મહાસુભાષિતસંગ્રહ · શ્લોક 4985-5004

આબાલ્યાધિગમાન્ મયૈવ ગમિતઃ કોટિં પરામુન્નતેર્ અસ્મત્સંકથયૈવ પાર્થિવસુતઃ સંપ્રત્યસૌ લજ્જતે ।
ઇત્થં ખિન્ન ઇવાત્મજેન યશસા દત્તાવલમ્બોઽમ્બુધેર્ યાતસ્ તીરતપોવનાનિ ભવતો વૃદ્ધો ગુણાનાં ગણઃ ॥

આબાહૂદ્ગતમણ્ડલાગ્રરુચયઃ સંનદ્ધવક્ષઃસ્થલાઃ સોષ્માણો વ્રણિનો વિપક્ષહૃદયપ્રોન્માથિનઃ કર્કશાઃ ।
ઉત્સૃષ્ટામ્બરદૃષ્ટવિગ્રહભરા યસ્ય સ્મરાગ્રેસરા મારા મારવધૂસ્તનાશ્ચ ન દધુઃ ક્ષોભં સ વોઽવ્યાજ્જિનઃ ॥

આબ્રહ્મકીટાન્તમિદં નિબદ્ધં પુંસ્ત્રીપ્રયોગેન જગત્ સમસ્તમ્ ।
વ્રીડાત્ર કા યત્ર ચતુર્મુખત્વમ્ ઈશોઽપિ લોભાદ્ ગમિતો યુવત્યાઃ ॥

આભઙ્ગુરાગ્રબહુગુણ- દીર્ઘાસ્વાદપ્રદા પ્રિયાદૃષ્ટિઃ ।
કર્ષતિ મનો મદીયં હ્રદમીનં બડિશરજ્જુરિવ ॥

આભરણસ્યાભરણં પ્રસાધનવિધેઃ પ્રસાધનવિશેષઃ ।
ઉપમાનસ્યાપિ સખે પ્રત્યુપમાનં વપુસ્ તસ્યાઃ ॥

આભાતિ ચન્દ્રરહિતા ન કદાપિ રાત્રિશ્ ચન્દ્રોઽપિ રાત્રિરહિતો ગતકાન્તિરેવ ।
કિં કારણં યદનયોઃ પ્રતિમાસમેકો જાતો નિરન્તરતયા પરિરમ્ભયોગઃ ॥

આભાતિ ધૂસરતરં તિમિરં પુરસ્તાદ્ અન્તઃસ્ફુરદ્વિરલતારકભારમેતત્ ।
દગ્ધું વિયોગિવિપિનં સિતરશ્મિવહ્નેર્ ધૂમો જ્વલિષ્યત ઇવાનુગતસ્ફુલિઙ્ગઃ ॥

આભાતિ બાલિકેયં પાણિસ્પર્શેન પુલકિતાવયવા ।
અભિનવવસન્તસઙ્ગાદ્ આવિર્મુકુલેવ બાલચૂતલતા ॥

આભાતિ રોમરાજિશ્ ચલદલિકુલકોમલા વિશાલાક્ષ્યાઃ ।
નાભીવિવરાન્તર્ગત- મદનાનલધૂમલેખેવ ॥

આભાતિ શોભાતિશયપ્રપઞ્ચાદ્ એણીદૃશોઽસ્યા રમણીયશોભા ।
વેણી લસત્કુન્તલધોરણીનાં શ્રેણીવ કિં ચારુહરિન્મણીનામ્ ॥

આભાત્યેતદ્ દ્વિચન્દ્રં વિયદપિ નિખિલં હન્તિનસ્તુ ત્રિદન્તા ગઙ્ગાપૂરશ્ચતુર્ધા પ્રવિલસતિ લસત્પઞ્ચદન્તઃ કરીન્દ્રઃ ।
ષડ્વક્ત્રઃ (સપ્તવક્ત્રઃ) પરિણમતિ તથા ષઙ્ગુણાઃ સપ્તસંખ્યાઃ શઙ્કે ત્વત્કીર્તિમૂર્ત્યા નવમિવ જગદાલક્ષ્યતે ક્ષોણિપાલ ॥

આભિચારિકહોમૈસ્તુ મન્ત્રૈઃ ષટ્કર્મસાધકઃ ।
યન્ત્રલેખનકૈરુગ્રૈર્ ઉપાંશુજપનાદિભિઃ ॥

આભિમુખ્યદશામાત્રાદ્ આદર્શ ઇવ સજ્જનઃ ।
શીઘ્રં રક્તમરક્તં વા ગૃહ્ણાતિ સ્વપ્રસાદતઃ ॥

આભીરદારકમુદઞ્ચિતકિંકિણીકમ્ આતામ્રપાણિચરણં પુરુષં પુરાણમ્ ।
મઞ્જીરમઞ્જુમરુણાધરમમ્બુજાક્ષમ્ અદ્વૈતચિન્મયમનાદિમનન્તમીડે ॥

આભીરનાર્યાઃ કરમાદધાનો ન શઙ્કસે માધવ કિં બ્રવીષિ ।
પલ્લીપતિર્ બલ્લવવલ્લભાયાઃ કરગ્રહે કિં વિદધીત શઙ્કામ્ ॥

આભીરાદિગિરઃ કાવ્યેષ્વ્ અપ્રભ્રંશ ઇતિ સ્મૃતાઃ ।
શાસ્ત્રેષુ સંસ્કૃતાદન્યદ્ અપભ્રંશતયોદિતમ્ ॥

આભુગ્નાઙ્ગુલિપલ્લવૌ કચભરે વ્યાપારયન્તી કરૌ બન્ધોત્કર્ષનિબદ્ધમાનસતયા શૂન્યાં દધાના દૃશમ્ ।
બાહૂત્ક્ષેપસમુન્નતે સ્તનતટેપર્યસ્તચીનાંશુકા હ્રીસઙ્કોચિતબાહુમૂલસુભગં બધ્નાતિ જૂટિં વધૂઃ ॥

આભુજ્યેન્દ્રદિશં કુબેરકકુભં સ્વાશ્લિષ્ય ગાઢં કરૈર્ આચુમ્બ્યામ્બુજિનીં સમં કુમુદિનીમુલ્લાસ્ય તાં દક્ષિણામ્ ।
એષોઽદ્યાપિ પરારુચિર્વિજયતે રાત્રીશ્વરો દ્રાગિતિ ક્રોધાદેવ લયં જગામ ચતુરસ્તારાગણઃ સર્વતઃ ॥

આભોગઃ સ્તનયોર્મહત્યતિમહાન્ મુક્તાસ્રજં ભાસુરો માહાત્મ્યાવહિતપ્રભૂતસુમનોબાણોઽપિ તેઽન્તઃ સ્થિતઃ ।
ભાલં સ્વચ્છવિરોચનં બલિરસાવપ્યાસ્ત એવોદરે રોમ્ણાં વિક્રિયયા યુવત્વભવયા વિન્ધ્યાવલી વર્તતે ॥

આભોગભૂષણવતી કુચકુમ્ભસંપદ્ અન્તર્વિકારમધુરાણિ વિલોકિતાનિ ।
અઙ્ગાન્યનઙ્ગપિશુનાનિ કુલાઙ્ગનાનાં ધીરાત્મનામપિ મનઃ પરિતાપયન્તિ ॥