મઞ્જુશ્રીમૂલકલ્પ · અધ્યાય 48

બોધિસત્ત્વપિટકાવતંસકાન્મહાયાનવૈપુલ્યસૂત્રાદાર્યમઞ્જુશ્રીમૂલકલ્પાત્ પઞ્ચચત્વારિંશતમઃ પટલવિસરાત્ પ્રથમઃ ચતુર્ભગિનીમણ્ડલમનુપ્રવેશસમયગુહ્યતમપટલવિસરઃ પરિસમાપ્ત ઇતિ ॥
અથાષ્ટચત્વારિંશઃ પટલવિસરઃ ।
અથ ખલુ વિજયા નામ દેવી તત્રૈવ પર્ષદિ સન્નિપતિતા સન્નિષણ્ણાભૂવમ્ । સ સ્વકં મણ્ડલોપચર્યા સાધનવિધિં ભાષયતિ સ્મ -
આદૌ તાવદ્ વિવિક્તે દેશે પ્રચ્છન્ને રહસિ પઞ્ચરઙ્ગિકચૂર્ણેન શુક્લકૃષ્ણપીતરક્તહરિતૈઃ ચૂર્ણૈઃ પઞ્ચમ્યા શુભે સિતકૃષ્ણયોઃ પક્ષે ચતુર્થ્યા વા મણ્ડલમાલિખેત્ । ચતુર્હસ્તપ્રમાણં સમન્તાચ્ચતુરસ્રં ચતુઃકોણં ચતુસ્તોરણભૂષિતમ્ । સમન્તાન્મણ્ડલમધ્યે મહોદધિ સમાલિખેત્ ચતુર્મુદ્રાલઙ્કૃતમ્ । મધ્યે સાર્થવાહશ્ચ મુદ્રામણ્ડલાકારં ઇન્દુવર્ણાભં પૂર્વોત્તરે કોણે જયા મુદ્રા અર્ધચન્દ્રાકારસિતં દક્ષિણપૂર્વકોણે વિજયા મુદ્રા તૃકોણાકારં પીતનિર્ભાસં, પશ્ચિમદક્ષિણકોણે અજિતાયા મુદ્રં બન્ધાકારં રક્તાવભાસં ઉત્તરપશ્ચિમકોણે અપરાજિતાયા મુદ્રં વજ્રાકારં કૃષ્ણનિર્ભાસં સર્વતશ્ચ મુદ્રાણાં જ્વાલામાલિનઃ કર્ત્તવ્યાઃ ॥
પૂર્વવચૌક્ષસમાચારેણ ભૂત્વા ચતુઃકોણ ચત્વારઃ પૂર્ણકલશાઃ સ્થાપયિતવ્યાઃ આમ્રપલ્લવપ્રચ્છાદિતમુખાઃ સર્વવ્રીહિરત્નપરિપૂર્ણગર્ભાઃ । મધ્યે તુ સાર્થવાહસ્ય તુમ્બુરેઃ પઞ્ચમં કલશં તથૈવામ્રપલ્લવપ્રચ્છાદિતમુખં પ્રત્યગ્રવસ્ત્રાવકુણ્ઠિતાશ્ચ કાર્યાઃ । તચ્ચ તથૈવ બલિનિવેદ્યપુષ્પાદયો યથા મુદ્રાસ્તથૈવ કાર્યા । તદ્વર્ણશ્ચ પૂષ્પધૂપગન્ધાદયઃ તત્ સર્વં તથૈવ કાર્યમ્ । ચતુર્દિશં ચ બલિઃ ક્ષેપ્તવ્યા । અર્ધરાત્રે મધ્યાહ્ને ચાભિચારુકે પ્રત્યૂષે પૌષ્ટિકે અપરાહ્ને શાન્તિકમસ્તં ગતે વા સવિતરિ કર્મત્રયં ચાપિ યથાકાલોપદિષ્ટમણ્ડલહોમજપસાધનેષુ પ્રયોક્તવ્યમ્ ॥
