મહાસુભાષિતસંગ્રહ · શ્લોક 5005-5024

આભોગશ્ચૈકખણ્ડઃ સ્યાદ્ દ્વિતીયં ચોચ્ચખણ્ડકમ્ ।
તુલ્યનામાઙ્કિતં ચૈતદ્ ઇતિ મધ્યમલક્ષણમ્ ॥

આભોગિનઃ કિમપિ સમ્પ્રતિ વાસરાન્તે સંપન્નશાલિખલપલ્લવિતોપશલ્યાઃ ।
ગ્રામાસ્તુષારભરબન્ધુરગોમયાગ્નિ- ધૂમાવલીવલયમેખલિનો હરન્તિ ॥

આભોગિનેત્રપરિવર્તનવિભ્રમેણ મૂર્ત્યા નિતમ્બવલનાકુલતાં વહન્ત્યા ।
યસ્યાશનૈરવિરલોત્કલિકાકલાપ- પર્યાકુલં હૃદયમમ્બુનિધિર્મમન્થ ॥

આભોગિનૌ મણ્ડલિનૌ તત્ક્ષણોન્મુક્તકઞ્ચુકૌ ।
વરમાશીવિષૌ સ્પૃષ્ટૌ ન તુ તન્વ્યાઃ પયોધરૌ ॥

આભોગે ચ પદૈકં સ્યાત્ કિંચિદુચ્ચં દ્વિતીયકમ્ ।
પ્રભુનામાઙ્કિતં ચૈતત્ કનિષ્ઠસ્યેતિ લક્ષણમ્ ॥

આભ્યન્તરાદ્ ભયં રક્ષન્ સુરક્ષેદ્ બાહ્યતો ભયમ્ ।
આભ્યન્તરાદ્ ભયં જાતં સદ્યો મૂલં નિકૃન્તતિ ॥

આભ્યાં કુચાભ્યામિભકુમ્ભયોઃ શ્રીર્ આદીયતેઽસાવનયોર્ન તાભ્યામ્ ।
ભયેન ગોપાયિતમૌક્તિકૌ તૌ પ્રવ્યક્તમુક્તાભરણાવિમૌ યત્ ॥

આમં વિપચ્યમાનં ચ સમ્યક્ પક્વં ચ યો ભિષક્ ।
જાનીયાત્ સ ભવેદ્ વૈદ્યઃ શેષસ્ તસ્કરવૃત્તયઃ ॥

આમત્તભ્રમરકુલાકુલાનિ ધુન્વન્ન્ ઉદ્ધૂતગ્રથિતરજાંસિ પઙ્કજાનિ ।
કાન્તાનાં ગગનનદીતરઙ્ગશીતઃ સંતાપં વિરમયતિ સ્મ માતરિશ્વા ॥

આમત્તાનાં શ્રવણસુભગૈઃ કૂજિતૈઃ કોકિલાનાં સાનુક્રોશં મનસિજરુજઃ સહ્યતાં પૃચ્છતેવ ।
અઙ્ગે ચૂતપ્રસવસુરભિર્દક્ષિણો મારુતો મે સાન્દ્રસ્પર્શઃ કરતલ ઇવ વ્યાપૃતો માધવેન ॥

આ મધ્યાહ્નં નદીવાસઃ સમાજે દેવતાર્ચનમ્ ।
સતતં શુચિવેષશ્ચેત્ય્ એતદ્ દમ્ભસ્ય જીવિતમ્ ॥

આમન્ત્રણજયશબ્દૈઃ પ્રતિપદહુંકારઘર્ઘરારાવૈઃ ।
સ્વયમુક્તસાધુવાદૈર્ અન્તરયતિ ગાયનો ગીતમ્ ॥

આમન્ત્રણા સુરભિણા મરુતા કૃતાદૌ દત્તં ફલં ચ પુરતઃ કટુકણ્ટકાખ્યમ્ ।
ભગ્નં મુખં વિમુખતા ચ તતઃ શુકાનાં રાજ્ઞાં પુરઃ પનસ કીર્તિરિયં તવૈવ ॥

આમન્ત્રણોત્સવા વિપ્રા ગાવો નવતૃણોત્સવાઃ ।
પત્યુત્સાહયુતા નાર્યઃ અહં કૃષ્ણ રણોત્સવઃ ॥

આમન્ત્ર્ય તેન દેવ ત્વાં તદ્વૈયર્થ્યં સમર્થયે ।
શપથઃ કર્કશોદર્કઃ સત્યં સત્યોઽપિ દૈવતઃ ॥

આમન્થિનીકલશ એષ સદુગ્ધસિન્ધુર્ વેત્રં ચ વાસુકિરયં ગિરિરેષ મન્થઃ ।
સંપ્રત્યુપોઢમદમન્થરબાહુદણ્ડ- કણ્ડૂયનાવસર એવ સુરાસુરાણામ્ ॥

આમયાર્તિરિપુત્રાસ ક્ષુદાદૌ દૃષ્ટવૈકૃતાન્ ।
લબ્ધોદયા હ્રીભયેન ક્ષ્માપા ઘ્નન્ત્યનુયાયિનઃ ॥

આ મરણાદપિ વિરુતં કુર્વાણાઃ સ્પર્ધયા સહ મયૂરૈઃ ।
કિં જાનન્તિ વરાકાઃ કાકાઃ કેકારવં કર્તુમ્ ॥

આમર્દયતિ પાણિભ્યાં કાન્તે કમલકોરકે ।
સિન્દૂરતિલકે બાલા કસ્તૂરીતિલકં વ્યધાત્ ॥

આમર્દ્ય વક્ષોજયુગં નિપીય બિમ્બાધરં મે કબરીં વ્યુદસ્ય ।
નીવીસમાસન્નકરો નિરુદ્ધઃ સ્વપ્ને વયસ્યોઽદ્ય રહસ્યચેષ્ટઃ ॥