Mahāsubhāṣitasaṃgraha 1-9979 · Verses 4383-4402

āgatya satvaramasī ravirambarāntam ullāsya pādapatanaiḥ sphuṭasāṃdhyarāgaḥ /
paśya prasādayati rāgavatīṃ pratīcī- dikkāminīṃ prakupitāmiva manyamānaḥ //

āgatyaiva kutaścideva gaganābhogaṃ ca kṛtvātmasāt bhāvābhāvavilokanāspadamamūn nītvendumukhyānapi /
jājvalyaṃ jagato vidhāya kimapi prāptaḥ priyo'hnāṃ patir yātvastaṃ praviśatvathābdhimathavā merau paribhrāmyatu //

āgantau jāṅghike caiva sarve kākāḥ samāḥ smṛtāḥ /
kṣetraje śakune grāhyaḥ kākolasteṣu sarvadā //

āgamaṃ nirgamaṃ sthānaṃ tathā vṛddhikṣayāvubhau /
vicārya sarvapaṇyānāṃ kārayet krayavikrayau //

āgamarūpavicāriṇy adhikaraṇasahasraśikṣitavipakṣe /
svāminijaiminiyoginy uparajyati hṛdayamasmadīyamidam //

āgamādeva narakāḥ śrūyante rauravādayaḥ /
viṣayitvaṃ daridrāṇāṃ pratyakṣaṃ narakaṃ viduḥ //

āgamārthaṃ hi yatate rakṣaṇārthaṃ hi sarvadā /
kuṭumbapoṣaṇe svāmī tadanye taskarā iva //

āgamiṣyanti te bhāvā ye bhāvā mayi bhāvinaḥ /
ahaṃ tairanusartavyo na teṣāmanyato gatiḥ //

āgamena ca yuktyā ca yo'rthaḥ samabhigamyate /
parīkṣya hemavad grāhyaḥ pakṣapātagraheṇa kim //

āgame yasya catvāri nirgame sārdhapañca ca /
ativistāravistīrṇāś ciraṃ tiṣṭhanti no śriyaḥ //

āgamo'bhyadhiko bhogād vinā pūrvakramāgatāt /
āgame'pi balaṃ naiva bhuktiḥ stokāpi yatra no //

āgarjadgirikuñjakuñjaraghaṭānistīrṇakarṇajvaraṃ jyānirghoṣamamandadundubhiravairādhmātamuttambhayan /
velladbhairavaruṇḍamuṇḍanikarairvīro vidhatte bhuvaṃ tṛpyatkālakarālavaktravighasavyākīryamāṇāmiva //

āgarbhamābaddhamamarṣaśīlaḥ pituḥ smaran kṣatrakṛtāparādham /
paraśvadhenaiva bhṛgupravīraḥ prāṇairviyojyāpi ripūṃśchinatti //

ā garbhād ā kulaparivṛḍhād ā caturvaktrato'pi tvatpādābjaprapadanaparān vetsi naścandramaule /
māyāyāśca prapadanapareṣvapravṛttiṃ tvamāttha svāminnevaṃ sati yaducitaṃ tatra devaḥ pramāṇam //

āgaskāriṇi kaiṭabhapramathane tattāḍanārthaṃ ruṣā nābhīpaṅkajamastratāṃ gamayituṃ jāte prayatne śriyaḥ /
svāvāsonmathanopapāditabhayabhrāntātmanastatkṣaṇ āda abrahmaṇyaparāḥ purātanamunervāgvṛttayaḥ pāntu vaḥ //

āgāradāhī mitraghnaḥ śākunirgrāmayājakaḥ /
rudhirāndhe patantyete somaṃ vikrīṇate ca ye //

āgulphamālambitavalguveṇī vibhāti bālā kanakāṅgayaṣṭiḥ /
uttīrṇamaurvīva vaśīkṛtorvī manobhuvaścampakacāpavallī //

āgneyāstrapravīṇaprabalamṛgabhaṭāḥ śatrusaṃkṣobhadakṣā yasya prauḍhapratāpānalabahalaśikhāsvindhanatvaṃ prayānti /
so'yaṃ prācīpayodhiprahitakaratatītūrṇasaṃpūrṇakopo bāṅgālakṣoṇipālastribhuvanajanatāgītakīrti prarohaḥ //

āgneyīmeti śītādiva diśamaruṇo vāsarāḥ saṃkucantī- vāsaṃstarṣe'pi toyād vahati tanuśikhī śītapīḍāṃ pramārṣṭi (?) /
talpe'nalpaprakopapravidalitadṛḍhāliṅganagranthibandhe labdhvā saṃdhānarandhraṃ nibiḍayati jaḍo dampatī mātariśvā //

āgneye yadi koṇe grāmasya purasya vā bhavati kūpaḥ /
nityaṃ sa karoti bhayaṃ dāhaṃ ca samānuṣaṃ prāyaḥ //