શુચિનો દક્ષશીલાશ્ચં સ્ત્રીપુરુષાદયઃ અવ્યથિતાશ્ચ પ્રવેશયિતવ્યાઃ સરદારિકાશ્ચ ગુહ્યમન્ત્રધારિણો આદૌ પ્રવેશયિતવ્યાઃ । પ્રાઙ્મુખં સ્થાપયિત્વા વિજયાયા મૂલમન્ત્રેણોદકમભિમન્ત્ર્ય સપ્તાભિમન્ત્રિતં કૃત્વા સર્વેષામભ્યષિઞ્ચેત્ । સકૃદહોરાત્રોષિતાનાં શુચિવસ્ત્રપ્રાવૃતાનામષ્ટૌ પ્રભૃતિ યાવદેકં પ્રાઙ્મુખં પશ્ચાદ્દ્વારેણ પ્રવેશયેત્ પ્રત્યગ્રમુખપ્રચ્છાદિતાં કૃત્વા એકૈકં વિજયાયા મુદ્રં બદ્ધ્વા અઞ્જલિં કૃત્વા પીતપુષ્પ દત્વા ક્ષિપાપયેત્ । વિજયાયા મન્ત્રં કૃત્વા મુખમુત્સાદ્ય મણ્ડલં દર્શાપયેત્ । પ્રદક્ષિણં ચ કારાપયેત્ । સર્વેષાં મુદ્રાં દર્શયેત્ । તતો ઽનુપૂર્વતઃ સર્વે પ્રવેશયિતવ્યા યાવદષ્ટાવિતિ ॥
પૂર્વં તાવદ્ દેવીનામાહ્વાનનમન્ત્રેણ ભ્રાતૃસહિતાનાં મૂલમન્ત્રેણ યથોચિત્તૈઃ પુષ્પૈરાવાહયેત્ । પૂર્વં પશ્ચાદ્ ધૂપં દત્વા યથોચિતં નમસ્કારં કૃત્વા યત્રોત્સહતે શિષ્યઃ સ્ત્રીપુરુષદારકદારિકા વા સ તસ્મિં મણ્ડલે બહિરભિષેચયિતવ્યઃ રાજવત્ સર્વોપકરણૈઃ યથાભિરુચિતૈર્વા મન્ત્રં મણ્ડલાચાર્યસ્ય તુષ્ટિર્યેન વા તુષ્યેત તયાભિષેચયેત્ । અભિષિચ્ય ચ એક વા ત્રયો વા અભિષેચનીયઃ આર્યાભિષેકેણ । એકં ચ વક્તવ્યમ્ । શૃણુ કુલપુત્રકુલદુહિતુર્વા લબ્ધાભિષેકસ્ત્વમનુજ્ઞાતઃ સર્વદેવતાભિશ્ચ સભ્રાતૃસહિતૈશ્ચ સ્વમન્ત્રતન્ત્રેષુ યથેષ્ટં મણ્ડલમાલિખ્ય સ્વમન્ત્રાણાં વિધિનિયમચર્યાકલ્પવિસ્તરાં દદસ્વેતિ વક્તવ્યઃ । તદન્યે વિદ્યાભિષેકેણાભિષેચયિતવ્યા । દ્વિત્રયો વા જનાઃ । શેષાસ્તુ સ્વમન્ત્રચર્યાયાઃ શિક્ષાપયિત્વા વિસર્જયિતવ્યા ॥
તતો મણ્ડલાચાર્યેણ ચન્દનોદકેનાભ્યુક્ષ્ય અર્ઘં દત્ત્વા સ્વમન્ત્રેણૈવ ધૂપપુષ્પાદિભિઃ દેવતાં વિસર્જયિતવ્યા । સર્વં ચોપકરણં આત્મના ગ્રહેતવ્યમ્ । ગૃહ્ય ચ સ્વં પ્રત્યંશં ત્રિતીયભાગં સર્વમનાથેભ્યો દાતવ્યમ્ । શેષમુદકે પ્લાવયિતવ્યમ્ । તં પૃથિવીપ્રદેશં સુલિપ્તં કૃત્વા સુશોભિતં વિગતરજસ્કં યથેષ્ટયો ગન્તવ્યમ્ । યથા સ્વમન્ત્રચર્યાસુ ચ તથા શિક્ષાપયિતવ્યાઃ । સર્વે શિષ્યાઃ પ્રચ્છન્ને રહસિ વિગતજનસમ્પાતે સ્વદેવતામુદ્રાંશ્ચ બન્ધાપયિતવ્યાઃ । તૈરેવ મન્ત્રૈઃ પૂર્વનિર્દિષ્ટૈર્મન્ત્રૈઃ સુવિશેષતઃ સર્વમન્ત્રા સિદ્ધિં ગચ્છન્તીતિ ॥
આશુ સિદ્ધિક્રિયાયુક્તિમન્ત્રાણાં ચ વિશેષતઃ ।
જયાખ્યે મણ્ડલે હ્યુક્તં પૂર્વનિર્દિષ્ટહેતુભિઃ

