મૈત્રેયવ્યાકરણ · શ્લોક 91-26

તં ચ શક્રઃ સહસ્રાક્ષો દેવરાજઃ શચીપતિઃ
પ્રહૃષ્ટઃ પ્રાઞ્જલિર્ભૂત્વા મૈત્રેયં સ્તોષ્યતે જિનમ્ ॥

નમસ્ તે પુરુષાજન્ય નમસ્ તે પુરુષોત્તમ
અનુકમ્પસ્વ જનતાં ભગવન્ન્ અગ્રપુદ્ગલ ॥

મહર્દ્ધિકો દેવપુત્રસ્ તસ્ય મારો ભવિષ્યતિ
સ ચાપિ પ્રાઞ્જલિર્ભૂત્વા સ્તોષ્યતે લોકનાયકમ્ ॥

શુદ્ધાવાસસહસ્રૈશ્ ચ બહુભિઃ પરિવારિતઃ
પ્રવેક્ષ્યતે ચ મૈત્રેયો લોકનાથો વિનાયકઃ ॥

બ્રાહ્મણપરિવારેણ બ્રહ્મા ચાપિ ગિરાસ્ફુટમ્
કથયિષ્યતિ સદ્ધર્મં બ્રહ્મં ઘોષમ્ ઉદીરયન્ ॥

આકીર્ણા પૃથિવી સર્વા અર્હદ્ભિશ્ ચ ભવિષ્યતિ
ક્ષીણાસ્રવૈર્ વાન્તદોષૈઃ પ્રહીણભવબન્ધનૈઃ ॥

હૃષ્ટા દેવમનુષ્યાશ્ ચ ગન્ધર્વા યક્ષરાક્ષસાઃ
શાસ્તુઃ પૂજાં કરિષ્યન્તિ નાગાશ્ ચાપિ મહર્દ્ધિકાઃ ॥

તે વૈ નૂનં ભવિષ્યન્તિ ચ્યાનઘાશ્ (?) છિન્નસંચયાઃ
ઉત્ક્ષિપ્તપરિખાઃ ધીરા અનાદાના નિરુત્સકાઃ
બ્રહ્મચર્યં ચરિષ્યન્તિ મૈત્રેયસ્યાનુશસને ॥

તે ઽપિ નૂનં ભવિષ્યન્તિ અમમા અપરિગ્રહાઃ
અજાતરૂપરજતા અનિકેતા અસંસ્તવાઃ
બ્રહ્મચર્યં ચરિષ્યન્તિ યે મૈત્રેયાનુશસને ॥

તે વૈ પાનં ગમિષ્યન્તિ છિત્વા જાલમ્ એવ ભુજાત્
ધ્યાનાનિ ચોપસંપદ્ય પ્રીતિસૌખ્યસમન્વિતાઃ
બ્રહ્મચર્યં ચરિષ્યન્તિ મૈત્રેયસ્યાનુશસને ॥

ષષ્ટિં વર્ષસહસ્રાણિ મૈત્રેયો દ્વિપદોત્તમઃ
દેશયિષ્યતિ સદ્ધર્મં શાસ્તા લોકાનુકમ્પયા ॥

શતાનિ ચ સહસ્રાણિ પ્રાણિનં સ વિનાયકઃ
વિનીય ધર્મકાયેન તતો નિર્વાણમ્ એષ્યતિ ॥

તસ્મિંશ્ ચ નિર્વૃતે ધીરે મૈત્રેયે દ્વિપદોત્તમે
દશવર્ષસહસ્રાણિ સદ્ધર્મઃ સ્થાસ્યતિ ક્ષિતૌ ॥

પ્રસાદયતિ ચિત્તાનિ તસ્માચ્ છાક્યમુનૌ જિને
તતો દૃક્ષથ મૈત્રેયં સંબુદ્ધં દ્વિપદોત્તમમ્ ॥

તસ્માદ્ ધર્મે ચ બુદ્ધે ચ સઙ્ઘે ચાપિ ગણોત્તમે
પ્રસાદયતિ ચિત્તાનિ ભવિષ્યતિ મહર્દ્ધિકમ્ ॥

તં તાદૃશં કારુણિકં મૈત્રેયં દ્વિપદોત્તમમ્
આરાધયિત્વા કાલેન તતો નિર્વાણમ્ એષ્યથ ॥

ઇદમ્ આશ્ચર્યકં શ્રુત્વા દૃષ્ટ્વા ચ વિભવાનલ્પિકામ્
કો વિદ્વાન્ ન પ્રસીદેત અપિ કૃષ્ણાસુ જાતિષુ ॥

તસ્માદ્ ઇહાત્મકામેન માહાત્મ્યમ્ અભિકાઙ્ક્ષતાઃ
સદ્ધર્મો ગુરુકર્તવ્યઃ સ્મરતા બુદ્ધશાસનમ્ ॥

એલાપત્ત્રશ્ ચ ગાન્ધારે શઙ્ખો વારાણસીપુરે ॥

ચતુર્ભિર્ એભિર્ નિધિભિઃ સ રાજા સુસમન્વિતઃ
ભવિષ્યતિ મહાવીરશ્ શતપુણ્યબલોદિતઃ ॥