યા મધુરયા ગિરા
પ્રત્યભાષત ગુહ્યેન્દ્રં વજ્રપાણિં મહાબલં ॥

સાધુ વજ્રધરઃ શ્રીમાં સાધુ તે વજ્રપાણયે
યસ્ ત્વં જગદ્ધિતાર્થાય મહાકરુણયાન્વિતઃ ॥