તત્કર્મવિધિનિર્દિષ્ટઃ વિજયાખ્યે મણ્ડલે શુભે ।
દ્વિતીયં મણ્ડલમિત્યાહુઃ નિર્દિષ્ટં તત્ત્વાર્થમન્ત્રિભિઃ

વિજયા નામતો જ્ઞેયા સર્વકર્માર્થસાધિકા ।
ઈપ્સિતાં સાધયેદર્થાં સર્વમન્ત્રેષુ મન્ત્રવિત્

પૂર્વં જપ્તો મન્ત્રસ્તુ સર્વકર્મેષુ માનવી ।
તત્યાત્મદેવતા રક્ષા વિજયાયા તુ કીર્ત્યતે

પરાભવશ્ચ વિઘ્નાનાં આરમ્ભશ્ચ ફલોન્મુખઃ ।
મણ્ડલે વિજયાખ્યે તુ દ્વિતીયે સર્વાર્થસાધને

દર્શનાન્મુઞ્ચતે પુંસઃ સર્વકલ્વિષમાયતૈઃ ।
જપાદ્ યોગાચ્ચ મન્ત્રજ્ઞઃ પાપશુદ્ધિશ્ચ જાયતે

પરાભવશ્ચાન્યેષાં મન્ત્રાણાં તુ ભૂતલે ।
પરિપક્ષગતાં દેષાં સ્વદુષ્ટાદુષ્ટયોનિજામ્

નાશયે તત્ક્ષણાન્મન્ત્રી વિજયાખ્યે મણ્ડલાવૃતીઃ ।
સર્વકર્મિકમિત્યાહુઃ વશ્યાકર્ષણભૂતિકમ્

સફલં કર્મજં લોકે પુષ્ટિશાન્ત્યર્થસાધકમ્ ।
સર્વાર્થસાધકો હ્યેષ મણ્ડલોદધિસમ્ભવો

વિજયાખ્યે બહુમતઃ પુણ્યઃ પ્રશસ્તઃ સોમપૂજિતો ।
નિત્યં નિત્યતમો પુણ્યો મઙ્ગલો મઘનાશનઃ

સુરૂપો રૂપમન્તશ્ચ ધન્યઃ સર્વાર્થસાધકઃ ।
લિખનાન્મન્ત્રિભિઃ ક્ષિપ્રં ઊર્ધ્વગામર્થસાધકમિતિદિતિ

અજિતાદેવમિત્યાહુઃ પ્રસન્ના બુદ્ધશાસને ।
મણ્ડલં ત્રયમેક વૈ કથિતં લોકપૂજિતમ્

પૂર્વં રિષિવરૈર્મુખ્યૈઃ કથિતં લોકચિહ્નિતૈઃ ।
અધુના ચ પ્રવક્ષ્યે ઽહં અજિતાખ્યં મણ્ડલમ્

યદ્વ તત્ યથૈવ નિયોજયેત્ ।
કિન્તુ વર્ણવરં રક્તં રક્તૈશ્ચાપિ ચૂર્ણકૈઃ

તથૈવ બલિપુષ્પાદ્યાં ગન્ધધૂપાદિભિઃ ક્રમૈઃ ।
સર્વરક્તમયં બાહ્યમસૃગ્ગ્રસ્તાઙ્ગશોભનમ્

તથૈવ મુદ્રાં સર્વત્રં ભીમાં ચૈવ વિયોજયેત્ ।
બલિહોમક્રિયાયુક્તિઃ રક્તૈશ્ચાપિ નિયોજયેત્

