મઞ્જુશ્રીનામસંગીતિ (અન્ય આવૃત્તિ) · શ્લોક 41-60

મહાવિદ્યોત્તમો નાથો મહામન્ત્રોત્તમો ગુરુઃ
મહાયાનનયારૂઢો મહાયાનનયોત્તમઃ ॥

મહાવૈરોચનો બુદ્ધો મહામૌની મહામુનિઃ
મહામન્ત્રનયોદ્ભૂતો મહામન્ત્રનયાત્મકઃ ॥

દશપારમિતાપ્રાપ્તો દશપારમિતાશ્રયઃ
દશપારમિતાશુદ્ધિર્ દશપારમિતાનયઃ ॥

દશભૂમીશ્વરો નાથો દશભૂમિપ્રતિષ્ઠિતઃ
દશજ્ઞાનવિશુદ્ધાત્મા દશજ્ઞાનવિશુદ્ધધૃક્ ॥

દશાકારો દશાર્થાર્થો મુનીન્દ્રો દશબલો વિભુઃ
અશેષવિશ્વાર્થકરો દશાકારવશી મહાન્ ॥

અનાધિર્ નિષ્પ્રપઞ્ચાત્મા શુદ્ધાત્મા તથતાત્મકઃ
ભૂતવાદી યથાવાદી તથાકારી અનન્યવાક્ ॥

અદ્વયો ઽદ્વયવાદી ચ ભૂતકોટિવ્યવસ્થિતઃ
નૈરાત્મ્યસિંહનિર્નાદ કુતીર્થ્યમૃગભીકરઃ ॥

સર્વત્રગો ઽમોઘગતિસ્ તથાગતમનોજવઃ
જિનો જિતારિર્ વિજયી ચક્રવર્તી મહાબલઃ ॥

ગણમુખ્યો ગણાચાર્યો ગણેશો ગણપતિર્ વશી
મહાનુભાવો ધૌરેયો ઽનન્યનેયો મહાનયઃ ॥

વાગીશો વાક્પતિર્ વાગ્મી વાચસ્પતિર્ અનન્તગીઃ
સત્યવાક્ સત્યવાદી ચ ચતુઃસત્યોપદેશકઃ ॥

અવૈવર્તિકો હ્ય્ અનાગામી ખડ્ગઃ પ્રત્યેકનાયકઃ
નાનાનિર્યાણનિર્યાતો મહાભૂતૈકકારણઃ ॥

અર્હન્ ક્ષીણાસ્રવો ભિક્ષુર્ વીતરાગો જિતેન્દ્રિયઃ
ક્ષેમપ્રાપ્તો ઽભયપ્રાપ્તઃ શીતીભૂતો હ્ય્ અનાવિલઃ ॥

વિદ્યાચરણસંપન્નઃ સુગતો લોકવિત્ પરઃ
નિર્મમો નિરહંકારઃ સત્યદ્વયનયે સ્થિતઃ ॥

સંસારપારકોટિસ્થઃ કૃતકૃત્યઃ સ્થલે સ્થિતઃ
કૈવલ્યજ્ઞાનનિષ્ઠ્યૂતઃ પ્રજ્ઞાશસ્ત્રો વિદારણઃ ॥

સદ્ધર્મો ધર્મરાડ્ ભાસ્વાં લોકાલોકકરઃ પરઃ
ધર્મેશ્વરો ધર્મરાજા શ્રેયોમાર્ગોપદેશકઃ ॥

સિદ્ધાર્થઃ સિદ્ધસંકલ્પઃ સર્વસંકલ્પવર્જિતઃ
નિર્વિકલ્પો ઽક્ષયો ધાતુર્ ધર્મધાતુઃ પરો ઽવ્યયઃ ॥

પુણ્યવાન્ પુણ્યસંભારો જ્ઞાનં જ્ઞાનાકરં મહત્
જ્ઞાનવાન્ સદસજ્જ્ઞાની સંભારદ્વયસંભૃતઃ ॥

શાશ્વતો વિશ્વરાડ્ યોગી ધ્યાનં ધ્યેયો ધિયાં પતિઃ
પ્રત્યાત્મવેદ્યો હ્ય્ અચલઃ પરમાદ્યસ્ ત્રિકાયધૃક્ ॥

પઞ્ચકાયાત્મકો બુદ્ધઃ પઞ્ચજ્ઞાનાત્મકો વિભુઃ
પઞ્ચબુદ્ધાત્મમકુટઃ પઞ્ચચક્ષુર્ અસઙ્ગધૃક્ ॥

જનકઃ સર્વબુદ્ધાનાં બુદ્ધપુત્રઃ પરો વરઃ
પ્રજ્ઞાભવોદ્ભવો ઽયોનિર્ ધર્મયોનિર્ ભવાન્તકૃત્ ॥