Maitreyavyākaraṇa · Verses 27-46

brāhmaṇas tasya rājñaś ca subrāhmaṇaḥ purohitaḥ
bahuśrutaś caturvedas tasyopadhyāyo bhaviṣyati //

adhyāpako mantradharaḥ smṛtimān vedapāragaḥ
kaiṭābhe sa nirghaṇṭe ca padavyākaraṇe tathā //

tadā brahmāvatī nāma tasya bhāryā bhaviṣyati
darśanīyā prāsādikā abhirūpā yaśasvinī //

tuṣitebhyaś cyavitvā tu maitreyo hy agrapudgalaḥ
tasyāḥ kukṣau sa niyataṃ pratisandhiṃ grahīṣyati //

daśa māsāṃś ca nikhilān dhārayitvā mahādyutiḥ
supuṣpite ca udyāne gatvā maitreyamātarā //

na niṣaṇṇā na suptāsau sthitā sā dharmacāriṇī
drumasya śākhām ālambya maitreyaṃ janayiṣyati //

niṣkramiṣyati pārśvena dakṣiṇena narottamaḥ
abhrakūṭād yathā sūryo nirgataś ca prabhāsate //

alipto garbhapaṅkena padmaṃ caiva yathāmbhasā
traidhātukam idaṃ sarvaṃ prabhayā pūrayiṣyati //

atha prītas sahasrākṣo devarājaś śacīpatiḥ
grahīṣyati kumāraṃ taṃ jāyamānaṃ narottamam //

śriyā jvalantaṃ maitreyaṃ dvātriṃśadvaralakṣaṇam
muñca muñca sahasrākṣa jātamātro vadiṣyati //

padāni jātamātras tu saptāsau prakramiṣyati
pade pade nidhanaṃ ca padmaṃ padmaṃ bhaviṣyati //

diśaś catasraś codvīkṣya vācaṃ pravyāhariṣyati
iyaṃ me paścimā jātir nāsti bhūyaḥ punarbhavaḥ //

na punar āgamiṣyāmi nirvāsyāmi nirāśravaḥ
śītoṣṇavāridhārābhis snāpayiṣyanti pannagāḥ //

divyāmbarāṇi puṣpāṇi patiṣyanti nabhastalāt
śvetaṃ tasya surāś chattraṃ dhārayiṣyanti mūrdhani //

hṛṣṭaś caiva sahasrākṣo devarājo śacīpatiḥ
grahīṣyati taṃ kumāraṃ dvātriṃśadvaralakṣaṇam
śriyā jvalantaṃ maitreyaṃ mātur haste pradāsyati //

manoramāṃ ca śivikāṃ nānāratnavibhuṣitām
ārūḍhā putrasahitā vahiṣyate ca devavat //

tatas tūryasahasreṣu vādyamāneṣu tatpuram
praviṣṭamātre maitreye puṣpavarṣaṃ patiṣyati //

tasmiṃś ca divase bhāryā gurviṇyaḥ prasaviṣyanti
sarvās tā janayiṣyanti putrān kṣemeṇa svastinā //

dṛṣṭvā ca putraṃ subrahmā dvātriṃśadvaralakṣaṇam
pratyavekṣya ca mantreṣu tataḥ prīto bhaviṣyati //

gatidvayaṃ kumārasya yathā mantreṣu dṛśyate
narādhipaś cakravartī buddho vā dvīpadottamaḥ //