કલશાશ્ચૈવ રક્તાભાં રક્તવસ્ત્રાંશ્ચ દાપયત્ ।
તથૈવ મુખવેષ્ટં વા રક્તચ્છત્રં તથૈવ ચ

આસનં શયનં યાનં રક્તં ચૈવ સમાલભેત્ ।
તથૈવ રક્તમન્ત્રાણાં સ્ત્રીપુંસાર્થકારણમ્

રાગાર્થં આવૃતે મન્ત્રાં રાગિણસ્યૈવ યુજ્યતે ।
નાન્યમન્ત્રેષુ મન્ત્રજ્ઞો મતિં કારેથ કત્તૃણામ્

બુદ્ધિમન્તઃ સદાયોગી મન્ત્રજ્ઞો મન્ત્રમીરયેત્ ।
કામાર્થં સમ્પદં પ્રાપ્તા વશ્યાકર્ષણહેતુકમ્

પ્રાપ્નુયાત્ સમ્પદાં સર્વાં અજિતાખ્યે મણ્ડલે ઽદ્ભુતામ્ ।
સર્વભૂતવશાર્થાય મણ્ડલં ભુવિ મુચ્યતે

કથિતં મન્ત્રિભિર્નિત્યં ચિત્તવિક્ષેપકારણાત્ ।
આકૃષ્ય મહોજં કર્મ વશ્યા ભૌતિકચેષ્ટિતમ્

વિક્ષિપ્તચિત્તો મર્ત્યો વૈ આવિષ્ટાવિરલેક્ષિતામ્ ।
દાસભૂતં સમાયાતં સર્વજ્ઞાસમ્પ્રતીચ્છકમ્

વિવશં વશમાયાતં કિઙ્કરાનુવશવર્તિનમ્ ।
તાદૃશં માનુષં દૃષ્ટ્વા પુનરેવ સમ્પ્રમોક્ષયેત્

સ્ત્રિયં વા યદિ વા પુંસં દારકં વાથ દારિકામ્ ।
ભૂયો ઽપિ મૂલમન્ત્રેણ અજિતેનૈવ મોક્ષયેત્

પૂર્વનિર્દિષ્ટકર્મૈશ્ચ વિધિયુક્તૈર્મહીતલે ।
આલિખેન્મણ્ડલં ધીમાં સર્વદૈવ પ્રયોજયેત્

સફલં કર્મ નિર્દિષ્ટં સમન્ત્રં મન્ત્રકર્મણિ ।
પૂર્વમન્યપ્રયોગૈસ્તુ સાધયેદ્ વિધિમુત્તમામ્

સાધ્યમાના હિ સિદ્ધ્યન્તે સર્વે માહેશ્વરા ગણાઃ ।
વિધાનજ્ઞાપતો રૂપં મુદ્રં મન્ત્રાર્થતન્ત્રતા

ક્રિયાયોગપ્રમાણં તુ કથ્યમાનાતિવિસ્તરા ।
એતત્ પ્રમાણતો જ્ઞેયં મણ્ડલે ઽસ્મિન્ નિબોધતામ્

હસ્તા ચ દષ્ટસપ્તા વા ષટ્પઞ્ચચતુરસ્તથા ।
દ્વિહસ્તહસ્તમાત્રં વા વૃતા મણ્ડલમુદ્ભવેત્

જ્યેષ્ઠમષ્ટસ્તથા હસ્તં સપ્ત ષટ્ પઞ્ચ મધ્યમાઃ ।
ચતુર્હસ્તદ્વિહસ્તં વા હસ્તમાત્રં તુ કન્યસમ્

જ્યેષ્ઠે શાન્તિકં કુર્યા તથા મધ્યે તુ પૌષ્ટિકમ્ ।
આભિચારુકમન્ત્રેષુ કુર્યાત્ કન્યસમણ્ડલે

વશ્યાર્થં સર્વભૂતાનાં નિત્યં જમ્ભનમોહને ।
કુર્યાત્ સર્વકર્માણિ જાપી મન્ત્રરતઃ સદા

અજિતાખ્યં મણ્ડલ નિર્દિષ્ટં સર્વગ્રહવિમોક્ષણમ્ ।
યત્ર ભૂતાઃ પિશાચાશ્ચ ગ્રહમાતરપૂતનાઃ

દૃષ્ટમાત્રા વશમાયાન્તિ નિત્યં જમ્ભિતમોહિતાઃ ।
દર્શનાન્મણ્ડલે નિત્યં ક્ષિપ્રં ગચ્છન્તિ વશ્યતામિતિ

