Mahāsubhāṣitasaṃgraha 1-9979 · Verses 4985-5004

ābālyādhigamān mayaiva gamitaḥ koṭiṃ parāmunnater asmatsaṃkathayaiva pārthivasutaḥ saṃpratyasau lajjate /
itthaṃ khinna ivātmajena yaśasā dattāvalambo'mbudher yātas tīratapovanāni bhavato vṛddho guṇānāṃ gaṇaḥ //

ābāhūdgatamaṇḍalāgrarucayaḥ saṃnaddhavakṣaḥsthalāḥ soṣmāṇo vraṇino vipakṣahṛdayapronmāthinaḥ karkaśāḥ /
utsṛṣṭāmbaradṛṣṭavigrahabharā yasya smarāgresarā mārā māravadhūstanāśca na dadhuḥ kṣobhaṃ sa vo'vyājjinaḥ //

ābrahmakīṭāntamidaṃ nibaddhaṃ puṃstrīprayogena jagat samastam /
vrīḍātra kā yatra caturmukhatvam īśo'pi lobhād gamito yuvatyāḥ //

ābhaṅgurāgrabahuguṇa- dīrghāsvādapradā priyādṛṣṭiḥ /
karṣati mano madīyaṃ hradamīnaṃ baḍiśarajjuriva //

ābharaṇasyābharaṇaṃ prasādhanavidheḥ prasādhanaviśeṣaḥ /
upamānasyāpi sakhe pratyupamānaṃ vapus tasyāḥ //

ābhāti candrarahitā na kadāpi rātriś candro'pi rātrirahito gatakāntireva /
kiṃ kāraṇaṃ yadanayoḥ pratimāsameko jāto nirantaratayā parirambhayogaḥ //

ābhāti dhūsarataraṃ timiraṃ purastād antaḥsphuradviralatārakabhārametat /
dagdhuṃ viyogivipinaṃ sitaraśmivahner dhūmo jvaliṣyata ivānugatasphuliṅgaḥ //

ābhāti bālikeyaṃ pāṇisparśena pulakitāvayavā /
abhinavavasantasaṅgād āvirmukuleva bālacūtalatā //

ābhāti romarājiś caladalikulakomalā viśālākṣyāḥ /
nābhīvivarāntargata- madanānaladhūmalekheva //

ābhāti śobhātiśayaprapañcād eṇīdṛśo'syā ramaṇīyaśobhā /
veṇī lasatkuntaladhoraṇīnāṃ śreṇīva kiṃ cāruharinmaṇīnām //

ābhātyetad dvicandraṃ viyadapi nikhilaṃ hantinastu tridantā gaṅgāpūraścaturdhā pravilasati lasatpañcadantaḥ karīndraḥ /
ṣaḍvaktraḥ (saptavaktraḥ) pariṇamati tathā ṣaṅguṇāḥ saptasaṃkhyāḥ śaṅke tvatkīrtimūrtyā navamiva jagadālakṣyate kṣoṇipāla //

ābhicārikahomaistu mantraiḥ ṣaṭkarmasādhakaḥ /
yantralekhanakairugrair upāṃśujapanādibhiḥ //

ābhimukhyadaśāmātrād ādarśa iva sajjanaḥ /
śīghraṃ raktamaraktaṃ vā gṛhṇāti svaprasādataḥ //

ābhīradārakamudañcitakiṃkiṇīkam ātāmrapāṇicaraṇaṃ puruṣaṃ purāṇam /
mañjīramañjumaruṇādharamambujākṣam advaitacinmayamanādimanantamīḍe //

ābhīranāryāḥ karamādadhāno na śaṅkase mādhava kiṃ bravīṣi /
pallīpatir ballavavallabhāyāḥ karagrahe kiṃ vidadhīta śaṅkām //

ābhīrādigiraḥ kāvyeṣv aprabhraṃśa iti smṛtāḥ /
śāstreṣu saṃskṛtādanyad apabhraṃśatayoditam //

ābhugnāṅgulipallavau kacabhare vyāpārayantī karau bandhotkarṣanibaddhamānasatayā śūnyāṃ dadhānā dṛśam /
bāhūtkṣepasamunnate stanataṭeparyastacīnāṃśukā hrīsaṅkocitabāhumūlasubhagaṃ badhnāti jūṭiṃ vadhūḥ //

ābhujyendradiśaṃ kuberakakubhaṃ svāśliṣya gāḍhaṃ karair ācumbyāmbujinīṃ samaṃ kumudinīmullāsya tāṃ dakṣiṇām /
eṣo'dyāpi parārucirvijayate rātrīśvaro drāgiti krodhādeva layaṃ jagāma caturastārāgaṇaḥ sarvataḥ //

ābhogaḥ stanayormahatyatimahān muktāsrajaṃ bhāsuro māhātmyāvahitaprabhūtasumanobāṇo'pi te'ntaḥ sthitaḥ /
bhālaṃ svacchavirocanaṃ balirasāvapyāsta evodare romṇāṃ vikriyayā yuvatvabhavayā vindhyāvalī vartate //

ābhogabhūṣaṇavatī kucakumbhasaṃpad antarvikāramadhurāṇi vilokitāni /
aṅgānyanaṅgapiśunāni kulāṅganānāṃ dhīrātmanāmapi manaḥ paritāpayanti //