મૈત્રેયવ્યાકરણ · શ્લોક 27-46

બ્રાહ્મણસ્ તસ્ય રાજ્ઞશ્ ચ સુબ્રાહ્મણઃ પુરોહિતઃ
બહુશ્રુતશ્ ચતુર્વેદસ્ તસ્યોપધ્યાયો ભવિષ્યતિ ॥

અધ્યાપકો મન્ત્રધરઃ સ્મૃતિમાન્ વેદપારગઃ
કૈટાભે સ નિર્ઘણ્ટે ચ પદવ્યાકરણે તથા ॥

તદા બ્રહ્માવતી નામ તસ્ય ભાર્યા ભવિષ્યતિ
દર્શનીયા પ્રાસાદિકા અભિરૂપા યશસ્વિની ॥

તુષિતેભ્યશ્ ચ્યવિત્વા તુ મૈત્રેયો હ્ય્ અગ્રપુદ્ગલઃ
તસ્યાઃ કુક્ષૌ સ નિયતં પ્રતિસન્ધિં ગ્રહીષ્યતિ ॥

દશ માસાંશ્ ચ નિખિલાન્ ધારયિત્વા મહાદ્યુતિઃ
સુપુષ્પિતે ચ ઉદ્યાને ગત્વા મૈત્રેયમાતરા ॥

ન નિષણ્ણા ન સુપ્તાસૌ સ્થિતા સા ધર્મચારિણી
દ્રુમસ્ય શાખામ્ આલમ્બ્ય મૈત્રેયં જનયિષ્યતિ ॥

નિષ્ક્રમિષ્યતિ પાર્શ્વેન દક્ષિણેન નરોત્તમઃ
અભ્રકૂટાદ્ યથા સૂર્યો નિર્ગતશ્ ચ પ્રભાસતે ॥

અલિપ્તો ગર્ભપઙ્કેન પદ્મં ચૈવ યથામ્ભસા
ત્રૈધાતુકમ્ ઇદં સર્વં પ્રભયા પૂરયિષ્યતિ ॥

અથ પ્રીતસ્ સહસ્રાક્ષો દેવરાજશ્ શચીપતિઃ
ગ્રહીષ્યતિ કુમારં તં જાયમાનં નરોત્તમમ્ ॥

શ્રિયા જ્વલન્તં મૈત્રેયં દ્વાત્રિંશદ્વરલક્ષણમ્
મુઞ્ચ મુઞ્ચ સહસ્રાક્ષ જાતમાત્રો વદિષ્યતિ ॥

પદાનિ જાતમાત્રસ્ તુ સપ્તાસૌ પ્રક્રમિષ્યતિ
પદે પદે નિધનં ચ પદ્મં પદ્મં ભવિષ્યતિ ॥

દિશશ્ ચતસ્રશ્ ચોદ્વીક્ષ્ય વાચં પ્રવ્યાહરિષ્યતિ
ઇયં મે પશ્ચિમા જાતિર્ નાસ્તિ ભૂયઃ પુનર્ભવઃ ॥

ન પુનર્ આગમિષ્યામિ નિર્વાસ્યામિ નિરાશ્રવઃ
શીતોષ્ણવારિધારાભિસ્ સ્નાપયિષ્યન્તિ પન્નગાઃ ॥

દિવ્યામ્બરાણિ પુષ્પાણિ પતિષ્યન્તિ નભસ્તલાત્
શ્વેતં તસ્ય સુરાશ્ છત્ત્રં ધારયિષ્યન્તિ મૂર્ધનિ ॥

હૃષ્ટશ્ ચૈવ સહસ્રાક્ષો દેવરાજો શચીપતિઃ
ગ્રહીષ્યતિ તં કુમારં દ્વાત્રિંશદ્વરલક્ષણમ્
શ્રિયા જ્વલન્તં મૈત્રેયં માતુર્ હસ્તે પ્રદાસ્યતિ ॥

મનોરમાં ચ શિવિકાં નાનારત્નવિભુષિતામ્
આરૂઢા પુત્રસહિતા વહિષ્યતે ચ દેવવત્ ॥

તતસ્ તૂર્યસહસ્રેષુ વાદ્યમાનેષુ તત્પુરમ્
પ્રવિષ્ટમાત્રે મૈત્રેયે પુષ્પવર્ષં પતિષ્યતિ ॥

તસ્મિંશ્ ચ દિવસે ભાર્યા ગુર્વિણ્યઃ પ્રસવિષ્યન્તિ
સર્વાસ્ તા જનયિષ્યન્તિ પુત્રાન્ ક્ષેમેણ સ્વસ્તિના ॥

દૃષ્ટ્વા ચ પુત્રં સુબ્રહ્મા દ્વાત્રિંશદ્વરલક્ષણમ્
પ્રત્યવેક્ષ્ય ચ મન્ત્રેષુ તતઃ પ્રીતો ભવિષ્યતિ ॥

ગતિદ્વયં કુમારસ્ય યથા મન્ત્રેષુ દૃશ્યતે
નરાધિપશ્ ચક્રવર્તી બુદ્ધો વા દ્વીપદોત્તમઃ ॥