અપરાજિતા તુ દેવ્યા વૈ પ્રણમ્ય જિનવરાત્મજમ્ ।
વજ્રકં ગુહ્યકેન્દ્રં તુ મઞ્જુઘોષં સુભૂષણમ્

સર્વાં બુદ્ધસુતાંશ્ચૈવ ........ મહૌજસામ્ ।
સભ્રાતૃપઞ્ચમાં દેવીમિમાં વાચમુદીરયેત્

અહમપ્યેવંવિધં કાર્યં મણ્ડલાર્થેતિ યુક્તિજમ્ ।
વવ્રે ચ શુભસઙ્ગીતં .... યુક્યર્થાક્ષરસંસૃષ્ટિરેષપ્ર

મહાપ્રભાવં મહૌજસ્કં દુર્દાન્તદમકં મતમ્ ।
સકૃષ્ણં કૃષ્ણવર્ણાભં કાલરાત્રિસમપ્રભમ્

યમદૂતાખ્યવર્ણાભં .......... ।
સાક્ષાત્ વિવસ્વતં ઘોરં પરપ્રાણહરં ભયમ્

યથાવત્ પૂર્વનિર્દિષ્ટં દેવીનાં તુ મણ્ડલે ।
તથૈવ તત્ કુર્યાત્ સર્વં વર્જયિત્વા તુ વર્ણતો

શ્મશાને નિત્યમાલેખ્યં પુરે દક્ષિણતઃ સદા ।
સધૂમે જ્વાલામાલીઢે અસ્થિકઙ્કાલવેષ્ટિતે

મધ્યસ્થે સવસૃજે દેશે તત્રસ્થે તુ મહીતલે ।
શ્મશાનભસ્મના લેખ્યં કૃષ્ણવર્ણે તુ ભૂતલે

યથૈવં પૂર્વનિર્દિષ્ટં મન્ત્રૈરર્ચવિધિક્રમમ્ ।
તત્ સર્વં ક્ષિપ્રતો મન્ત્રી સર્વં ચૈવ નિયોજયેત્

સ્વમન્ત્રં મન્ત્રનાથં ચ તુમ્બુરું સાર્થવાહકમ્ ।
........ મહોદધિસમાવૃતામ્

અજિતાયામાશુ નિર્દિષ્ટા વિજયા ખડ્ગપાણિની ।
ધનુર્હસ્તાં સદા દેવી જયા તામભિનિર્દિશેત્

વિચિત્રપ્રહરણા હ્યેતા વિચિત્રાભરણભૂષિતા ।
વિચિત્રગતિસત્ત્વાખ્યા વિચિત્રા વેષચેષ્ટિતા

આલિખ્ય મણ્ડલે હ્યત્ર કૃષ્ણવર્ણા તુ ભૂતલે ।
પરપ્રાણહરં હ્યેતત્ મણ્ડલં ભુવિ ચેષ્ટિતમ્

વિવિધાર્થક્રિયા મન્ત્રા કર્મમુદ્ભવા ।
તત્ સર્વં પૂર્વવત્ કૃત્વા પશ્ચાત્ કર્મ સમારભેત્

જપહોમક્ષયા મન્ત્રા મણ્ડલાંશ્ચૈવ દર્શનમ્ ।
પ્રવેશં મણ્ડલે હ્યસ્મિન્ તત્પૂર્વં વિધિમુદ્ભવૈઃ

એષ સંક્ષેપતો હ્યુક્તઃ કથ્યમાનો ઽતિવિસ્તરમ્ ।
મણ્ડલં દેવિમુખ્યાયાઃ કન્યસાયા તુ કીર્ત્તિતમ્

અપરાજિતાખ્યનામતઃ જ્ઞેયો મણ્ડલં ભુવિ વિશ્રુતમ્ ।
અજિતં સર્વતઃ પૂર્વં રાક્ષસેશ્વરકિન્નરૈઃ

ભૂતૈર્દૈત્યમુખ્યૈસ્તુ યમમાતરસગ્રહૈઃ ।
કૂષ્માણ્ડે વ્યન્તરૈશ્ચાપિ પિશિતાશૈઃ સપૂતનૈઃ

