મહાસુભાષિતસંગ્રહ · શ્લોક 4383-4402

આગત્ય સત્વરમસી રવિરમ્બરાન્તમ્ ઉલ્લાસ્ય પાદપતનૈઃ સ્ફુટસાંધ્યરાગઃ ।
પશ્ય પ્રસાદયતિ રાગવતીં પ્રતીચી- દિક્કામિનીં પ્રકુપિતામિવ મન્યમાનઃ ॥

આગત્યૈવ કુતશ્ચિદેવ ગગનાભોગં ચ કૃત્વાત્મસાત્ ભાવાભાવવિલોકનાસ્પદમમૂન્ નીત્વેન્દુમુખ્યાનપિ ।
જાજ્વલ્યં જગતો વિધાય કિમપિ પ્રાપ્તઃ પ્રિયોઽહ્નાં પતિર્ યાત્વસ્તં પ્રવિશત્વથાબ્ધિમથવા મેરૌ પરિભ્રામ્યતુ ॥

આગન્તૌ જાઙ્ઘિકે ચૈવ સર્વે કાકાઃ સમાઃ સ્મૃતાઃ ।
ક્ષેત્રજે શકુને ગ્રાહ્યઃ કાકોલસ્તેષુ સર્વદા ॥

આગમં નિર્ગમં સ્થાનં તથા વૃદ્ધિક્ષયાવુભૌ ।
વિચાર્ય સર્વપણ્યાનાં કારયેત્ ક્રયવિક્રયૌ ॥

આગમરૂપવિચારિણ્ય્ અધિકરણસહસ્રશિક્ષિતવિપક્ષે ।
સ્વામિનિજૈમિનિયોગિન્ય્ ઉપરજ્યતિ હૃદયમસ્મદીયમિદમ્ ॥

આગમાદેવ નરકાઃ શ્રૂયન્તે રૌરવાદયઃ ।
વિષયિત્વં દરિદ્રાણાં પ્રત્યક્ષં નરકં વિદુઃ ॥

આગમાર્થં હિ યતતે રક્ષણાર્થં હિ સર્વદા ।
કુટુમ્બપોષણે સ્વામી તદન્યે તસ્કરા ઇવ ॥

આગમિષ્યન્તિ તે ભાવા યે ભાવા મયિ ભાવિનઃ ।
અહં તૈરનુસર્તવ્યો ન તેષામન્યતો ગતિઃ ॥

આગમેન ચ યુક્ત્યા ચ યોઽર્થઃ સમભિગમ્યતે ।
પરીક્ષ્ય હેમવદ્ ગ્રાહ્યઃ પક્ષપાતગ્રહેણ કિમ્ ॥

આગમે યસ્ય ચત્વારિ નિર્ગમે સાર્ધપઞ્ચ ચ ।
અતિવિસ્તારવિસ્તીર્ણાશ્ ચિરં તિષ્ઠન્તિ નો શ્રિયઃ ॥

આગમોઽભ્યધિકો ભોગાદ્ વિના પૂર્વક્રમાગતાત્ ।
આગમેઽપિ બલં નૈવ ભુક્તિઃ સ્તોકાપિ યત્ર નો ॥

આગર્જદ્ગિરિકુઞ્જકુઞ્જરઘટાનિસ્તીર્ણકર્ણજ્વરં જ્યાનિર્ઘોષમમન્દદુન્દુભિરવૈરાધ્માતમુત્તમ્ભયન્ ।
વેલ્લદ્ભૈરવરુણ્ડમુણ્ડનિકરૈર્વીરો વિધત્તે ભુવં તૃપ્યત્કાલકરાલવક્ત્રવિઘસવ્યાકીર્યમાણામિવ ॥

આગર્ભમાબદ્ધમમર્ષશીલઃ પિતુઃ સ્મરન્ ક્ષત્રકૃતાપરાધમ્ ।
પરશ્વધેનૈવ ભૃગુપ્રવીરઃ પ્રાણૈર્વિયોજ્યાપિ રિપૂંશ્છિનત્તિ ॥

આ ગર્ભાદ્ આ કુલપરિવૃઢાદ્ આ ચતુર્વક્ત્રતોઽપિ ત્વત્પાદાબ્જપ્રપદનપરાન્ વેત્સિ નશ્ચન્દ્રમૌલે ।
માયાયાશ્ચ પ્રપદનપરેષ્વપ્રવૃત્તિં ત્વમાત્થ સ્વામિન્નેવં સતિ યદુચિતં તત્ર દેવઃ પ્રમાણમ્ ॥

આગસ્કારિણિ કૈટભપ્રમથને તત્તાડનાર્થં રુષા નાભીપઙ્કજમસ્ત્રતાં ગમયિતું જાતે પ્રયત્ને શ્રિયઃ ।
સ્વાવાસોન્મથનોપપાદિતભયભ્રાન્તાત્મનસ્તત્ક્ષણ્ આદ અબ્રહ્મણ્યપરાઃ પુરાતનમુનેર્વાગ્વૃત્તયઃ પાન્તુ વઃ ॥

આગારદાહી મિત્રઘ્નઃ શાકુનિર્ગ્રામયાજકઃ ।
રુધિરાન્ધે પતન્ત્યેતે સોમં વિક્રીણતે ચ યે ॥

આગુલ્ફમાલમ્બિતવલ્ગુવેણી વિભાતિ બાલા કનકાઙ્ગયષ્ટિઃ ।
ઉત્તીર્ણમૌર્વીવ વશીકૃતોર્વી મનોભુવશ્ચમ્પકચાપવલ્લી ॥

આગ્નેયાસ્ત્રપ્રવીણપ્રબલમૃગભટાઃ શત્રુસંક્ષોભદક્ષા યસ્ય પ્રૌઢપ્રતાપાનલબહલશિખાસ્વિન્ધનત્વં પ્રયાન્તિ ।
સોઽયં પ્રાચીપયોધિપ્રહિતકરતતીતૂર્ણસંપૂર્ણકોપો બાઙ્ગાલક્ષોણિપાલસ્ત્રિભુવનજનતાગીતકીર્તિ પ્રરોહઃ ॥

આગ્નેયીમેતિ શીતાદિવ દિશમરુણો વાસરાઃ સંકુચન્તી- વાસંસ્તર્ષેઽપિ તોયાદ્ વહતિ તનુશિખી શીતપીડાં પ્રમાર્ષ્ટિ (?) ।
તલ્પેઽનલ્પપ્રકોપપ્રવિદલિતદૃઢાલિઙ્ગનગ્રન્થિબન્ધે લબ્ધ્વા સંધાનરન્ધ્રં નિબિડયતિ જડો દમ્પતી માતરિશ્વા ॥

આગ્નેયે યદિ કોણે ગ્રામસ્ય પુરસ્ય વા ભવતિ કૂપઃ ।
નિત્યં સ કરોતિ ભયં દાહં ચ સમાનુષં પ્રાયઃ ॥