તન્ત્રે તુ સર્વતો મન્ત્રૈઃ ક્રવ્યાદૈસ્તુ સકશ્મલૈઃ ।
અસુરાધ્યક્ષૈઃ મહાઘોરૈઃ સર્વભૂતમહોદયૈરિતિ

અથ તુમ્બુરુઃ સાર્થવાહો વૈસ્વં મણ્ડલમભાષયમ્ ।
તુમ્બુરાખ્યં વામતો મર્ત્યાં વજ્રધૃક્ તં નિબોધતામ્

પૂર્વનિર્દિષ્ટમિત્યાહુઃ પુનરેવ મહીતલે ।
પ્રણમ્ય વજ્રિણં મૂર્ધ્ના ઇમાં વાચમુશિક્ષિરે

સર્વં પૂર્વનિર્દિષ્ટં મણ્ડલં ચતુરોદયમ્ ।
પ્રથમં સર્વકર્માન્તં દ્વિતીયં તુ ઇહોચ્યતે

વ્યતિમિશ્રં તથા યુક્ત્યા અનુપૂર્વમિહાગતમ્ ।
મણ્ડલં ચતુરાખ્યં તુ સર્વભૂતપ્રસાધકમ્

શૂન્યવેશ્મ તથા નિત્યં શૂન્યદેવકુલે સદા ।
પ્રચ્છન્ને રહસિ વિસ્રબ્ધે સ્વગૃહે વાવવરકે ઽપિ ચ

વિચિત્રૈરઙ્ગનેપથ્યૈ વિચિત્રૈશ્ચારુપૂર્ણકૈઃ ।
પઞ્ચરઙ્ગિકચૂર્ણૈસ્તુ વિવિધૈર્વા ફલોદ્ભવૈઃ

શાલિતણ્ડુલપિષ્ટૈસ્તુ વિચિત્રૈરઙ્ગમુજ્જ્વલૈઃ ।
શુક્લચૂર્ણૈસ્તથા યુક્તૈઃ ચન્દનાગરુધૂપિતૈઃ

વિમિશ્રૈશ્ચન્દનચૂર્ણૈસ્તુ કુઙ્કુમાગરુયોજિતૈઃ ।
કર્પૂરકસ્તૂરિકાસિક્તૈઃ પ્રિયઙ્ગુકેશરાદિભિઃ

સ્પૃક્કાસીરસમાયુક્તૈઃ કૃષ્ણાગરુસુધૂપિતૈઃ ।
ચૂર્ણૈર્વિવિધગન્ધૈર્વા નિત્યં મણ્ડલમાલિખેત્

ત્રિઃસ્નાયી જપહોમી ચ ત્રિચેલપરિવર્તિનઃ ।
વ્યતિમિશ્રયક્ષે તથા મન્ત્રી સિતાસિતસુચિહ્નિતે

યથેષ્ટં તિથિનક્ષત્રે નિત્ય મણ્ડલમાલિખેત્ ।
ચતુર્હસ્તપ્રમાણં વૈ યથોક્તં વિધિપૂર્વકે

તત્ સર્વમાલિખેદ્ ધીમાં મન્ત્રં યત્નાદ્ધિ ચેતસા ।
ચતુઃકોણં ચતુર્દ્વારં ચતુસ્તોરણસંયુતમ્

મધ્યે સરિપતિર્નિત્યં મણ્ડલે ઽસ્મિં સમાલિખેત્ ।
મધ્યસ્થં પદ્મમારૂઢં ધર્મચક્રાનુવર્તિનમ્

શાક્યસિંહં મહાવીરં મન્ત્રી બુદ્ધં સમાલિખેત્ ।
શેષં મુદ્રવરૈઃ ક્ષિપ્રં સ્વભ્રાતૃસહપઞ્ચમમ્

આલિખેત્ સર્વતો મન્ત્રી ચતુઃકોણે તુ સર્વતઃ ।
જ્યેષ્ઠાત્ પદ્મવરે તસ્થૌ અધસ્તાદ્ બુદ્ધસ્યામ્બુધેઃ ।
તુમ્બુરે મુદ્રમાલેખ્યં સિતવર્ણો ઽથ સર્વતઃ

સર્વે શુક્લવર્ણાભા કુન્દેન્દુશશિપ્રભા ।
કુમુદાકારસઙ્કાશા સર્વવસ્તુસુશુક્લકા

પૂર્વનિર્દિષ્ટયોગેન દેવીનાં તુ વિધાનવિત્ ।
તત્ સર્વં કુર્યાન્મન્ત્રી સર્વકર્માર્થસાધનમિતિ

યથૈવ મણ્ડલં સર્વપટે સ્મિત પ્રયોજયેત્ ।
ત્રિવિધં પટનિર્દિષ્ટં મણ્ડલે ઽસ્મિં યથાવિધિ

શેષં યથેષ્ટવત્ કુર્યાત્ પટમણ્ડલે ભૂતલે ।
આલેખ્યં મન્ત્રતન્ત્રે ઽસ્મિં યથાવિહિતે મતે

ફલકે પટ્ટકે વાપિ યથાકાષ્ઠસમુદ્ભવૈઃ ।
આલેખ્યાઃ દેવતાઃ સર્વે સભ્રાતૃસહપઞ્ચમાઃ

યથૈવ મણ્ડલે સર્વં તત્ સર્વં આલિખેત્ પટે ।
અમ્બરે વાપિ નિર્દિષ્ટં યથોચિતસમુદ્ભવે ।
નિર્દિષ્ટં પટમન્ત્રજ્ઞૈઃ પ્રતિમાનાં તુ કીર્ત્યતે

ચન્દનં મલયમિત્યાહુ રાગં ચાપિ સકેસરમ્ ।
પુન્નાગં ચૈવ મન્ત્રજ્ઞૈઃ નિત્યં પ્રતિમાસુ યોજયેત્

પિયાલં પદ્મકં વિન્દ્યાત્ રોધ્રકાષ્ઠં મહીતલે ।
સરલં દેવદારું ચ કાશ્મીરં ચૈવ સઘણ્ટકમ્

કુટજાર્જુનજમ્બૂકં પ્રિયઙ્ગુષ્ઠોમકોદ્ભવમ્ ।
રક્તચન્દનકાષ્ઠં તુ વિશેષાત્ પટમુચ્યતે

પ્લક્ષોદુમ્બરકાષ્ઠં ચ સહકારં વિશેષતઃ ।
પુણ્ડરીકં સસર્જં વૈ સિન્દુવારં સિદ્ધોદ્ભવમ્

વકુલં તિલકં ચૈવ કાષ્ઠં સપ્તચ્છદં તથા ।
વિવિધા વૃક્ષજાતીનાં પુંસસ્ત્રીનપુંસકામ્

સર્વેષાં ગ્રહણં કાષ્ઠે મૂલગણ્ડે તતોર્ધ્વગમ્ ।
શાખાસુ સર્વતો ગ્રાહ્યા મધુકસ્તિક્તકાષ્ઠયો

પિચુમન્દં તથા કાષ્ઠે ઽરિષ્ટે ભૂતતરૌ તથા ।
પુત્રઞ્જીવકકાષ્ઠેષુ નિત્યં ચૈવાભિચારુકે ।
અશ્વત્થે શાન્તિકં વિન્દ્યાત્ કાષ્ઠે ચાપિ મહીતલે

પૌષ્ટ્યર્થં કાષ્ઠમિત્યુક્તં અશોકં શીર્ષમેવ વા ।
સર્વકર્માણિ સર્વત્ર સર્વકાષ્ઠેષુ યોજયેત્

મૂલકાષ્ઠેન પ્રતિમાગ્રા મૂલનક્ષત્રયોજિતા ।
તતસ્તમ્ભકૃતે કાષ્ઠે જ્યેષ્ઠનક્ષત્ર યોજયેત્ ।
તતઃ શાખાકૃતં કાષ્ઠં સર્વનક્ષત્ર યોજયેત્

તતોર્ધ્વનક્ષત્રરેવત્યા ઇન્દુવારેણ કારયેત્ ।
મૂલ આદિત્યવારે વૈ સ્તમ્ભઃ શુક્રાદ્યમીક્ષ્યતે

સર્વવારૈસ્તથા મુખ્યૈઃ સર્વગ્રહગણાદૃતે ।
મૂલે રસાતલં ગચ્છેત્ આસુરિં તનુમાવિશેત્

તતસ્તમ્ભકૃતૈઃ કાષ્ઠૈઃ ગાણ્ડૈશ્ચાપિ સમુદ્ભવૈઃ ।
વશ્યાકર્ષણભૂતાનાં જમ્ભસ્તમ્ભમોહનામ્

કુર્યાદાભિચારં વૈ તેષુ પ્રતિમા સમાવિશેત્ ।
તતો ર્ધ્વં નભસ્તલં ગચ્છેદૂર્ધ્વકાષ્ઠસમુદ્ભવૈઃ

પ્રતિમાં દેવ્ય સમાયુક્તે સુરયાનસમાશ્રયામ્ ।
શાખાસુ સર્વતો ગચ્છેદન્તર્ધાનસુખોદયામ્

દિશાં ચ સર્વતો મન્ત્રી યથેષ્ટં વા કર્મ સમારભેત્ ।
કાષ્ઠાઃ સર્વે તુ નિર્દિષ્ટાઃ પ્રતિમાલક્ષણમિષ્યતે

નૌયાન ચ સમારૂઢા દેવ્યાકારસુભૂષિતાઃ ।
કુમાર્યાકારચિહ્નસ્તુ પઞ્ચચીરકમૂર્ધજાઃ

તથૈવ કરવિન્યસ્તૌ મણ્ડલે ઽસ્મિ હિ બોધિતાઃ
તુમ્બુરુઃ સાર્થવાહો વૈ કર્ણધારો મહાદ્યુતિઃ

કરવાલકરન્યસ્તો વાહમન્તો ઽથ સવ્યકે ।
તિર્યગ્નાવગતા મન્ત્રા ત્ર્યઙ્ગુલદ્વ્યઙ્ગુલોદ્ભવા

દીર્ઘશો વિતસ્તિમાત્રં વા નાવં ચૈવ સુકારયેત્ ।
સુસૃષ્ટં શ્વેતસઙ્કાશં શઙ્ખેન્દુધવલસન્નિભમ્

જયા કારયેદ્ ધીમાન્ તુમ્બુરું ચ વિશેષતઃ ।
વિજયાં પીતનિર્ભાસામજિતાં ચૈવ સુરક્તિકામ્

અપરાજિતા કૃષ્ણવર્ણા વૈ શુક્લાં ચૈવ અનામિકામ્ ।
પ્રસન્નાં તુમ્બુરુમૂર્ત્ત્યા જયાં ચૈવ વિનિર્દિશેત્

ઈષિદ્ભ્રુકુટિનો દેવ્યા વિજયા ચાપરાજિતા ।
અજિતા સૌમ્યવેશા તુ કર્તવ્ય થ સર્વતઃ

અઙ્ગુષ્ઠપર્વમાત્રં વા કન્યસાઙ્ગુલિમાત્રતા ।
સવાઃ પ્રમાણવેષાખ્યા કથિતા સર્વમન્ત્રિણૈઃ

દન્તી ભોગગદા ખ્યાતા સૌવર્ણપાર્થિવોદ્ભવાઃ ।
પૃથિવ્યામધિપત્યોર્વા કુર્યામેતાં સુશોભનામ્

રૌપ્યં તામ્રમયીં વાપિ પ્રતિમા ખ્યાતા વશાવહા ।
આકર્ષણં ચ ભૂતાનાં કાંસી હ્યુક્તા મહીતલે

ત્રપુસીસકલોહૈશ્ચ પ્રતિમા હ્યુક્તાભિચારુકે ।
સમારૈ રત્નવિશેષૈશ્ચ પ્રવાલસ્ફટિકસમ્ભવૈઃ

કુર્યાત્ પ્રતિમાં સૌમ્યાં આશુ સિદ્ધિલિલુપ્સુભિઃ ।
કપાલાસ્થિમયૈઃ પ્રતિમૈઃ કર્મ કશ્મલજોદ્ભવમ્

શૃઙ્ગૈઃ વિવિધમુખ્યાદ્યૈઃ યથાન્યસ્તાર્થલાભિનામ્ ।
સિદ્ધ્યન્તે સર્વમન્ત્રા વૈ ક્ષુદ્રમન્ત્રાશ્ચ ભૂતલે

યથાસમ્ભવતો લાભા યથાપ્રાપ્તાર્થસમ્ભવા ।
સિદ્ધ્યન્તે સર્વતઃ કૃત્વા પ્રતિમાભિશ્ચ યોજિતા